អារ៉ាប៊ីសាអូឌីត ត្រៀមខ្លួនធ្វើកំណែទម្រង់សេដ្ឋកិច្ច ខណៈដែលចំណូលពីប្រេងកាន់តែចុះថយ
ចុះផ្សាយនៅថ្ងៃ៖
ស្តាប់ - ០៤:៤៧
អារ៉ាប៊ីសាអូឌីត គឺជាមហាសេដ្ឋីប្រេងកាត ធំជាងគេបង្អស់ នៅតំបន់អារ៉ាប់ឈូងសមុទ្រ។ ប៉ុន្តែពីរឆ្នាំមកនេះ ជាមួយនឹងតម្លៃប្រេងឆៅដែលបានចុះដល់ទៅ៧០% បានធ្វើឲ្យចំណូលតែមួយគត់ប្រទេសនេះ ធ្លាក់ចុះ ដែលធ្វើឲ្យថ្នាក់ដឹកនាំមានការព្រួយបារម្ភ ពីវាសនាសេដ្ឋកិច្ចរបស់ខ្លួន។ កំណែទម្រង់សេដ្ឋកិច្ច ដើម្បីស្វែងរកប្រភពចំណូលផ្សេងទៀត ត្រូវតែធ្វើជាបន្ទាន់។ តែទន្ទឹមគ្នានេះ គឺគ្រប់គ្នា ដែលធ្លាប់តែសោយសុខក្នុងគំនរមាសរាប់សិបឆ្នាំមកនេះ ត្រូវមានការអត់ធ្មត់ ព្រោះកំណែទម្រង់សេដ្ឋកិច្ចអាចចំណាយច្រើន ត្រូវការពេលវេលាយូរ មុននឹងបានទទួលជោគជ័យ។
ឆ្នាំ២០១៦ ចំណូលបានពីប្រេងនឹងថយចុះ១០០ពាន់លានដុល្លារ៖
យោងតាមការប្រកាសរបស់មូលនិធិរូបិយវត្ថុអន្តរជាតិ FMI កំណើនសេដ្ឋកិច្ចសម្រាប់ប្រទេសមហាសេដ្ឋីប្រេងទាំង៦ ក្នុងតំបន់ឈូងសមុទ្រពែក្ស នៅឆ្នាំ២០១៦នេះ មានប្រមាណតែ១,៨%ប៉ុណ្ណោះ បើប្រៀបធៀបទៅឆ្នាំមុន ដែលមាន៣,៣%។ សម្រាប់អារ៉ាប៊ីសាអូឌីត រាជាណាចក្រមហាសេដ្ឋីប្រេងធំជាងគេក្នុងតំបន់ នឹងមានកំណើនសេដ្ឋកិច្ចតែប្រមាណជា១,២% ប៉ុណ្ណោះ។ មូលនិធិនេះ បានអំពាវនាវឲ្យប្រទេសផលិតប្រេងទាំងនោះ ត្រូវខិតខំស្វែងរកប្រភពចំណូលផ្សេងទៀត ក្រៅពីការលក់ប្រេង ហើយត្រូវកាត់បន្ថយការចំណាយសាធារណៈ ដើម្បីទប់ទល់នឹងចំណូលដែលបានមកពីការលក់ប្រេង កាន់តែថយចុះ។
ជាការពិត ចាប់តាំងពីឆ្នាំ២០១៤មក ប្រេងឆៅបានធ្លាក់ថ្លៃដល់ទៅ៧០% មកនៅត្រឹមតែប្រមាណជា៤០ដុល្លារ ក្នុងមួយធុងបារីលប៉ុណ្ណោះ បច្ចុប្បន្ននេះ។ យោងតាមអ្នកជំនាញ តម្លៃថោកនេះ អាចនឹងនៅបន្តទៅមុខទៀត ហើយបើសិនជាឡើង ក៏មិនអាចឡើងលើសពី៥០ដុល្លារដែរ។ យោងតាម តួលេខរបស់FMI ក្នុងបណ្តាប្រទេសផលិតប្រេងទាំង៦ សមាជិកក្រុមប្រឹក្សាឈូងសមុទ្រ ក្នុងឆ្នាំ២០១៦នេះ អាចនឹងបាត់បង់ចំណូលរហូតដល់ ១០០ពាន់លានដុល្លារ។
ភ្ញាក់ខ្លួនទាន់មិនទាន់យើតពេល៖
ខុសពីបណ្តាប្រទេសដ៏ទៃទៀតក្នុងតំបន់ ដូចជាប្រទេសកាតា រឺអេមៀរ៉ាតអារ៉ាប់រួម ដែលប្រទេសទាំងពីរនេះ ខិតខំធ្វើកំណែទម្រង់សេដ្ឋកិច្ច និងធ្វើវិនិយោគជាមួយនឹងទីផ្សារអន្តរជាតិ ចំលែកតែអារ៉ាប៊ីសាអូឌីត ដែលមានសេដ្ឋកិច្ចបិទជិត ហើយរំពឹងទាំងស្រុងតែនឹងចំណូលដែលបានមកពីការលក់ប្រេងឆៅតែប៉ុណ្ណោះ។ ថ្វីត្បិតតែមានចរន្តទាមទារឲ្យមានកំណែទម្រង់ តែកន្លងមក គ្មានវិធានការអ្វីមួយត្រូវបានគេដាក់ចុះឲ្យបានម៉ដ្ឋចត់ទេ។ ក្រុមគ្រួសារស្តេចអារ៉ាប៊ីសាអូឌីត និងមន្ត្រីអ្នកគាំទ្រខ្លួន ហាក់ងប់ងុល នឹងភាពស្រណុកសុខស្រួល មាសប្រាក់គរដូចភ្នំ ដែលបានមកពីការលក់ប្រេង។ ប៉ុន្តែកាលៈទេសៈ នាពេលនេះបានផ្លាស់ប្តូរ តម្លៃប្រេងឆៅធ្លាក់ចុះជាគំហុគ ជាងនេះទៅទៀត ជាមួយនឹងការវិលត្រលប់មកវិញនៃអ៊ីរ៉ង់ មកក្នុងទីផ្សារលក់ប្រេង គឺរឹតតែធ្វើឲ្យអារ៉ាប៊ីសាអូឌីត បាត់បង់លាភសក្ការៈ កាន់តែខ្លាំង។
ពេលវេលាដល់ហើយ ដល់ពេលដែលអារ៉ាប៊ីសាអូឌីត ត្រូវបើកភ្នែកសម្លឹងមើលអនាគតនៃសេដ្ឋកិច្ចខ្លួនហើយ។ ទោះបីជាគ្រប់គ្នាមិនយល់ដូច្នេះក៏ដោយ តែយ៉ាងណា នេះជាការយល់ឃើញរបស់ព្រះអង្គម្ចាស់ មូហាម៉េដ បេន សាល់ម៉ាន់ ដែលជាមនុស្សដ៏សំខាន់ម្នាក់ ក្នុងក្រុមគ្រួសារព្រះញាតិវង្ស នៃរាជវង្សសាល់ម៉ាន់ របស់អារ៉ាប៊ីសាអូឌីត។
កំណែទំរង់ របស់ព្រះអង្គម្ចាស់ម៉ូហាម៉េដ បេន សាល់ម៉ាន់៖
កាលពីថ្ងៃចន្ទទី២៥មេសា គម្រោងកំណែទម្រង់សេដ្ឋកិច្ច ដ៏អង់អាចក្លាហានរបស់ព្រះអង្គម្ចាស់ ម៉ូហាម៉េដ បេន សាល់ម៉ាន់ ត្រូវបានប្រកាសឲ្យដឹងជាសាធារណៈ។ គម្រោងកំណែទំរង់នេះ សង្កត់ធ្ងន់ទៅលើការរំដោះភាគហ៊ុនប្រមាណជា៥% នៃក្រុមហ៊ុនជាតិផលិតប្រេងអារ៉ាប៊ីសាអូឌីត ឈ្មោះថា Aramco ដើម្បីលក់ទៅឲ្យទីផ្សារអន្តរជាតិ។ បន្ទាប់មកទៀត ភាគហ៊ុននេះ នឹងយកទៅបង្កើតជាមូលនិធិឯករាជ្យដាច់ដោយឡែកមួយ មានទឹកប្រាក់ស្មើនឹង ២០០០ពាន់លានដុល្លារ។ ប្រាក់នេះ នឹងអាចអនុញ្ញាតិ ឲ្យអារ៉ាប៊ីសាអូឌីត ធ្វើវិនិយោគ ទិញនឹងលក់នៅលើទីផ្សារអន្តរជាតិបាន ដើម្បីយកចំណេញ។
ក្រៅពីនេះ ព្រះអង្គម្ចាស់ម៉ូហាម៉េដ បេន សាល់ម៉ាន់ មានគម្រោង បង្កើតប្រព័ន្ធពន្ធដាពន្ធលើតម្លៃបន្ថែម TVA ហើយធ្វើយ៉ាងណាតម្លើងការចំណាយរបស់ប្រជាជន ទៅក្នុងវិស័យកម្សាន្តសប្បាយ វិស័យទេសចរណ៍ជាដើម។ បន្ថែមពីនេះទៀត លោកបានស្នើរសុំឲ្យមានការធ្វើកំណែទំរង់ស៊ីជំរៅក្នុងវិស័យអប់រំ អភិវឌ្ឍន៍វិស័យឧស្សាហកម្មយោធា និងការធ្វើឯកជនភាវូបនីយកម្ម ផងដែរ។
ឧបសគ្គ តែមានសុទិដ្ឋិនិយម៖
សួរថា តើព្រះអង្គម្ចាស់មួយរូប ដែលទើបតែមានវ័យ៣០ឆ្នាំ នេះ អាចធ្វើការងារដ៏មហិមានេះបានសម្រេចដែររឺទេ? ហើយតើមានអ្នកណាខ្លះគាំទ្រគម្រោងនេះ នៅក្នុងបណ្តុំក្រុមគ្រួសារព្រះញាត្តិវង្សអារ៉ាប៊ីសាអូឌីត? បើក្រលេកមើលមួយភ្លែត វាជាដំណឹងមួយដ៏ល្អណាស់ ព្រោះអារ៉ាប៊ីសាអូឌីត ពិតជាត្រូវការកំណែទម្រង់ច្បាស់លាស់មែន។ ក្រុមគ្រួសារស្តេចអារ៉ាប៊ីសាអូឌីត មិនអាចបន្តឱបក្រសោបចំណូលរដ្ឋ ដែលបានមកពីការលក់ប្រេងតែម្នាក់ឯងបានទេ។ ក៏ប៉ុន្តែផែនការកំណែទម្រង់ទាំងអស់នេះ ពិតជាមិនអាចធ្វើទៅបាន ដោយងាយទេ។ ឧបសគ្គមួយរយជំពូកកំពុងតែរងចាំ។ កាលៈទេសៈនេះ គឺជាកាលៈទេសៈដែលអារ៉ាប៊ីសាអូឌីត ត្រូវធ្វើគ្រប់យ៉ាង ដើម្បីបង្ហាញគេថា ខ្លួននឹងរួបរួមគ្នា ខ្លួនមានចិត្តអត់ធ្មត់ក្នុងការធ្វើកំណែទម្រង់។
ក្រុមគ្រួសារស្តេចអារ៉ាប៊ីសាអូឌីតទាំងអស់ ព្រះអង្គម្ចាស់ មហាសេដ្ឋីនានា ដែលធ្លាប់តែសោយសុខ តើគេអាចសុខចិត្តបាត់បង់ផលប្រយោជន៍របស់គេដែររឺទេ? នយោបាយផ្ទៃក្នុងរបស់អារ៉ាប៊ីសាអូឌីត អាចនឹងជួបភាពរង្គោះរង្គើរ ដោយសារតែមានអ្នកគាំទ្រកំណែទម្រង់ និងមានអ្នកក្រាញននាលចង់បន្តដេកលើគំនរមាសតទៅទៀត។
តាមពិតទៅ កំណែទម្រង់សេដ្ឋកិច្ចនេះ អារ៉ាប៊ីសាអូឌីត គួរណាតែធ្វើយូរណាស់មកហើយ ក្នុងពេលដែលខ្លួនកំពុងសំបូរប្រាក់ហូរចូលដូចទឹក ដែលកាលជំនាន់នោះប្រេងមួយធុងបារីសបានថ្លៃដល់ទៅ១៥០ដុល្លារ។ តែយ៉ាងណាក៏ដោយ បើធ្វើពេលនេះក៏វាប្រសើរជាងមិនធ្វើដែរ។ អ្នកជំនាញមួយចំនួន ដែលតាមដានស្ថានភាពសេដ្ឋកិច្ចរបស់អារ៉ាប៊ីសាអូឌីត មានសុទិដ្ឋិនិយមច្រើន ជុំវិញកំណែទម្រង់របៀបនេះ បើយើងក្រលេកមើល ទៅលើបទពិសោធន៍ល្អ របស់ប្រទេសក្បែរខាង ដូចជាកាតា និងអេមៀរ៉ាតអារ៉ាប់រួម។ តែអ្វីៗ ស្ថិតនៅលើក្រុមគ្រួសាររាជវង្សសាលម៉ាន់ ថាតើពួកគេសាមគ្គីគ្នា គិតពីប្រយោជន៍រួមកំរឹតណា!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ