អាមេរិកថារុស្ស៊ីបញ្ជូនយន្តហោះចម្បាំងទៅស៊ីរី
មន្រ្តីរដ្ឋាភិបាលអាមេរិកបានអះអាងកាលពីថ្ងៃសុក្រថា គេបានឃើញយន្តហោះចម្បាំងរុស្ស៊ី ចំនួន ៤គ្រឿង នៅក្នុងប្រទេសស៊ីរី។ វត្តមានកងទ័ពរុស្ស៊ីនៅស៊ីរីនេះបានធ្វើឲ្យអាមេរិកមានក្តីបារម្ភកាន់តែខ្លាំង ហើយក្រសួងការពារជាតិអាមេរិកបានឲ្យដឹងថា រដ្ឋមន្រ្តីការពារជាតិអាមេរិកបានជជែកតាមទូរស័ព្ទជាមួយរដ្ឋមន្រ្តីការពារជាតិរុស្ស៊ី កាលពីថ្ងៃសុក្រ ដើម្បីចរចាគ្នារកវិធីធ្វើយ៉ាងណាបញ្ចៀសកុំឲ្យមានការប៉ះទង្គិចគ្នា រវាងកងទ័ពរុស្ស៊ី និងកងទ័ពអាមេរិក ដែលបច្ចុប្បន្នកំពុងតែបើកធ្វើប្រតិបត្តិការផ្លូវអាកាសប្រឆាំងនឹងក្រុមជីហាតរដ្ឋអ៊ីស្លាមនៅក្នុងប្រទេសស៊ីរីដែរ។
ចុះផ្សាយនៅថ្ងៃ៖
ស្តាប់ - ០២:០៨
កិច្ចសន្ទនារវាងរដ្ឋមន្រ្តីការពារជាតិអាមេរិកនិងរុស្ស៊ី កាលពីថ្ងៃសុក្រ ថ្វីដ្បិតតែជាជំនួបតាមទូរស័ព្ទ តែវាគឺជាកិច្ចសន្ទនារវាងប្រមុខកងទ័ពលើកដំបូងបង្អស់ ដែលអាមេរិក និងរុស្ស៊ី មិនធ្លាប់ធ្វើ ចាប់តាំងពីឆ្នាំ២០១៤ ក្រោយពីមានវិបត្តិនៅអ៊ុយក្រែន។
ក្រសួងការពារជាតិរុស្ស៊ីបានធ្វើការកត់សម្គាល់ថា ជំនួបតាមទូរស័ព្ទនេះ គឺជាចំណុចចាប់ផ្តើមនៃការតភ្ជាប់ឡើងវិញនៃទំនាក់ទំនងខាងផ្នែកយោធា រវាងរុស្ស៊ី និងអាមេរិក ហើយថា កិច្ចសន្ទនាបែបនេះអាចនឹងត្រូវបន្តធ្វើនៅថ្ងៃអនាគត។ ចំណែកឯក្រសួងការពារជាតិអាមេរិកវិញ បានលើកឡើងថា គោលដៅសំខាន់នៃជំនួបតាមទូរស័ព្ទនេះ គឺគ្រាន់តែដើម្បីស្វែងយល់គ្នាទៅវិញទៅមកទាក់ទងនឹងប្រតិបត្តិការយោធានៅស៊ីរី ដើម្បីធ្វើយ៉ាងណាកុំឲ្យមានការប៉ះទង្គិចគ្នាជាយថាហេតុតែប៉ុណ្ណោះ តែមិនមែនក្នុងន័យជាការចាប់ផ្តើមកិច្ចសហប្រតិបត្តិការយោធានឹងគ្នាឡើងវិញនោះទេ។
ទោះជាយ៉ាងណា រដ្ឋាភិបាលក្រុងវ៉ាស៊ីងតោនបានអះអាងថា អាមេរិកបើកទ្វារចំហក្នុងការជជែកគ្នាស៊ីជម្រៅជាមួយរុស្ស៊ី ដើម្បីសហការគ្នាប្រយុទ្ធប្រឆាំងនឹងក្រុមជីហាតរដ្ឋអ៊ីស្លាម ក៏ប៉ុន្តែ ការជជែកគ្នានេះត្រូវតែធ្វើឡើងស្របគ្នាជាមួយនឹងការស្វែងរកដំណោះស្រាយនយោបាយបញ្ចប់សង្រ្គាមស៊ីវិលស៊ីរី។ ដំណោះស្រាយវិបត្តិនយោបាយស៊ីរី ដែលអាមេរិកនៅតែទាមទារដោយទទូចថា ត្រូវតែធ្វើឡើងដោយគ្មានលោកបាស្ហា អាល់អាសាដ។
គួរបញ្ជាក់ថា ទាក់ទងនឹងវត្តមានកងទ័ពរុស្ស៊ីនៅស៊ីរី អាមេរិកបានធ្វើការប៉ាន់ស្មានថា ក្រៅពីយន្តហោះចម្បាំង ៤គ្រឿង រុស្ស៊ីក៏បានបញ្ជូនទៅស៊ីរីផងដែរនូវឧទ្ធម្ភាគចក្រចម្បាំង រថក្រោះធុន T-90 រថពាសដែក កាំភ្លើងធំ ទាហានថ្មើរជើងរាប់រយនាក់ ព្រមទាំងគ្រឿងបរិក្ខាក្នុងការសាងសង់មូលដ្ឋានទ័ព ដែលអាចដាក់ទាហានរហូតដល់ទៅ ១៥០០នាក់។
រុស្ស៊ីវិញតែងតែអះអាងថា បុគ្គលិក និងគ្រឿងបរិក្ខាយោធា ដែលខ្លួនបញ្ជូនទៅកាន់ប្រទេសស៊ីរី គឺធ្វើឡើងក្នុងក្របខ័ណ្ឌនៃកិច្ចសន្យាយោធាទ្វេភាគីជាមួយស៊ីរីតែប៉ុណ្ណោះ ហើយថាទាហានទាំងនេះមិនមែនជាទាហានប្រយុទ្ធនោះទេ។ ក៏ប៉ុន្តែ ក្នុងពេលជាមួយគ្នា មន្រ្តីអ្នកនាំពាក្យប្រធានាធិបតីរុស្ស៊ីបានប្រាប់សារព័ត៌មានរុស្ស៊ីថា រុស្ស៊ីនឹងពិចារណាអំពីការបញ្ជូនទាហានប្រយុទ្ធទៅស៊ីរី ប្រសិនបើមានសំណើផ្លូវការពីរដ្ឋាភិបាលស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ