ធញ្ញជាតិ ស្រូវ អង្ករ ប្រែប្រួលតម្លៃទៅតាមអាកាសធាតុ
តម្លៃគ្រាប់ធញ្ញជាតិ ចំបងបីប្រភេទនៅលើពិភពលោក ៖ អង្ករ ស្រូវសាលី ពោត បានឡើងថ្លៃយ៉ាងខ្លាំង ជាហេតុធ្វើឲ្យចំណីអាហារផលិតពីធញ្ញជាតិបីនេះក៏ឡើងថ្លៃទៅតាម នោះដែរ។ ជាងនេះទៅទៀត តម្លៃនៅតាមទីផ្សារ កំពុងតែផ្តោតចក្ខុទៅលើបញ្ហាអាកាសធាតុ។ អាកាសធាតុមិនអំណោចផល ដែលអាចនឹងធ្វើឲ្យតម្លៃចំណីអាហារកាន់តែពិបាកដោះស្រាយមួយកំរិត បន្ថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
អាកាសធាតុក្តៅហួតហែងខ្លាំងមិនធ្លាប់មាននៅប្រទេសរុស្ស៊ី គ្រោះទឹកជំនន់ជាប្រវត្តិសាស្ត្រនៅប្រទេសអូស្រ្តាលី និងនៅអាស៊ី គ្រោះធម្មជាតិស្ទើរគ្រប់ជ្រុងនៃពិភពលោក បានបង្កផលប៉ះពាល់យ៉ាងខ្លាំងលើដំណាំកសិកម្ម ស្រូវ អង្ករ ពោត ដែលជាវត្ថុធាតុដើម និងអាហារចាំបាច់ របស់មនុស្សលោក។ ជាងនេះទៅទៀត ក្នុងពេលនេះចិន ដែលប្រទេសជាជង្រុកស្រូវសាលីទីមួយនៅលើពិភពលោក កំពុងទទួលរងភាពរាំងស្ងួត។ ភាពរាំងស្ងួតនៅភាគខាងជើង អាចនឹងធ្វើឲ្យផលិតផលស្រូវសាលីធ្លាក់ចុះ។
បើតាមទីភ្នាក់ងាររបស់អង្គការសហប្រជាជាតិផែ្នកចំណីអាហារ និងកសិកម្ម ហៅកាត់ថាអង្គការFAO ការប្រមូលផលស្រូវសាលីនៅឆ្នាំនេះអាចនឹងមានកំរិតទាប ជាងឆ្នាំមុន និងអាចបង្កឲ្យមានបញ្ហាតម្លៃកាន់តែធ្ងន់ធ្ងរ។ ពេលនេះ ពិភពលោកមិនទាន់ធ្លាក់ចូលដល់ដំណាក់កាលវឹកវរទេ ប៉ុន្តែមិនត្រូវឲ្យស្ថានភាពបែបនេះអូសបន្លាយបានបន្តពីរបីខែទៀតឡើយ។
បរិមាណគ្រាប់ពោតស្តុកទុក មានកំរិតទាបបំផុត ហើយមួយភាគធំសហរដ្ឋអាមេរិកបំរុងទុកសម្រាប់ផលិតជីវៈប្រេងឥន្ធនៈ។
ចំណែកឯស្រូវសាលីវិញ តាមការពិត ពិភពលោកមានស្តុកទុកច្រើនជាងឆ្នាំ២០០៧-២០០៨ ឆ្នាំដែលមានផ្ទុះវិបត្តិអត់ឃ្លានទៅទៀត ប៉ុន្តែជង្រុកស្រូវដ៏ស្តុកស្តម្ភនេះ មាននៅតែក្នុងសហរដ្ឋអាមេរិកមួយកន្លែងប៉ុណ្ណោះ។
ចំពោះស្រូវ-អង្ករវិញ មានស្ថានភាពខុសពីស្រូវសាលី។ អង្ករដែលចំណីអាហារគ្រឹះរបស់បណ្តាជនពាក់កណ្តាលនៅលើពិភពលោក មិនបានទទួលរងផលប៉ះពាល់ពីអាកាសធាតុទេ និងមាននៅក្នុងស្តុកគ្រប់គ្រាន់ ប៉ុន្តែតាំងពីចូលឆ្នាំ២០១១មក តម្លៃអង្ករក៏ស្រាប់តែឡើងថ្លៃ ដល់ទៅ១០%។ ការឡើងថ្លៃនេះគឺបណ្តាលមកពីកសិករអាមេរិក អ្នកនាំអង្ករចេញដ៏ធំ បានប្តូរពីធ្វើស្រូវទៅដាំដុះពោត សណ្តែក ឬកប្បាសវិញ ព្រោះបានផលកម្រៃច្រើនជាង។
ដូច្នេះជាសរុបមកអ្នកឯកទេសបានយល់ព្រមគ្នាថា តម្លៃធញ្ញជាតិនឹងបន្តពុះកញ្ជ្រោល មិនអាចបញ្ឈប់បានឡើយ ម្យ៉ាងដោយសារតម្រូវការកាន់តែច្រើន និងម្យ៉ាងទៀតគឺដោយហេតុតែមានចលនាកេងយកចំណេញ កាន់តែរីកធំធាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ