ក្រុមហេស្បួឡាលីបង់បើកប្រតិបត្តិការប្រឆាំងអ៊ីស្រាអែល
ក្រុមហេស្បូឡា (Hezbollah) របស់លីបង់ បានប្រកាសនៅថ្ងៃពុធទី ២៨មករានេះ បើកប្រតិបត្តិការមួយប្រឆាំងនឹងក្បួនទ័ពអ៊ីស្រាអែលដែលធ្វើចរាចរណ៍ តាមតំបន់ជាប់ព្រំដែន។ មានទាហានអ៊ីស្រាអែលយ៉ាងហោចណាស់ពីរនាក់បានស្លាប់ និងរងរបួសជាច្រើននាក់ ... នេះគឺជាការវាយប្រហារដ៏ធ្ងន់ធ្ងរមួយ គិតចាប់តាំងពីសង្គ្រាមឆ្នាំ២០០៦មក ហើយបើតាមការកាត់យល់ខ្លឹមសារនៃសេចក្តីថ្លែងការណ៍របស់ហេស្បូឡាលីបង់ ទំនងជាអាចមានការវាយប្រហារបន្តបន្ទាប់ទៀត នៅថ្ងៃខាងមុខ។
ចុះផ្សាយនៅថ្ងៃ៖
ស្តាប់ - ០១:៤៥
មានស្លាប់និងរបួសទាហានអ៊ីស្រាអែលជាច្រើននាក់ និងរថយន្តយោធា ប្រមាណ៩គ្រឿងត្រូវបានបំផ្លាញ ! នេះបើតាមប្រភពលីបង់។ ចំណែកខាងអ៊ីស្រាអែល បានប្រកាសទទួលស្គាល់ថាមានទាហានស្លាប់ដែរ និងប្រកាសបញ្ជូនឧទ្ទម្ភាគចក្រចម្បាំង ជាច្រើនគ្រឿងទៅតបតវិញ ទាហានថ្មើរជើងក៏កំពុងត្រៀមប្រយុទ្ធក្រែងមានការប៉ុនប៉ងចូលចាប់យុទ្ធជនអ៊ីស្រាអែលជាចំណាប់ខ្មាំង ដូចពាក្យលេចឮមកពីខាងលីបង់។
គ្រាប់បែកជាច្រើន ត្រូវបានផ្លោងចេញពីអ៊ីស្រាអែលសំដៅភាគខាងត្បូងលីបង់ ត្រង់ចំណុចដែលទាហានហេស្បូឡាភេទស្រីជាអ្នកកាន់កាប់។ ទាហានមួកខៀវអង្គការសហប្រជាជាតិម្នាក់ជាតិអេស្ប៉ាញស្លាប់ ក្នុងហេតុការណ៍នោះ ប៉ុន្តែមិនទាន់មានការបញ្ជាក់អំពីមូលហេតុច្បាស់លាស់នៅឡើយទេ។
ការវាយប្រហារមីស៊ីលពីសំណាក់ក្រុមហេស្បូឡានេះ បានផ្ទុះឡើង ក្នុងបរិបទដ៏តានតឹងរវាងអ៊ីស្រាអែលនិងលីបង់ ព្រោះកាលពីថ្ងៃទី ១៨មករា ការវាយប្រហារតាមផ្លូវអាកាសរបស់អ៊ីស្រាអែលលើស៊ីរី បានសម្លាប់ឧត្តមសេនីយ៍អ៊ីរ៉ង់ម្នាក់ និងសមាជិកចលនាហេស្បូឡាលីបង់ជាច្រើននាក់ ក្នុងនោះមានម្នាក់ជាកូនប្រុសមេប្រតិបត្តិការយោធាចលនាឈីអ៊ីត ស្លាប់កាលពីឆ្នាំ២០០៨នៅស៊ីរីក្នុងការភេរវកម្មបំផ្ទុះរថយន្ត។
ក្រុមហេស្បូឡា បានសន្យាសងសឹក។ ដូច្នេះការវាយប្រហារនៅថ្ងៃពុធនេះ គឺគ្រាន់តែជាចម្លើយតបរបស់ក្រុមឈីអ៊ីតប្រឆាំងនឹងប្រតិបត្តិការផ្លូវអាកាសអ៊ីស្រាអែល។ ហើយការវាយប្រហារអាចមានជាបន្តបន្ទាប់ទៀត ព្រោះហេស្បូឡាបានប្រើពាក្យ “សេចក្តីថ្លែងការណ៍ទី១"។ អ៊ីស្រាអែល តាំងពីព្រលឹមមក ក៏បានបញ្ចេញយន្តហោះទៅទម្លាក់គ្រាប់បែកលើទីតាំងពីររបស់ទាហានស៊ីរីក្នុងខេត្ត Kouneïtra ជិតខ្ពង់រាបGolan ជាប់ព្រំដែនជាមួយលីបង់-ហ្ស័កដានីនិងអ៊ីស្រាអែល។ លោក នេតាន់យ៉ាហ៊ូ បានព្រមានបើកសមរភូមិគ្រប់ជ្រុង ប្រើគ្រប់កម្លាំងទាំងអស់ ព្រោះអាទិភាពដំបូងរបស់អ៊ីស្រាអែលគឺសន្តិសុខជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ