ប្រទេសមហាអំណាចមិនស្របគ្នា ពីវាសនារបស់បាឆា អាល់អាសាដ
ចុះផ្សាយនៅថ្ងៃ៖
ស្តាប់ - ០៤:៣៨
ដំណោះស្រាយពន្លត់ភ្លើងសង្រ្គាមនៅស៊ីរី គឺជាមធ្យោបាយដែលត្រូវតែស្វែងរកឲ្យកាន់តែឆាប់បំផុត ដើម្បីស្តារស្ថិរភាពតំបន់ដើមបូព៌ា និង ទប់ស្កាត់ចំណាកស្រុករបស់ប្រជាជនស៊ីរីទៅកាន់ទ្វីបអឺរ៉ុប។ ក៏ប៉ុន្តែ ការកម្ទេចក្រុមជីហាដនៅស៊ីរី បានក្លាយជាឆាកប្រកួតនយោបាយគ្នា រវាងប្រទេសមហាអំណាច ដែលម្ខាងមានរុស្ស៊ី និងអ៊ីរ៉ង់ និងម្ខាងទៀត មានសហរដ្ឋអាមេរិក និងក្រុមប្រទេសអឺរ៉ុប។ មិនចុះសម្រុងគ្នា គឺនៅត្រង់វាសនារបស់មេដឹកនាំផ្តាច់ការស៊ីរី លោក បាឆាអាល់អាសាដ ដែលរុស្ស៊ីនិងអ៊ីរ៉ង់ ព្យាយាមការពារ តែចំណែកសហរដ្ឋអាមេរិក និងសហភាពអឺរ៉ុប ទាមទារឲ្យបាឆា អាល់អាសាដចុះចេញពីតំណែង។
ចាប់តាំងពីដើមខែកញ្ញានេះ រុស្សីបានចេញមុខចេញមាត់ ជាផ្លូវការ ក្នុងការការពាររបបផ្តាច់ការស៊ីរី ដឹកនាំដោយ បាឆា អាល់អាសាដ ដែលនៅក្រាញននាលនឹងអំណាច តាមរយៈការបញ្ជូនជំនួយសព្វាវុធ ទាហាន និងបរិក្ខាជាច្រើន ទៅជួយទាហានស៊ីរី។ ដូចគ្នាដែរ អ៊ីរ៉ង់ ដែលជាដៃគូសម្ព័ន្ធមិត្តរបស់ស៊ីរី ក៏កំពុងតែចាប់ដៃ ជាមួយរុស្ស៊ីដែរ ដើម្បីការពារលោកបាឆា អាល់អាសាដ។ អ្វីដែលប្រទេសទាំងពីរនេះអះអាងគឺ ត្រូវជួយរដ្ឋាភិបាលរបស់ស៊ីរី ដើម្បីធ្វើការកម្ទេចក្រុមជីហាដអង្គការរដ្ឋអ៊ីស្លាម។ វាគឺជាមធ្យោបាយតែមួយគត់។
ក្រុមអង្គការរដ្ឋអ៊ីស្លាម និងរបបផ្តាច់ការស៊ីរី អាក្រក់និងព្រៃផ្សៃម្យ៉ាងម្នាក់៖
ក្នុងក្រសែរភ្នែក អាមេរិក និងមហាអំណាចលោកខាងលិចផ្សេងទៀត មានបារាំង អាល្លឺម៉ង់ និងអង់គ្លេស របបផ្តាច់ការស៊ីរី ដែលដឹកនាំដោយបាឆា អាល់អាសាដ គឺវាមិនខុសពីក្រុមជីហាដអង្គការរដ្ឋអ៊ីស្លាមប៉ុន្មានទេ។ បាឆា អាល់អាសាដ បានទម្លាក់គ្រាប់បែក សម្លាប់ប្រជាជនស៊ីរីរាប់លានអ្នក ក្នុងរយៈពេល៤-៥ឆ្នាំមកនេះ។ ជនភៀសខ្លួន ស៊ីរី ដែលនាំគ្នារត់មកសុំសិទ្ធិជ្រកកោណ នៅអឺរ៉ុប គឺមិនមែនរត់គេចពីក្រុមជីហាដ តែមួយមុខទេ គឺគេរត់គេចពីរបបផ្តាច់ការ កាប់សម្លាប់ ដែលដឹកនាំដោយបាឆា អាល់អាសាដនេះឯង។ តាំងតែពីមានជម្លោះផ្ទុះសង្រ្គាមនៅស៊ិរី អាមេរិក និងមហាអំណាចអឺរ៉ុប ទាមទារជានិច្ចថា បាឆា អាល់អាសាដ ត្រូវចុះចេញពីដំណែង ដោយគ្មានលក្ខខណ្ឌអ្វីទាំងអស់។
ប៉ុន្តែសម្រាប់ពេលនេះ អ្វីៗហាក់កំពុងតែប្រែប្រួល។ មហាសន្និបាតអង្គការសហប្រជាជាតិ កំពុងតែធ្វើឡើងនៅក្រុងញូយ៉ក ជាទីដែលប្រទេសមហាអំណាចទាំងអស់ នឹងជួបនិយាយគ្នា ហើយប្រធានបទក្តៅ ជាងគេគឺ ការពន្លត់ភ្លើងសង្រ្គាមនៅស៊ីរី និងនៅអ៊ីរ៉ាក់នេះឯង។ រុស្ស៊ី និងអ៊ីរ៉ង់ បានចេញមុខជាផ្លូវការស្នើរឲ្យគេឯងធ្វើតាមខ្លួន ថា ត្រូវជួយលោកបាឆា អាល់អាសាដ ដើម្បីកម្ទេចក្រុមអង្គការរដ្ឋអ៊ីស្លាម។ ថ្ងៃចន្ទនេះ លោកពូទីន នឹងជួបជាមួយលោកបារ៉ាក់អូបាម៉ា និយាយតទល់គ្នាតែពីរនាក់។
អាមេរិក និងអឺរ៉ុប នៅរអៀសខ្លួន៖
បើយើងក្រឡេកមកមើលតថៈភាពជាក់ស្តែង គឺគ្រប់គ្នាទទួលស្គាល់ថា ក្រុមអង្គការរដ្ឋអ៊ីស្លាមគឺជាគ្រោះថ្នាក់ធំណាស់ សម្រាប់ពិភពលោកទំាងមូល។ អាទិភាពចំបងនាពេលនេះ គឺកម្ទេចក្រុមនេះឲ្យវិនាស។ តែ៤ឆ្នាំកន្លងមកនេះ តើសហរដ្ឋអាមេរិក រឺប្រទេសលោកខាងលិចផ្សេងទៀត បានធ្វើអ្វីខ្លះ ហើយបានហុចផលជាវិជ្ជមានដែររឺទេ? ចម្លើយគឺអត់សោះ។ ផ្ទុយទៅវិញ ចំនួនកម្លាំងប្រយុទ្ធរបស់ក្រុមជីហាដ បានកើនឡើងកាន់តែច្រើន។ តាមតួលេខចុងក្រោយ អ្នកស្ម័គ្រចិត្តបរទេស មកពីបណ្តាប្រទេសផ្សេងៗ បានចូលទៅបំរើក្រុមព្រៃផ្សៃនេះ បានកើនឡើងមួយទ្វេរជាពីរ ក្នុងឆ្នាំ២០១៥នេះ គឺស្មើ៣ម៉ឺននាក់។
ចំណុចទាំងនេះហើយ ដែលកំពុងតែធ្វើឲ្យសហរដ្ឋអាមេរិក ក៏ដូចជាមហាអំណាច នៅអឺរ៉ុបនាំគ្នារអៀសខ្លួន ហើយកំពុងតែបន្ទន់ឥរិយាបថ ដោយធ្វើយ៉ាងណា មិនអោយបាក់មុខ ជាមួយនឹងសំណើថ្មីរបស់រុស្ស៊ី និងអ៊ីរ៉ង់។ កុំឲ្យគេថា ស្តោះហើយលេបវិញ ធ្លាប់ទាមទារឲ្យអាសាដចេញពីតំណែង តែពេលនេះ បែរជាមកយល់ព្រម ជួយអាសាដតាមសំណើរបស់រុស្ស៊ី។
អង្ករក្លាយជាបាយ រុស្ស៊ីចាប់ផ្តើមជួយរបបស៊ីរីទៅហើយ៖
ចង់មិនចង់ពេលនេះ អង្ករវាជិតក្លាយជាបាយទៅហើយ ព្រោះថា រុស្ស៊ីបានបញ្ជូនកម្លាំង និងសម្ភារៈសន្ធឹកសន្ធាប់ទៅដល់ស៊ីរី ដើម្បីជួយទាហានរបស់លោកអាសាដទៅហើយ។ អ៊ីរ៉ាក់ និងអ៊ីរ៉ង់ បានចុះកិច្ចព្រមព្រៀងជាមួយរុស្ស៊ី កាលពីម្សិលមិញ ដើម្បីបង្កើនសហប្រតិបត្តិការយោធារួមគ្នា ក្នុងការបំបែកសំបុករបស់ក្រុមជីហាដអង្គការរដ្ឋអ៊ីស្លាម។
ពេលនេះ មិនមែនជាពេលដែលត្រូវបែកខ្ញែកគ្នា រឺ គិតរឿងមុខមាត់ទៀតទេ។ សហរដ្ឋអាមេរិក បារាំង អាល្លឺម៉ង់ និងអង់គ្លេស មិនអាចព្រងើយកន្តើយទៀតបានទេ។ ទាហានបាឆា អាល់អាសាដ ដែលមានស្រាប់នៅស៊ីរី អាចជាកម្លាំងជួរមុខ ដ៏សំខាន់ ក្នុងការកម្ទេចក្រុមជីហាដ។ លោកហាសាន់រូហ៊ីនី ប្រធានាធិបតីអ៊ីរ៉ង់ ពន្យល់ថា ការជួយទំនុកបំរុងរដ្ឋាភិបាលស៊ីរី គឺជួយពង្រឹងស៊ីរី ឲ្យមានអំណាចនយោបាយមួយខ្លាំង នៅកណ្តាល ដើម្បីធ្វើការប្រយុទ្ធជាមួយក្រុមជីហាដ ឲ្យមានប្រសិទ្ធិភាព។
ទុកបាឆាអាល់អាសាដបណ្តោះអាសន្នសិន តែត្រូវចរចាឲ្យចេញពីតំណែង នៅពេលក្រោយ?
អ្នកការទូតអាមេរិកម្នាក់បានបញ្ជាក់ថា អាមេរិកកំពុងតែសញ្ជប់សញ្ជឹង ហើយព្យាយាមស្វែងយល់ឲ្យបានច្បាស់ថា ហេតុអ្វីបានជារុស្ស៊ីចេញមុខចេញមាត់ជួយ របបផ្តាច់ការស៊ីរី? អ្វីដែលសហរដ្ឋអាមេរិកខ្លាច គឺថាក្រោយពីជួយអាសាដ វាយក្រុមជីហាដរួចរាល់ តើនឹងមានអ្វីកើតឡើងទៀត? តើត្រូវទុកអាសាដ ឲ្យនៅបន្តតំណែងទៀតរឺយ៉ាងណា?
ត្រង់ចំណុចនេះ បារាំងបានបញ្ជាក់យ៉ាងច្បាស់ថា អានាគតទៅ បាឆា អាល់អាសាដ ត្រូវតែចុះចេញពីតំណែង។ លោកស្រីអធិការបតីអាល្លឺម៉ង់ ថ្មីៗនេះ បាននិយាយ យើងប្រហែលជាត្រូវជជែកគ្នាជាមួយបាឆា អាល់អាសាដ។ ដូច្នេះតាមមើលទៅ សហរដ្ឋអាមេរិក បារាំង អាល្លឺម៉ង់ និងអង់គ្លេស កំពុងតែបត់ក្បាលមកធ្វើតាមរុស្ស៊ី រក្សាបាឆា អាល់អាសាដឲ្យកាន់តំណែងបណ្តោះអាសន្នសិន ហើយត្រូវរៀបចំឲ្យអាសាដ ចុះចេញពីតំណែងតាមសម្រួល នៅពេលក្រោយ។
ជាការពិត រុស្ស៊ីមិនមែនសុខៗ មកជួយរបបស៊ីរីទេ គេពិតជាមានមូលហេតុអ្វីមួយនៅពីក្រោយ ដែលធ្វើឲ្យអាមេរិក និងអឺរ៉ុប មិនទុកចិត្ត។ តែទោះជាយ៉ាងណា ម្នាក់ៗត្រូវតែហ៊ានលះបង់។ ក្នុងនយោបាយការបរទេស អ្វីៗក៏អាចកើតឡើងបានដែរ។ ស្រួលមិនស្រួល ទៅថ្ងៃមុខ រុស្ស៊ីព្រលែងបាឆា អាល់អាសាដចោល ក៏ថាបាន ដោយសារគេសម្លឹងឃើញប្រយោជន៍ផ្សេងទៀត។ ប៉ុន្តែសម្រាប់ពេលនេះ សត្រូវរួមរបស់យើងទាំងអស់គ្នា គឺក្រុមជីហាដ អង្គការរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ