សហភាពអឺរ៉ុបសន្យាផ្តល់ជំនួយបន្ថែម ២០លានអឺរ៉ូឲ្យប្រទេសម៉ាលី
នៅថ្ងៃសុក្រ ទី១៥ កុម្ភៈម្សិលមិញ សហភាអឺរ៉ុបបានប្រកាសសម្រេចផ្តល់ជំនួយបន្ថែមចំនួន ២០លានអឺរ៉ូឲ្យទៅប្រទេសម៉ាលី។ កាលពីថ្ងៃអង្គារដើមសប្តាហ៍នេះ សហភាពអឺរ៉ុបបានសម្រេចផ្តល់ជំនួយជាថ្មីទៅឲ្យប្រទេសម៉ាលី តាមរយៈកញ្ចប់ថវិកាដំបូងចំនួន ២៥០លានអឺរ៉ូ។
ចុះផ្សាយនៅថ្ងៃ៖
ស្តាប់ - ០១:៣០
កញ្ចប់ថវិកាថ្មីចំនួន ២០លានអឺរ៉ូត្រូវបានសហភាពអឺរ៉ុបដកចេញពីហិបមូលនិធិអឹរ៉ុបដើម្បីស្ថិរភាពហិរញ្ញវត្ថុរបស់ខ្លួន។ មូលនិធិនេះ ជាមូលនិធិពិសេសដាច់ដោយឡែកមួយដែលសហភាពអឺរ៉ុបទុកសម្រាប់ប្រើប្រាស់នៅក្នុងករណីមានជម្លោះ។ ជំនួយបន្ថែម ២០លានអឺរ៉ូនឹងត្រូវយកទៅប្រើប្រាស់ក្នុងការជួយស្ថាបនានីតិរដ្ឋ និងអធិបតេយ្យរបស់ប្រទេសម៉ាលី ពិសេសនៅតំបន់ប៉ែកខាងជើង។ ឧទាហរណ៍ជាក់ស្តែង ជួយបំពាក់រថយន្ត និងមធ្យាបាយទូរគមនាគមន៍ឲ្យកម្លំាងសន្តិសុខនៅតំបន់ប៉ែកខាងជើង។ ទន្ទឹមគ្នានេះ គោលដៅសំខាន់នៃជំនួយក៏ដើម្បីជួយគំាទ្រវិធានការការពារសន្តិសុខរបស់រដ្ឋាភិបាលម៉ាលីនៅតាមស្រុក និងទីកន្លែងរសើបមួយចំនួនដែលទទួលការគំរាមកំហែងពីក្រុមភេរវជន។
ក្រៅពីនេះ សហភាពអឺរ៉ុបក៏បានសន្យាជួយទំនុកបម្រុងដល់សេវាសាធារណៈមួយចំនួនរបស់រដ្ឋាភិបាលម៉ាលី ដូចយ៉ាងសាលារៀនជាដើម។ គួរជម្រាបជូនថា កាលពីថ្ងៃអង្គារ ទី១២ កុម្ភៈកន្លងទៅ សហភាពអឺរ៉ុបបានប្រកាសពីការផ្តើមផ្តល់ជំនួយសាធារណៈឲ្យប្រទេសម៉ាលីឡើងវិញ ក្រោយពីការអនុម័តនៅទីក្រុងបាម៉ាកូនូវផែនទីចង្អុលផ្លូវមួយសម្រាប់ដំណើរការនយោបាយនៅម៉ាលី។ ជំនួយសាធារណៈដែលមានទឹកប្រាក់ចំនួន ២៥០លានអឺរ៉ូ។ ក៏ប៉ុន្តែ តម្រូវការចំណាយនៅលើវិស័យ ឬផ្នែកណានោះនឹងត្រូវបញ្ជាក់ឲ្យបានច្បាស់លាស់នៅថ្ងៃខាងមុខ។ ឧទាហរណ៍ជាក់ស្តែង គឺគ្មានអ្វី ក្រៅពីការជួយគំាទ្រប្រទេសម៉ាលីក្នុងការកសាងហេដ្ឋារចនាសម្ព័ន្ធរបស់ប្រទេសឡើងវិញនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ