ទាហានឆាដស្លាប់១៣នាក់និងពួកឧទ្ទាម Jihad ស្លាប់៦៥នាក់នៅភាគខាងជើងម៉ាលី
នៅភាគខាងជើងបំផុតនៃប្រទេសម៉ាលីជិតតំបន់ Tessali មិនឆ្ងាយប៉ុន្មានពីតំបន់ព្រំដែន អាល់ហ្សេរី មានការវាយប្រយុទ្ធគ្នានៅព្រឹកមិញនេះរវាងក្រុម ឧទ្ទាមទូរអារិក(Touareg) ដែលសហប្រតិបត្តិការជាមួយកងទ័ពបារាំងនិងក្រុមប្រដាប់អាវុធមួយដែលគេនៅមិនទាន់ស្គាល់អត្តសញ្ញាណនៅឡើយទេ-នេះបើយោងតាមប្រភពសន្តិសុខសាធារណៈនានា។ នៅថ្ងៃសុក្រ២២កុម្ភៈម្សិលមិញ មានការផ្ទុះអាវុធដ៏កាចសាហាវបំផុតនៅTessalit នេះដែរ ដែលបានបណ្តាលឲ្យស្លាប់ពួកឧទ្ទាមអ៊ីស្លាម Jihad ៦៥នាក់និង១៣នាក់នៅក្នុងជួរកងទ័ពឆាដ។កងទ័ពឆាដ ធ្លាប់បានបាត់បង់កងទ័ពរបស់ខ្លួនពីរនាក់រួចមកហើយចាប់តាំងពីបានចូលរួមក្នុងប្រតិបត្តិការយោធានៅប្រទេសម៉ាលីមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
សេនាធិការដ្ឋានឆាដ បានថ្លែងបញ្ជាក់ថា “គឺជាការប្រឈមអាវុធដាក់គ្នាមួយ ដ៏កាចសាហាវបំផុត”។ ឧប្បត្តិហេតុហិង្សានេះ បានប្រព្រឹត្តនៅព្រឹកថ្ងៃសុក្រ២២កុម្ភៈម្សិលមិញនៅម៉ោង១១.១៥នាទី នៅតំបន់ភ្នំ Ifoghas ក្នុងភាគខាងជើងបំផុតនៃប្រទេសម៉ាលីគឺម្តុំជួរភ្នំ Tighargha ដែលស្ថិតនៅមិនឆ្ងាយប៉ុន្មានពីព្រំដែនប្រទេសអាល់ហ្សេរី។ ជាតំបន់ភ្នំ ដែលមានផ្ទាំងសិលាធំៗនិងដែលគេពិបាកចូលណាស់។នៅទីនោះសោតក៏មានរូងភ្នំជាច្រើនកន្លែងដែលពួកឧទ្ទាម Jihad ស្គាល់ កន្លុកកន្លៀតគ្មានសល់ដែរ។
នៅក្នុងការវាយប្រយុទ្ធគ្នាដ៏កាចសាហាវរវាងកងទ័ពឆាដនិងពួកឧទ្ទាមអ៊ីស្លាមJihad ម្សិលមិញ បានបណ្តាលឲ្យពួកឧទ្ទាម Jihad ស្លាប់៦៥នាក់និងស្លាប់ទាហានឆាដ ១៣នាក់-នេះបើយោងតាមតួលេខនៃសេនាធិការដ្ឋានឆាដ។
គឺជា ការដាក់មួយព្រនង់យ៉ាងខ្លាំងដែរទៅលើកងទ័ពឆាដដែលបានដាក់ពង្រាយកងទ័ពខ្លួនចំនួនប្រមាណជា១៨០០នាក់នៅក្នុងតំបន់ Kidal ដើម្បីអមក្បែរកងកម្លាំងពិសេសបារាំងនៅក្នុងប្រទេសម៉ាលី។
ទន្ទឹមនេះដែរ ពួកឧទ្ទាម Jihad កាន់តែបង្កើនការវាយប្រយុទ្ធរបស់ពួកគេដែរ។ ដោយ នៅតំបន់ដដែលនេះ ជិត Tessalit មានអំពើភេរវកម្មអត្តឃាតមួយកើតឡើងនៅព្រឹកថ្ងៃសុក្រម្សិលមិញដែរ ដែលសំដៅប្រឆាំងទៅលើទីតាំងមួយរបស់ចលនាឧទ្ទាម touareg MNLA ក្នុងភាគឥសានប្រទេសម៉ាលី។ គឺ ជាការបំផ្ទុះរថយន្តពីរគ្រឿងដែលបានបណ្តាលឲ្យស្លាប់២នាក់និងរបួសពីរនាក់ខាងចលនាឧទ្ទាម touareg -ចលនាដែលសហប្រតិបត្តិការជាមួយកងទ័ពបារាំងនៅភាគឥសានម៉ាលី។
ចំណែក ពួកភេរវជន Jihad ពីរនាក់ដែលជាអ្នកបំផ្ទុះរថយន្ត បានស្លាប់ទាំងអស់គ្នា។ យោងតាមចលនា ឧទ្ទាម touareg MNLA គឺក្រុមចលនាឧទ្ទាមអ៊ីស្លាម Mujao ដែលជាចលនាឧទ្ទាមនៅអាហ្វ្រិកខាងលិចជាអ្នកទទួលខុសត្រូវនៅក្នុងអំពើភេរវកម្មអត្តឃាតនេះ។ “ពួកយើង ជាចំណុចផ្ទាំងស៊ីបដ៏ពិតៗនៃការវាយប្រហារ ពីព្រោះពួកយើង បានរួមសហប្រតិបត្តិការជាមួយកងទ័ពបារាំង”នេះជាការពន្យល់របស់ចលនាឧទ្ទាម touareg MNLA ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ