អ៊ីរ៉ង់ជួយលីបង់ដើម្បីប្រយុទ្ធប្រឆាំងនឹងការគំរាមរបស់ពួកជីហាត
នៅថ្ងៃ៣០កញ្ញាម្សិលមិញ ទីក្រុងតេអេរ៉ង់ បានសំរេចចិត្តជួយផ្តល់សព្វាវុធដល់កងទ័ពលីបង់។ កងទ័ពលីបង់ដែលកំពុងប្រឈមដោយ ផ្ទាល់នឹងផលវិបាកលេចចេញពីអធិករណ៍នៅស៊ីរីប្រទេសជិតខាងរបស់ លីបង់។ មានន័យថា ពេលនេះ សាធារណរដ្ឋអ៊ីស្លាមអ៊ីរ៉ង់ កំពុងធ្វើដំណើរលើផ្លូវតែមួយជាមួយប្រទេសអារ៉ាប៊ីសាអ៊ូឌីតនិង សហរដ្ឋអាមេរិកដែលទើបបានជូនដំណឹងជួយលីបង់ដូចគ្នានេះដែរ។ ប៉ុន្តែ គោលដៅសំខាន់មួយទៀត របស់អ៊ីរ៉ង់ គឺការពារផលប្រយោជន៍នានារបស់ខ្លួននៅក្នុងប្រទេសលីបង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
ជំនួយយោធាដល់ប្រទេសលីបង់ មិនអាចបិតបាំង ចេតនាពិតប្រាកដរបស់ប្រទេសអារ៉ាប៊ីសាអ៊ូឌីតនិងអ៊ីរ៉ង់បានទេ។ អ៊ីរ៉ង់និងអារ៉ាប៊ីសាអ៊ូឌីត មហាអំណាចប្រចាំតំបន់ទាំងពីរ តែងតែរិះរកគ្រប់មធ្យោបាយដើម្បីពង្រឹងឥទ្ធិពលរបស់ខ្លួននៅក្នុងប្រទេសមួយដែលមានប្រជាជនអ្នកកាន់សាសនាអ៊ីស្លាមនិកាយស៊ីអីតនិងអ៊ីស្លាមស៊ុននីត មានចំនួនភាគច្រើនស្មើ គ្នា។
អារ៉ាប៊ីសាអ៊ូឌីត បានបើកប្រតិបត្តិការដាក់ស្នេហ៍លីបង់មុនគេបង្អស់។ កាលពីចុងឆ្នាំ២០១៣ ទីក្រុង រីយ៉ាត បានជូនដំណឹងជាស្រេចទៅហើយ អំពីបំណងចង់ប្រគល់អាវុធទៅដល់ទាហានលីបង់។ ជំនួយ អាវុធដែលគិតជាទឹកប្រាក់មានចំនួន៣០០០លានដុល្លារ។ ជិតមួយឆាំ្នក្រោយមក អ៊ីរ៉ង់ ក៏បានដើរតាមគន្លងមាគ៌ាអារ៉ាប៊ីសៅអ៊ូឌីតយ៉ាងប្រកិត។
កាលពីថ្ងៃអង្គារ៣០កញ្ញាម្សិលមិញ មន្ត្រីផ្លូវការអ៊ីរ៉ង់មួយរូបដែលបំពេញទស្សនកិច្ចនៅទីក្រុងបេរ៉ូតប្រទេសលីបង់ បានអះអាងថា”ប្រទេសអ៊ីរ៉ង់ ឧបត្ថម្ភអាវុធដល់ប្រទេសលីបង់និងដល់កងទ័ពដ៏ខ្លាំងពូកែនៃប្រទេសនេះ ដែលកំពុងប្រយុទ្ធប្រឆាំងទល់នឹងពួកភេរជន”។
ជំនួយយោធានេះ ដែលអាចជួយអ៊ីរ៉ង់ ឲ្យពង្រឹងវត្តមានបានកាន់តែខ្លាំងនៅលីបង់។
ហើយនៅប្រទេសនេះ អ៊ីរ៉ង់ ក៏អាចពឹងពាក់ផងដែរលើចលនា Hezbollah លីបង់ ដែលជាសម្ព័ន្ធមិត្តដ៏សំខាន់មួយរបស់ខ្លួន។ សម្ព័ន្ធមិត្តនិកាយស៊ីអ៊ីត ដែលមានកំលាំងប្រយុទ្ធ គាំទ្រដោយអ៉ីរ៉ង់តាំងពីជាច្រើនឆ្នាំមកហើយ តស៊ូប្រឆាំងនឹងពួកជីហាត ចង់ឈ្លានពានទឹកដីលីបង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ