តួកគីសុំអោយរុស្ស៊ីចូលរួមប្រតិបត្តិការរួមគ្នាកំចាត់ក្រុមភេរវជនរដ្ឋអ៊ីស្លាមនៅស៊ីរី
ថ្ងៃព្រហស្បតិ៍១១សីហា តួកគីបានអំពាវនាវរុស្ស៊ីអោយចូលរួមប្រតិបត្តិការរួមគ្នាជាមួយតួកគី ដើម្បីកំចាត់ក្រុមភេរវជនរដ្ឋអ៊ីស្លាមនៅស៊ីរី។ តួកគីនិងរុស្ស៊ីកំពុងចាប់ដៃផ្សះផ្សាគ្នាឡើងវិញ ក្រោយវិបត្តិបង្កឡើង ដោយសារតួកគីបាញ់ទំលាក់យន្តហោះរុស្ស៊ី កាលពីខែវិច្ឆិកាឆ្នាំមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១២
រដ្ឋមន្ត្រីការបរទេសតួកគី លោក Mevlut Cavusoglu មេវលុត កាវូសូគ្លូ បានប្រកាសនៅថ្ងៃព្រហស្បតិ៍នេះថា តួកគីបានសុំអោយរុស្ស៊ី ចូលរួមប្រតិបត្តិការរួមគ្នាជាមួយតួកគី ដើម្បីកំទេចក្រុមជីហាតរដ្ឋអ៊ីស្លាមនៅស៊ីរី។ គណៈប្រតិភូតួកគី មកពីស្ថាប័នកងទ័ព ចារកិច្ច និងក្រសួងការបរទេស បានបំពេញទស្សនកិច្ចនៅរុស្ស៊ី ហើយបានពិភាក្សាជាមួយថ្នាក់ដឹកនាំរុស្ស៊ី ពីវិបត្តិសង្គ្រាមស៊ីរី។
តួកគីនិងរុស្ស៊ីមានទស្សនៈផ្សេងគ្នា ចំពោះវិបត្តិស៊ីរី។ រុស្ស៊ីគាំទ្រលោកអាសាដ តែតួកគីមិនចង់ឃើញលោកអាសាដ បន្តអំណាចនៅស៊ីរីទេ។ សម្រាប់តួកគី រដ្ឋាភិបាលស៊ីរីបានសម្លាប់មនុស្សរាប់សែននាក់ មិនអាចដឹកនាំប្រទេសទេ។ តែតួកគីប្រាប់ថា ខ្លួនក៏មិនចង់បោះបង់ចោលកិច្ចពិភាក្សាវិបត្តិស៊ីរីជាមួយរុស្ស៊ីដែរ។
សប្តាហ៍នេះ ប្រធានាធិបតីអ៊ែរដូហ្កាន បានបំពេញទស្សនកិច្ចនៅក្រុងសាំង ភីតថឺស្បួ ដើម្បីស្តារទំនាក៉ទំនងជាមួយរុស្ស៊ីឡើងវិញ។ ទំនាក់ទំនងតួកគីនិងរុស្ស៊ី បានធ្លាក់ដុនដាប ចាប់ពីខែវិច្ឆិកា ឆ្នាំ២០១៥ ក្រោយពេលទាហានតួកគីបាញ់ទំលាក់យន្តហោះមួយគ្រឿងរបស់រុស្ស៊ី។
យោងតាមរដ្ឋមន្ត្រីការបរទេសតួកគី ប្រតិបត្តិការធ្វើឡើងរួមគ្នារវាងតួកគីនិងរុស្ស៊ី ដើម្បីកំចាត់ក្រុមភេរវជនរដ្ឋអ៊ីស្លាម អាចជួយបញ្ចៀសមិនអោយមានហេតុការណ៍ បែបយ៉ាងការបាញ់ទំលាក់យន្តហោះរុស្ស៊ីកាលពីឆ្នាំមុននោះ មិនអោយបញ្ហាបែបនេះកើតឡើងបានទៀត។
ទាក់ទងស្ថានភាពនៅស៊ីរី រុស្ស៊ីបានប្រកាសព្យួរការទំលាក់គ្រាប់បែក នៅជុំវិញក្រុងអាឡិប៣ម៉ោងក្នុងមួយថ្ងៃ ហើយ៣ម៉ោងនេះធ្វើឡើងនៅពេលព្រឹក។ ជនរងគ្រោះដោយគ្រាប់បែកគ្រាប់កាំភ្លើងនៅអាឡិប ពិបាកនឹងទទួលបានការព្យាបាលត្រឹមត្រូវ។ថ្ងៃព្រហស្បតិ៍នេះ ក្រុមគ្រូពេទ្យនៅ ភាគខាងកើតក្រុងអាឡិបដែលស្ថិតក្នុងតំបន់គ្រប់គ្រងរបស់ក្រុមឧទ្ទាម បានសរសេរលិខិតសុំជំនួយពីប្រធានាធិបតីអាមេរិក លោកអូបាម៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ