រដ្ឋអំណាច ប៉ាលេស្ទីននឹងដាក់ពាក្យសុំចូលជាសមាជិក អ.ស.ប.
លោកប្រធានរដ្ឋអំណាចប៉ាលេស្ទីននឹងដាក់ពាក្យសុំឲ្យរដ្ឋប៉ាលេស្ទីនទាំងមូល ចូលជាសមាជិក អ.ស.ប.នៅថ្ងៃ២០កញ្ញាខាងមុខនេះ។ លោក Mahmoud Abbas នឹងប្រគល់ពាក្យសុំជាលាយលក្សអក្សររបស់ខ្លួនជូនផ្ទាល់ដៃលោកអគ្គលេខាធិការ អ.ស.ប. បានគីមូន។ ប៉ុន្តែ អ.ស.ប.ពុំស្វាគមសោះឡើយ ចំពោះពាក្យសុំរបស់ប៉ាលេស្ទីននេះ។ រដ្ឋអំណាចប៉ាលេស្ទីន មាន១៣០ប្រទេសគាំទ្រខ្លួន ប៉ុន្តែគឺនៅក្រុមប្រឹក្សាសន្តិសុខ ទេតើដែលការជំទាស់ពីខាងស.រ.អា.នឹងចោទបំផុសឡើងជាបញ្ហា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
នៅក្នុងរបៀងក្បែរសាលប្រជុំរបស់ អ.ស.ប. អ្នកការទូតនានាពុំលាក់បាំងទេនូវការទើសទាល់ក្នុងចិត្តរបស់ខ្លួនស្តីពី ទស្សនវិស័យនៃការបោះឆ្នោតបញ្ចេញមតិទាក់ទងនឹងសំណូមពរប៉ាលេស្ទីន។ ដោយត្រូវគេជជីកសួរចង់ដឹងតើគាត់នឹងគាំទ្រពាក្យសុំរបស់ប៉ាលេស្ទីនឬទេ លោកបានគីមូន ចេះតែចៀសវាងសំណួរបែបនេះនិងឆ្លើយថាគាត់ជ្រើសរើសយកការចរចាឡើងវិញ។
ឯកអគ្គរដ្ឋទូតអឺរ៉ូបនានា មានការទើសទាល់ក្នុងចិត្តមិនដាច់ស្រេចក្នុងចិត្ត និងប្រមើលទុក”រឿងកំសត់”មួយប្រសិនបើភាគីប៉ាលេស្ទីន នៅតែជំនះរហូតដល់ទីបញ្ចប់។ ពួកប៉ាលេស្ទីន ប្រាកដក្នុងចិត្តចំពោះការគាំទ្រពីខាង១៣០ប្រទេស ហើយបា្រកដជានឹងគ្មានការពិបាកអ្វីទេនៅចំពោះមុខមហាសន្និបាត អ.ស.ប. ។
ក៏ប៉ុន្តែ នៅក្រុមប្រឹក្សាសន្តិសុខ សហរដ្ឋអាមេរិកនឹងប្រើសិទ្ធិជំទាស់របស់ខ្លួន ហើយសំណើសុំចូលជាសមាជិក អ.ស.ប.នឹងត្រូវបដិសេធទាត់ចោល។ រូបភាព,កេរ្តិ៍ឈ្មោះ អ.ស.ប.ប្រហែលអាចនឹងទទួលរងការខូចខាតពីបរាជ័យនេះ ហើយទំនាក់ទំនងរវាង ស.រ.អា.និងប៉ាលេស្ទីន នឹងត្រូវត្រជាក់ស្រឺតយូរអង្វែង។ ហេតុនេះហើយបានជាលេចចេញគំនិតសាកល្បងធ្វើឲ្យប៉ាលេស្ទីនព្រមទទួលយកការលើកតម្កើងលក្ខន្តិកៈខ្លួន ជាអ្នកសង្កេតការណ៍និងពាក្យសន្យាចរចាជាថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ