វត្តមានដ៏ទើសទ័លរបស់លោកអូបាម៉ា ក្នុងកិច្ចប្រជុំប្រទេសឈូងសមុទ្រ
ថ្ងៃព្រហស្បត្តិ៍ទី ២១ មេសា នេះ មានបើកកិច្ចប្រជុំកំពូលមួយ នៃក្រុមប្រឹក្សាប្រទេសឈូងសមុទ្រ ដែលសុទ្ធតែជាប្រទេសផលិតប្រេងតំបន់អារ៉ាប់ ដូចជាអេមៀរ៉ា-អារ៉ាប់រួម អារ៉ាប៊ីសាអូឌីត អូម៉ង់ កូវ៉ែត បារ៉ែន និងកាតា ហើយដែលមានវត្តមានលោកអូបាម៉ាផងដែរ។ កិច្ចប្រជុំនេះ គឺផ្តោតសំខាន់ទៅលើជាពិសេសស្ថានការជម្លោះបច្ចុប្បន្ន នៅក្នុងតំបន់ដើមបូព៌ា និងវិបត្តិតម្លៃប្រេងឆៅ ដែលនៅតែមិនទាន់មានដំណោះស្រាយ។ វត្តមានរបស់លោក អូបាម៉ា ហាក់ដូចជាមិនសូវធ្វើឲ្យប្រទេសអារ៉ាប់ស៊ុនីតទាំង៦នេះ សប្បាយចិត្តប៉ុន្មានទេ បន្ទាប់ពីសហរដ្ឋអាមេរិក បានបើកទ្វារទំនាក់ទំនងជាមួយអ៊ីរ៉ង់ ដែលប្រទេសអ៊ីស្លាមឈីអ៊ីត មេគេក្នុងតំបន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៥៧
លោកអូបាម៉ាធ្វើមុខក្រាស៖
វត្តមានរបស់លោកអូបាម៉ា នៅទីក្រុងរីយ៉ាដ រដ្ឋធានីអារ៉ាប៊ីសាអូឌីត ថ្ងៃនេះ មានលក្ខណៈខុសពីសព្វមួយដង ដែលធ្វើឲ្យគេគ្រប់គ្នាឃើញនឹងភ្នែកតែម្តងថា លោកអូបាម៉ា មិនសូវត្រូវបានគេស្វាគមន៍ខ្លាំងក្លាប៉ុន្មានទេ នៅក្នុងជំនួបកំពូលនេះ។
តាមធម្មតា ព្រះចៅសាលម៉ាន់ ត្រូវទៅទទួលប្រធានាធិបតីអាមេរិក ដល់ជើងជណ្តើរយន្តហោះតែម្តង ហើយដំណើរមកដល់នេះ ក៏ត្រូវធ្វើការផ្សាយបន្តផ្ទាល់ តាមទូរទស្សន៍ជាតិ របស់អារ៉ាប៊ីសាអូឌីតដែរ។ ក៏ប៉ុន្តែលើកនេះ គឺស្ងាត់ឲ្យសូន្យតែម្តង។ ស្តេចអារ៉ាប៊ីសាអូឌីត មិនបានទៅទទួលលោកអូបាម៉ាទេ ហើយក៏អត់មានផ្សាយបន្តផ្តាល់ តាមទូរទស្សន៍ដែរ។
នៅថ្ងៃព្រហស្បតិ៍នេះ ព្រះចៅសាលម៉ាន់ បានអនុញ្ញាតិឲ្យលោកអូបាម៉ា ចូលគាល់រយៈពេលប្រហែល២ម៉ោង មុននឹងចាប់ផ្តើមបើកកិច្ចប្រជុំក្រុមប្រឹក្សាប្រទេសអារ៉ាប់ឈូងសមុទ្រ ដែលមានទាំងអស់៦ប្រទេស ៖ អារ៉ាប៊ីសាអូឌីត អេមៀរ៉ា-អារ៉ាប់រួម អូម៉ង់ កូវ៉ែត បារ៉ែន និងកាតា។ នេះគឺជាលើកទីមួយហើយ សម្រាប់លោកអូបាម៉ា ដែលចូលរួមក្នុងជំនួបកំពូលនៃក្រុមប្រឹក្សានេះ។ កាលៈទេសៈនេះ លោកអូបាម៉ា កំពុងធ្វើមុខក្រាស បើយើងនិយាយឲ្យតាមត្រង់ ព្រោះអីគេមិនសូវជាពេញចិត្តគាត់ទេ តែគាត់ត្រូវបង្ខំចិត្តទៅ ដើម្បីទីមួយពន្យល់គេឲ្យយល់ ថាត្រូវជួយគ្នាដោះស្រាយបញ្ចប់សង្រ្គាមក្នុងតំបន់ ហើយមួយទៀតគឺ ស្តារទំនុកចិត្ត ថាអាមេរិនៅតែជាមិត្តជាមួយក្រុមប្រទេសអារ៉ាប់ស៊ុនីតទាំងនេះ ដដែល។
អាមេរិកត្រូវការការសហការពីក្រុមប្រទេសស៊ុនីត ដើម្បីកម្ទេចក្រុមជីហាដជ្រុលនិយម៖
កម្មវត្ថុរបស់សហរដ្ឋអាមេរិក គឺចង់បានការចូលរួមឲ្យសកម្ម ពីសំណាក់ប្រទេសអារ៉ាប់ស៊ុនីតទាំង៦នេះ។ ការចូលរួមនេះ គឺទីមួយចូលរួមប្រើឥទ្ធិពលទៅលើភាគីជម្លោះនានា ដើម្បីបញ្ចប់សង្រ្គាម ហើយបន្ទាប់មកទៀត នាំគ្នាផ្តោតសកម្មភាពចំបងទៅលើការកម្ទេចបណ្តាញជីហាដជ្រុលនិយម ដែលជាសត្រូវរបស់ទាំងអស់គ្នា មិនថាសាសនាអ៊ីស្លាមនិកាយអ្វីទេ។
ក្នុងរយៈពេលចុងក្រោយនេះ អន្តរាគមន៍របស់កងទ័ពអាមេរិកនៅអ៊ីរ៉ាក់ បានហុចផលបានច្រើន។ ក្នុងពេលនេះ លោកអូបាម៉ា បានប្រកាសថាអាមេរិកនឹងប្រឹងប្រែងជួយកងទ័ពអ៊ីរ៉ាក់ទៀត តាមរយៈការបន្ថែមកម្លាំងពិសេស ២២០នាក់ និងឧត្ថម្ភាគចក្រចម្បាំង ជាច្រើនគ្រឿង ដើម្បីធ្វើយ៉ាងណាជួយកងទ័ពអ៊ីរ៉ាក់ ឲ្យដណ្តើមយកក្រុងមូស៊ូលមកវិញឲ្យបាន។
ស្ថិតក្នុងកម្មវត្ថុជួយអ៊ីរ៉ាក់ដដែលនេះ សហរដ្ឋអាមេរិក ចង់ឲ្យប្រទេសអារ៉ាប់ស៊ុនីតទាំង៦នេះ មិនគ្រាន់តែចូលរួមក្នុងវិស័យយោធាតែមួយមុខទេ តែត្រូវចូលរួមក្នុងវិស័យនយោបាយ រួមទាំងសេដ្ឋកិច្ចផងដែរ ដើម្បីជួយស្តារ និងកាសាងប្រទេសអ៊ីរ៉ាក់ឡើងវិញ។ ដូចគ្នាដែរ ជុំវិញសង្រ្គាមនៅយេមែន និងនៅស៊ីរី ក្រុមប្រទេសអារ៉ាប់ស៊ុនីតទាំង៦នេះ មានតួនាទីសំខាន់ណាស់ ក្នុងការបញ្ចុះបញ្ចូលភាគីជម្លោះ ឲ្យដាក់អាវុធ។
លោក រ៉ុប ម៉ាលៃ ទីប្រឹក្សាផ្ទាល់របស់លោកអូបាម៉ា បានមានប្រសាសន៍ថា សហរដ្ឋអាមេរិកចង់ឲ្យប្រទេសអារ៉ាប់បញ្ចប់សង្រ្គាមរវាងនិកាយនិងនិកាយ ហើយងៀកមកធ្វើសង្រ្គាមជាមួយពួកភេរវកម្មជ្រុលនិយម ដែលជាក្រុមជីហាដអង្គការរដ្ឋអ៊ីស្លាម និងក្រុមអាល់កាយដា ជាដើម។ ក្រុមទាំងពីរនេះហើយ ដែលកំពុងតែបំផ្លាញស្ថិរភាព និងសន្តិភាពនៅតំបន់ដើមបូព៌ា។
កែវដែលប្រេះស្រាំ មិនអាចបិទផ្គុំឲ្យដូចដើមបានទេ៖
តំបន់ដើមបូព៌ា ទាំងមូលត្រូវពុះចែកជាពីរ ទីមួយគឺក្រុមស៊ុនីត ដែលដឹកនាំដោយអារ៉ាប៊ីសាអូឌីត និងទីពីរគឺក្រុមឈីអ៊ីត ដែលដឹកនាំដោយអ៊ីរ៉ង់។ ការប្រជែងឥទ្ធិពលរវាងអារ៉ាប៊ីសាអូឌីត និងអ៊ីរ៉ង់ មិនអាចបញ្ចប់ទៅងាយៗបានទេ។
តែយ៉ាងណាក៏ដោយ យើងកុំភ្លេចថា សហរដ្ឋអាមេរិក ធ្លាប់ជាសម្ព័ន្ធមិត្តល្អូកល្អឺន របស់អារ៉ាប៊ីសាអូឌីត ព្រមទាំងប្រទេសស៊ុនីតដ៏ទៃទៀត។ សហរដ្ឋអាមេរិក បើកផ្លូវឲ្យអ៊ីរ៉ង់ពេលនេះមែន តែមិនមែនមានន័យថា អាមេរិក និងអ៊ីរ៉ង់ ក្លាយជាមិត្តនឹងគ្នាទេ។ សហរដ្ឋអាមេរិក នៅតែប្រយ័ត្នជាប់ជានិច្ច ទាក់ទិននឹងមហិច្ឆិតារបស់អ៊ីរ៉ង់។ ត្រង់នេះហើយបានជាលោកអូបាម៉ា ទៅថ្ងៃនេះដើម្បីសម្តែងប្រាប់ក្រុមប្រទេសស៊ុនីតឲ្យយល់។
ក្រុមប្រទេសអារ៉ាប់តំបន់ឈូងសមុទ្រ បានសំណូមពរឲ្យអាមេរិក ចុះហត្ថលេខាជាមួយពួកគេលើកិច្ចព្រមព្រាងសហប្រតិបត្តិការយោធា ដោយយកគម្រូតាមកិច្ចព្រមព្រាងរបស់អូតង់ តែអាមេរិកបានបដិសេធមិនគាំទ្រសំណើរនេះទេ។ ប៉ុន្តែ ដើម្បីយកចិត្តក្រុមប្រទេសអារ៉ាប់ស៊ុនិត សហរដ្ឋអាមេរិក ទើបតែបើកភ្លើងខៀវលក់សម្ភារៈយោធា និងអាវុធសរុបទឹកប្រាក់ទាំងអស់ ៣៣ពាន់លានដុល្លារ។ ជាមួយគ្នានេះ កងទ័ពអាមេរិក មានគម្រោងធ្វើសមយុទ្ធយោធារួមគ្នា ក្នុងឈូងសមុទ្រផងដែរ។ បន្តែទន្ទឹមនឹងនេះ លោកអូបាម៉ា គាត់នៅតែព្យាយាមការពារទ្រឹស្តីនយោបាយរបស់គាត់ គឺនយោបាយសនិ្តភាពនិយម មិនកាន់ជើងខាងណា ខ្លាំងជ្រុលពេកនោះទេ។
អតីតប្រធានក្រុមស៊ើបការណ៍សំងាត់របស់អារ៉ាប៊ីសាអូឌីត ម្នាក់ បាននិយាយក្នុងបទសម្ភាសន៍ជាមួយទូរទស្សន៍CNN ថា នយោបាយលោកអូបាម៉ា បានធ្វើឲ្យអារ៉ាប៊ីសាអូឌីត បានភ្លឺភ្នែក។ ចាប់ពីពេលនេះទៅ អារ៉ាប៊ីសាអូឌីត ត្រូវរកវិធីផ្សេង ដោយមិនអាចរំពឹងតែទៅលើអាមេរិក ដូចពីមុនទៀតទេ។ ប៉ុន្តែបើយោងតាមអ្នកវិភាគជាច្រើន ដែលបានសម្លឹងឃើញពីកាយវិការសោះអង្គើយរបស់មេដឹកនាំអារ៉ាប៊ីសាអូឌីត ចំពោះលោកអូបាម៉ានាពេលនេះ គឺធ្វើឲ្យគេយល់ថា បញ្ហាមកពីគេនៅអន់ចិត្តជាមួយអាមេរិក ជុំវិញបញ្ហាអ៊ីរ៉ង់ ជាចំណុចមួយ តែចំណុចមួយទៀត គឺថាអាណត្តិលោកអូបាម៉ា នឹងត្រូវចប់នៅចុងឆ្នាំនេះហើយ។ ដូច្នេះ លោកអូបាម៉ា លែងមានសារៈសំខាន់ទៀតហើយ នៅក្នុងក្រសែរភ្នែកអារ៉ាប៊ីសាអូឌីត។ ពីពេលនេះទៅ គឺគេសម្លឹងទៅចាប់អនាគតប្រធានាធិបតីថ្មី របស់អាមេរិកទៅវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ