ហេតុអ្វីបានជាពួកអេស្បូឡាលីបង់បានបើកសមរភូមិនៅអ៊ីរ៉ាក់?
ចុះផ្សាយនៅថ្ងៃ៖
ស្តាប់ - ០៤:៣៦
កាលពីថ្ងៃទី១៦ កុម្ភៈ លោកប្រមុខចលនាអេស្បូឡាក្នុងប្រទេសលីបង់ហាសាន ណាស្រាឡាបានប្រកាសឲ្យដឹងថា ចលនានិកាយឈីអ៊ីតរបស់ពួកគេបានបើកសមរភូមិប្រយុទ្ធទល់នឹងពួកជីហាតរដ្ឋអ៊ីស្លាមនៅក្នុងប្រទេសអ៊ីរ៉ាក់។ បន្ទាប់ពីបានចូលរួមប្រយុទ្ធជាមួយទ័ពរដ្ឋាភិបាលក្នុងទឹកដីស៊ីរីប្រឆំាងនឹងក្រុមបះបោរ នេះជាលើកទី១ បង្អស់ដែលចលនាអេស្បូឡាលីបង់បានប្រកាសជាផ្លូវការពីការបើកសមរភូមិថ្មីនៅប្រទេសអ៊ីរ៉ាក់។ មួយវិញទៀត ការប្រកាសរបស់លោកហាសាន ណាស្រាឡាពេលនេះ ក៏ជាការឆ្លើយតបនឹងលោកអតីតនាយករដ្ឋមន្រ្តីលីបង់សាដ ហារីរីដែលបានអំពាវនាវឲ្យពួកអេស្បូឡាដកចេញពីទឹកដីស៊ីរី។
រហូតមកដល់សព្វថ្ងៃ យុទ្ធជនអេស្បូឡាលីបង់កំពុងចូលប្រឡូកនៅក្នុងសមរភូមិចំនួន ៣ សមរភូមិទី១ គឺនៅប៉ែកខាងត្បូងលីបង់ដែលពួកគេកំពុងប្រឈមនឹងប្រទេសអ៊ីស្រាអែល សមរភូមិទី២ គឺនៅតាមខ្សែបន្ទាត់ព្រំដែនរវាងស៊ីរី និងលីបង់ដែលពួកគេកំពុងទប់ស្កាត់ការហូរចូលរបស់ពួកភេរវជន និងសមរភូមិទី៣ គឺនៅផ្ទៃក្នុងប្រទេសស៊ីរីដែលពួកគេបានជួយប្រយុទ្ធទ័ពរដ្ឋាភិបាលរបស់លោកប្រធានាធិបតីស៊ីរីអាសាដប្រឆំាងនឹងពួកឧទ្ទាមបះបោរ។ តែចាប់ពីពេលនេះតទៅ ពួកអេស្បូឡាបានបើកសមរភូមិទី៤ ជាផ្លូវការ គឺសមរភូមិនៅអ៊ីរ៉ាក់ដើម្បីប្រយុទ្ធទល់នឹងពួកជីហាតរដ្ឋអ៊ីស្លាម។
បើគេស្តាប់សុន្ទរកថារបស់ប្រមុខអេស្បូឡាកាលពីថ្ងៃទី១៦ កុម្ភៈកន្លងទៅ លោកហាសាន ណាស្រាឡាមិនបានលាក់កំបំាងនូវព័ត៌មានជុំវិញវត្តមានរបស់យុទ្ធជនអេស្បូឡានៅក្នុងទឹកដីអ៊ីរ៉ាក់ទេ ហើយរឿងសម្ងាត់មួយនេះ ក៏បានបែកធ្លាយតំាងពីខែកក្កដា ឆ្នំា ២០១៤ មកម្ល៉េះ ពោលតំាងពីក្រោយដែលមានមេបញ្ជាការម្នាក់របស់ពួកគេត្រូវបានពួកជីហាតរដ្ឋអ៊ីស្លាមសម្លាប់ចោលក្បែរទីក្រុងម៉ូស៊ូលក្នុងទឹកដីអ៊ីរ៉ាក់។ តំាងពីពេលនោះមក រូបលោកហាសាន ណាស្រាឡាបាននិយាយច្បាស់ៗថា យុទ្ធជនអេស្បូឡាបានត្រៀមខ្លួនរួចជាស្រេចដើម្បីធ្វើពលីកម្មនៅអ៊ីរ៉ាក់ឲ្យខ្លំាងជាងនៅស៊ីរី។
វត្តមានរបស់យុទ្ធជនអេស្បូឡានៅអ៊ីរ៉ាក់ពេលនេះបានធ្វើឡើង ចំពេលដែលអង្គការរដ្ឋអ៊ីស្លាមកំពុងមានឥទ្ធិពលកាន់តែខ្លំាងឡើងៗនៅក្នុងតំបន់ និងដែលសូម្បីតែកម្លំាងសម្ព័ន្ធមិត្ត ព្រមទំាងរដ្ឋាភិបាលអ៊ីរ៉ាក់ក៏ពិបាកទប់ទល់ដែរ។ អ៊ីចឹងហើយបានជាមានអ្នកខ្លះយល់ឃើញថា វត្តមានរបស់ចលនាឈីអ៊ីតមួយនេះក្នុងទឹកដីអ៊ីរ៉ាក់បានកើតមានឡើងចំពេលល្អណាស់។ តែសម្រាប់អ្នកខ្លះទៀតបែរជាកំពុងសម្តែងក្តីបារម្ភទៅវិញ។ បារម្ភ ព្រោះចលនាប្រដាប់អាវុធដែលមានទំនោររកប្រទេសអ៊ីរ៉ង់មួយនេះបានប្រកាសចូលប្រឡូកជាផ្លូវការនៅក្នុងសង្រ្គាមសាសនាដែលកំពុងពុះកញ្ជ្រោលខ្លំាងនៅក្នុងតំបន់ដើមបូព៌ារវាងក្រុមនិកាយស៊ុយនីត និងនិកាយឈីអ៊ីត។
ចូរកុំភ្លេចថា អំណាចនៅអ៊ីរ៉ាក់សព្វថ្ងៃកំពុងស្ថិតក្នុងដៃរបស់ពួកឈីអ៊ីត និងដែលពួកអេស្បូឡាមាននិកាយឈីអ៊ីតដូចគ្នាមិនអាចបន្តឈរឱបដៃមើលពួកនេះកំពុងត្រូវបានពួកជីហាតរដ្ឋអ៊ីស្លាមតាមឈ្លានីសធ្វើបាបនោះទេ។ តែលោកហាសាន ណាស្រាឡាបានបញ្ជាក់ថានៅជំហានដំបូង វត្តមានរបស់យុទ្ធជនអេស្បូឡានៅអ៊ីរ៉ាក់នឹងកម្រិតត្រឹមតែរយនាក់ប៉ុណ្ណោះ ពោលមិនដូចនៅស៊ីរីដែលប្រភពក្រៅផ្លូវការឲ្យដឹងថា មានប្រមាណជា ៥ ០០០នាក់។ មនុស្សដែលចលនាអេស្បូឡាគ្រោងនឹងបញ្ជូនមុនគេទៅអ៊ីរ៉ាក់ គឺគ្រូបង្វឹកល្បិច និងបច្ចេកទេសយោធា រួមជាមួយយុទ្ធជនច្បំាងមួយក្រុមតូចដើម្បីជួយគំាទ្រចលនាប្រដាប់អាវុធអ៊ីរ៉ាក់ឈីអ៊ីតដែលបានបង្កើតឡើងដោយឆ្មំាបដិវត្តន៍អ៊ីរ៉ង់ ដូចយ៉ាងចលនា Kataëb Hezbollah។
តាមពិតទៅ តួនាទីរបស់ចលនាអេស្បូឡាក្នុងការជួយហ្វឹកហ្វឺនកម្លំាងប្រដាប់អាវុធឈីអ៊ីតអ៊ីរ៉ាក់មិនមែនជាថ្មីទេ។ ជាក់ស្តែងក្នុងពាក់កណ្តាលទសវត្សឆ្នំា ២០០០ និងចំពេលដែលចលនាបះបោរប្រឆំាងនឹងវត្តមានទ័ពអាមេរិកំាងកំពុងឡើងដល់កំពូល ចលនាអេស្បូឡាក៏ធ្លាប់បានលួចបញ្ជូនមន្រ្តីរបស់ខ្លួនទៅអ៊ីរ៉ាក់ដើម្បីជួយបង្រៀនពីបច្ចេកទេសច្បំាងតាមរបៀបទ័ពព្រៃដល់ពលរដ្ឋអ៊ីរ៉ាក់ក្នុងការប្រឆំាងនឹងវត្តមានទ័ពអាមេរិកំាងក្នុងទឹកដីអ៊ីរ៉ាក់ដែរ។ តែចាប់ពីពេលនេះតទៅ វត្តមានជាថ្មី និងជាផ្លូវការរបស់ពួកអេស្បូឡាក្នុងទឹកដីអ៊ីរ៉ាក់នាកាលៈទេសៈសព្វថ្ងៃនឹងអាចធ្វើឲ្យចលនាឈីអ៊ីតមួយនេះក្លាយជាជន្ទល់មួយមិនអាចខ្វះបានសម្រាប់រដ្ឋាភិបាលអ៊ីរ៉ាក់នៅក្នុងយុទ្ធនាការប្រឆំាងនឹងពួកជ្រុលនិយមឈីអ៊ីតដូចជាពួកជីហាតរដ្ឋអ៊ីស្លាមជាដើម។ ក្នុងន័យនេះ លោកប្រមុខអេស្បូឡាហាសាន ណាស្រាឡាបានសន្យាប្រើយុទ្ធសាស្រ្តដូចដែលពួកគេបានប្រើក្នុងការប្រឆំាងអ៊ីស្រាអែលជាសត្រូវស៊ូពូជអ៊ីចឹង។
ជាការពិត គេមិនអាចប្រៀបប្រដូចស្ថានការណ៍នៅស៊ីរីទៅនឹងស្ថានការណ៍នៅក្នុងប្រទេសអ៊ីរ៉ាក់ពេលនេះទេ តែគេក៏មិនត្រូវភ្លេចនិយាយទេថា អសមត្ថភាពរបស់សហគមន៍អន្តជាតិក្នុងការប្រឈមទប់នឹងឥទ្ធិពលរបស់អង្គការរដ្ឋអ៊ីស្លាម ក៏ដូចជាភាពវឹកវរខ្លំាងនៅក្នុងប្រទេសលីប៊ីសព្វថ្ងៃ នឹងអាចជួយជម្រុញចលនាអេស្បូឡាឲ្យដើរតួនាទីយ៉ាងសំខាន់មិនអាចខ្វះបាននៅក្នុងតំបន់មួយដែលសង្រ្គាមសាសនារវាងក្រុមនិកាយឈីអ៊ីត និងក្រុមនិកាយស៊ុយនីតកំពុងកើតមានយ៉ាងក្តៅគគុក។ គឺជាតួនាទីមួយដែលចលនាឈីអ៊ីតមួយនេះមានអ៊ីរ៉ង់ជាអ្នកគំាទ្រយ៉ាងពេញទំហឹង។ តែអ្នកដែលកំពុងក្រពុលមុខ និងទើសទាល់ចិត្តខ្លំាង គឺប្រទេសលោកខាងលិចមួយចំនួន ពិសេសអាមេរិក និងសហភាពអឺរ៉ុបដែលបានចាត់ទុកអេស្បូឡា ជាចលនាភេរវនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ