បារាំងចាប់ផ្តើមបើកការវាយប្រហារតាមផ្លូវអាកាស លើក្រុមជីហាដនៅស៊ីរី
នៅថ្ងៃអាទិត្យនេះ អ្នកនាំពាក្យរដ្ឋាភិបាលបារាំង បានបញ្ជាក់ថា កងទ័ពអាកាសបារាំង បានចាប់ផ្តើមធ្វើការទម្លាក់គ្រាប់បែក នៅតាមទីតាំងរបស់ក្រុមជីហាដអង្គការរដ្ឋអ៊ីស្លាម នៅក្នុងប្រទេសស៊ីរី បន្ទាប់ពីបានចេញប្រតិបតិ្តការ ហោះស៊ើបការណ៍យកព័ត៌មាន អស់រយៈពេល២សប្តាហ៍កន្លងមក។ ស្ថិតក្នុងកាលៈទេសៈអាសន្ន ដែលក្រុមជីហាដដ៏ព្រៃផ្សៃនេះ កំពុងតែគម្រាមកំហែងសន្តិសុខពិភពលោកទាំងមូល ថ្នាក់ដឹកនាំនានា មានបារាំង អាមេរិក និងរុស្ស៊ី កំពុងតែដុតដៃដុតជើង ដើម្បីស្វែងរកដំណោះស្រាយរួមមួយ ក្នុងការបោសសម្អាតក្រុមជីហាដអ៊ីស្លាម នៅតំបន់ដើមបូព៌ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៨:៣៣
កងទ័ពបារាំង បានចេញប្រតិបត្តិការទម្លាក់គ្រាប់បែក តាមយន្តហោះ ទៅលើមូលដ្ឋានរបស់ក្រុមជីហាដអង្គការរដ្ឋអ៊ីស្លាមនៅស៊ីរី។ តាមការឲ្យដឹងពីអ្នកនាំពាក្យក្រសួងការពារជាតិបារាំង បានបញ្ជាក់ថា កងទ័ពបារាំង បានធ្វើការវាយប្រហារ ទៅលើទីតាំង ដែលគេបានស្រង់យកទិន្នន័យបាន បន្ទាប់ពីបានធ្វើការហោះក្រវែល ប្រមូលយកព័ត៌មាន អស់រយៈពេល២សប្តាហ៍កន្លងមកនេះ។ ធ្វើបែបនេះ វាជាការប្រុងប្រយ័ត្ន គឺមិនមែនទម្លាក់គ្រាប់តាពីសតាពាស បង្កឲ្យស្លាប់ប្រជាជនស្លូតត្រង់ទេ។ ទោះបីជាយ៉ាងណា មកត្រឹមម៉ោងនេះ យើងនៅមិនទាន់បានទទួលព័ត៌មានច្បាស់ ស្តីពីចំណុចទិសដៅ នៃការវាយប្រហារ ក៏ដូចជាតំបន់ដែលត្រូវបានទម្លាក់គ្រាប់បែក ថានៅត្រង់ណាទេ។
វាយប្រហារតាមផ្លូវអាកាស គឺជានយោបាយ ការពារខ្លួនទុកជាមុនរបស់បារាំង៖
អ្នកនាំពាក្យវិមាន អាលីហ្ស៊េ បានបញ្ជាក់ផងដែរថា ការវាយប្រហារនេះ គឺធ្វើឡើងដោយមានការផ្តល់ដំណឹង ឲ្យគ្នាទៅវិញទៅមក ជាមួយនឹងក្រុមសម្ព័ន្ធមិត្តផ្សេងទៀត ដែលមានសហរដ្ឋអាមេរិកជាអ្នកដឹកនាំ ក៏ដូចជាបណ្តាប្រទេសក្នុងតំបន់ ដែលបានចូលរួមយ៉ាងសកម្ម ក្នុងការបោសសម្អាតក្រុមជីហាដអង្គការរដ្ឋអ៊ីស្លាម។
គួររំលឹកបន្តិចថា លោកប្រធានាធិបតីបារាំង ហ្រ្វង់ស័រ ហូឡង់ បានធ្វើការប្រកាសកាលពីថ្ងៃទី ៧ កញ្ញា កន្លងទៅថា បារាំងនឹងចាប់ផ្តើម ធ្វើការវាយប្រហារតាមផ្លូវអាកាស នៅស៊ីរីដើម្បីកម្ទេចទីតាំង មូលដ្ឋាន រឺបន្ទាយរបស់ក្រុមជីហាដអ៊ីស្លា កន្លងមក បារាំងតែងតែប្រកែកជាដាច់ខាត គឺមិនធ្វើអន្តរាគមន៍យោធា នៅស៊ីរីជាដាច់ខាត។ ទើបតែពេលនេះ ទាហានបារាំងបានចាប់ផ្តើម ធ្វើប្រតិបត្តិការតាមផ្លូវអាកាស។ ប៉ុន្តែរដ្ឋាភិបាលបារាំង បានបដិសេធ ដាច់ខាត ថានឹងមិនបញ្ជូនកងទ័ពជើងគោក ឲ្យទៅវាយនៅស៊ីរី ដោយផ្ទាល់ទេ។
បារាំងបានផ្លាស់ប្តូរចិត្ត ដោយយោងទៅលើគោលការណ៍ ថាដើម្បីការពារខ្លួន។ ការពារខ្លួន យ៉ាងម៉េចគឺថា បារាំងចង់លប់បំបាត់ចលនាភេរវកម្ម ដែលបានធ្វើឡើង រឺបានប៉ុនប៉ងធ្វើ ក្នុងទឹកដីបារំាងកន្លងមក។ ក្រុមអ្នកដែលធ្វើភេរវកម្មទាំងនេះ គឺសុទ្ធសឹងជាក្រុមជីហាដ ដែលបានទទួលការបណ្តុះបណ្តាល បំពាក់បំប៉នស្មារតី នៅស៊ីរី។ ដូចប្រសាសន៍លោកហ្រ្វង់ស័រហូឡង់ បានប្រកាស កាលពីថ្ងៃទី ៧កញ្ញា លោកថា បារាំងនឹងវាយប្រហារ នៅពេលណា ដែលសន្តិសុខជាតិបារាំង ជួបនឹងហនិភ័យ។ នេះហើយដែលគេហៅថា គោលការណ៍ ការពារខ្លួនជាមុន។
ជីកស្មៅ ត្រូវជីកទាំងឫស៖
មានមូលហេតុមួយទៀត ដែលជំរុញ ឲ្យបារាំងវាយប្រហារនៅស៊ីរី គឺបញ្ហាជនភៀសខ្លួនស៊ីរី និងអ៊ីរ៉ាក់ ដែលបានសម្រុកនាំគ្នារត់មកសុំសិទ្ធិជ្រកកោននៅអឺរ៉ុប ដោយសារតែសង្រ្គាមកាប់សម្លាប់ បង្ករឡើងដោយក្រុមជីហាដអង្គការរដ្ឋអ៊ីស្លាមនេះឯង។ មានឃ្លាមួយ ដែលគេតែងនិយាយថា ជីកស្មៅ ត្រូវជីកទាំងឫស គឺវាមិនខុសទេ។ ចង់បញ្ឈប់ចលនារត់ភៀសខ្លួនរបស់ប្រជាជនទាំងនោះ ទាល់តែធ្វើយ៉ាងណា បញ្ចប់សង្រ្គាម ហើយកសាងសន្តិភាព នៅក្នុងប្រទេសពួកគេ។ ដូច្នេះការចូលរួមវាយកម្ទេច ក្រុមជីហាដ គឺជាវិធីចម្បងបំផុត ក្នុងការរំលាយក្រុមព្រៃផ្សៃនេះ ហើយចាប់ផ្តើមស្ថាបនាស្ថិរភាព ក្នុងតំបន់ឡើងវិញ។
តែយើងសួរថាហេតុអ្វី បានជាបារាំង រឺប្រទេសមហាអំណាចផ្សេងទៀត មិនព្រមបញ្ជូនកងទ័ពជើងគោក ទៅវាយនៅស៊ីរី ដោយផ្ទាល់តែម្តង? ងាយស្រួលយល់ណាស់ គឺថា ឆ្លងកាត់បទពិសោធន៍ របស់កងទ័ពអាមេរិក នៅអាហ្វហ្គានីស្ថាន និងនៅអ៊ីរ៉ាក់ យើងឃើញថា ការបញ្ជូនទ័ពជើងគោក ទៅតំបន់ដើមបូព៌ា គឺប្រឈមមុខនឹងគ្រោះថ្នាក់ខ្លាំងណាស់ ដោយសារតែកត្តាអាកាសធាតុ និងភូមិសាស្ត្រ ហើយមួយទៀត គឺត្រូវចំណាយថវិការច្រើនណាស់។ ឯគ្រោះថា្នក់អាចស្លាប់កងទ័ព ក៏មានច្រើនផងដែរ បើប្រៀបធៀបទៅនឹងការវាយប្រហារតាមផ្លូវអាកាស។
មានចំណុចមួយដែលធ្វើឲ្យប្រទេសមហាអំណាចទាំងអស់ កំពុងតែខ្វែងគំនិតគ្នា គឺត្រង់ថា រុស្ស៊ី ទាមទារ ថាត្រូវតែជួយរដ្ឋាភិបាលស៊ីរី របស់លោកបាឆា អាល់អាសាដ ដើម្បីកម្ទេចក្រុមជីហាដអ៊ីស្លាម។ ឯចំណែក សហរដ្ឋអាមេរិក និងបារាំងវិញ ប្រកែកដាច់ខាតថា គេមិនចូលដៃ ជាមួយបាឆា អាល់អាសាដទេ ព្រោះរដ្ឋាភិបាលស៊ីរីជារដ្ឋាភិបាលផ្តាច់ការ បានទម្លាក់គ្រាប់បែក និងអាវុធជីវសាស្ត្រសម្លាប់ប្រជាជនស៊ីរីច្រើនណាស់ ពោលគឺវាមិនខុសពីក្រុមជីហាដទេ។ អាមេរិក និងបារាំង ទាមទារឲ្យបាឆា អាល់អាសាដ ចុះចេះពីតំណែង។
ប្រជាជនស៊ីរី ចុះទឹកក្រពើ ឡើងលើខ្លា៖
សង្រ្គាមនៅស៊ីរី គឺមានក្រុមបីផ្សេងគ្នា ដែលកំពុងតែវាយគ្នាទៅវិញទៅមក។ ដំបូងឡើយគឺក្រុមឧទ្ទាមបះបោរ ដែលបាននាំគ្នាងើបប្រឆាំងនឹងរដ្ឋាភិបាលផ្តាច់ការស៊ីរី ទាមទារឲ្យបាឆា អាល់អាសាដ ចុះចេញពីតំណែង។ បន្ទាប់មកទើប ទាហានរដ្ឋាភិបាលស៊ីរី បានធ្វើការវាយប្រហារបង្រ្កាបក្រុមប្រឆាំង មានជាការទម្លាក់គ្រាំបែក និងការប្រើប្រាស់អាវុធគីមីជាដើម ដែលធ្វើឲ្យមានប្រជាជនស្លូតត្រង់ស្លាប់ច្រើនណាស់ ។ ចំណែកក្រុមជីហាដអង្គការរដ្ឋអ៊ីស្លាម បានឆក់យកឱកាសចលាចលនេះ ធ្វើការវាយប្រហារ ដណ្តើមយកតំបន់ធំៗជាច្រើន ហើយបានពង្រីកមូលដ្ឋានរបស់ពួកវា។
ដូច្នេះយើងឃើញថា ប្រជាជនស៊ីរី គឺមិនខុសពីចុះទឹកក្រពើឡើងលើខ្លាទេ គឺថា ម្ខាងគឺទាហានរដ្ឋាភិបាលស៊ីរី ទម្លាក់គ្រាប់បែកមិនលោះថ្ងៃ ហើយម្ខាងគឺក្រុមជីហាដរដ្ឋអ៊ីស្លាម ដែលជាក្រុមផ្តាច់ការអ៊ីស្លាមជ្រុលនិយម។ តាមព័ត៌មានដែលទទួលបានកន្លងមកនេះ អ្វីដែលគេបន្ទោសរដ្ឋាភិបាលស៊ីរីគឺថា ទាហានរដ្ឋាភិបាល ធ្វើការវាយប្រហារមិនរើសមុខ មិនខ្វល់ថាប្រជាជនស្លូតត្រង់ ក្រុមឧទ្ទាម រឺក្រុមជីហាដទេ។
ជាក់ស្តែង ព័ត៌មានដែលយើងទទួលបាននៅថ្ងៃនេះ នៅទីក្រុងហូម មូលដ្ឋានចុងក្រោយ របស់ក្រុមឧទ្ទាមប្រឆាំងរដ្ឋាភិបាល ត្រូវបានទាហានស៊ីរី ទម្លាក់គ្រាប់បែកពីលើ។ ហើយក្នុងចំណោមអ្នកស្លាប់១៧នាក់ គឺសុទ្ធសឹងជាប្រជាជនសាមញ្ញ។ នេះគ្រាន់តែជាឧទាហរណ៍ មួយករណីតែប៉ុណ្ណោះ។ ដូច្នេះហើយបានជាបារាំង និង អាមេរិក បដិសេធមិនចូលដៃជាមួយរដ្ឋាភិបាលស៊ីរី ព្រោះថាវាហាក់ដូចជាបើកដៃឲ្យបាឆាអាល់អាសាដ សម្លាប់ប្រជាជនស៊ីរី ហើយនិងក្រុមឧទ្ទាមប្រឆាំងអញ្ចឹង។
យុទ្ធសាស្ត្រខ្ចីកាំបិតសម្លាប់មនុស្ស៖
តាមមើលទៅ បារាំង និងអាមេរិក ប្រហែលជាត្រូវធ្វើចិត្ត ទុកការស្អប់រដ្ឋាភិបាលស៊ីរីមួយអន្លើសិន។ បញ្ហាស៊ីរី ជាបញ្ហាស្មុគស្មាញ ដែលយើងមិនអាចដោះស្រាយម្តងចប់អស់នោះទេ។ អ្វីជាបញ្ហាចំបង ដែលត្រូវដោះស្រាយបន្ទាន់ គឺកម្ទេចក្រុមជីហាដរដ្ឋអ៊ីស្លាម ឲ្យរលាយជាមុនសិន។ បន្ទាប់មកបញ្ហាលោក បាឆា អាល់អាសាដ ថាត្រូវចុះចេញពីតំណែង រឺយ៉ាងម៉េចទៀត ចាំគិតពេលក្រោយ។
យុទ្ធសាស្ត្ររបស់រុស្ស៊ីនៅពេលនេះ បើតាមការស្មាន ក៏វាមិនជាអាក្រក់ដែរ ពោលគឺយើងអាចហៅថា ជាយុទ្ធសាស្ត្រ ខ្ចីកាំបិទសម្លាប់មនុស្ស។ ពោលគឺ ខ្ចីដៃទាហានរដ្ឋាភិបាលស៊ីរី ដែលមាននៅក្នុងស្រុកស្រាប់ ដើម្បីធ្វើការវាយប្រហារលើក្រុមជីហាដ។ តាមមើលទៅ លោកអាសាដ ប្រហែលជាបានចរចាជាមួយរុស្ស៊ី រួចទៅហើយ ដើម្បីធ្វើយ៉ាងណា អាចចុះចេញពីតំណែង តាមសម្រួល ដោយមានការការពារ ពីប្រទេសមហាអំណាច ព្រោះគាត់ខ្លាចវាសនាគាត់ ដូចលោកកាដាហ្វី នៅលីប៊ី។ អ្នកវិភាគជាច្រើន ក៏បានយល់ស្របដែរថា លោកអាសាដ កំពុងតែព្យាយាមរកច្រកចេញ ដើម្បីយករួចខ្លួន ព្រោះថាបើនៅបន្តទៀត ស្រួលមិនស្រួល ក្រុមជីហាដសង្រ្គប់បាន គឺច្បាស់ជាមិនរស់ទេ។
ច្រកចេញនយោបាយ ឲ្យអាសាដចេញពីតំណែងតាមសម្រួល?
ទោះបីជាមកទល់ពេលនេះ បារាំងនិងអាមេរិក មិនសូវជាពេញចិត្ត នឹងយុទ្ធសាស្ត្ររបស់រុស្ស៊ីក៏ដោយ ក៏ប៉ុន្តែគេក៏មិនបដិសេធទាំងស្រុងដែរ។ រដ្ឋមន្ត្រីការបរទេសរុស៊្សី បានថ្លែងនៅក្រុងញូយ៉ក នៅថ្ងៃនេះថា រុស្ស៊ី អាចចូលរួមជាមួយសម្ព័ន្ធមិត្តដើម្បីវាយក្រុមជីហាដ បើសិនជាក្រុមនេះ ព្រមសហការ ជាមួយរដ្ឋាភិបាលរបស់លោកអាសាដ។ លោកឡូរ៉ង់ ហ្វាប្យូស រដ្ឋមន្ត្រីការបរទេសបារាំងបានឆ្លើយតបថា បាឆា អាល់អាសាដ មិនអាចបន្តដឹកនាំស៊ីរីរហូតបានទេ។ អ្វីដែលចាំបាច់ពេលនេះ គឺចរចាគ្នា រកដំណោះស្រាយរួមមួយ ដើម្បីចាត់តាំងនូវរបៀបវារៈ អន្តរកាលមួយ ក្នុងការផ្លាស់ប្តូរអំណាចបន្ទាប់ពីបាឆា អាល់អាសាដ។ អញ្ចឹងមានន័យថា បារាំងចាប់ផ្តើមប្តូរចិត្តបន្តិច ប៉ុន្តែនៅតែទាមទារថា កិច្ចការរួចស្រេចបាច់កាលណា គឺស៊ីរីត្រូវមានរដ្ឋាភិបាលថ្មី ដែលមិនមែនជារដ្ឋាភិបាលរបស់លោកអាសាដ។
យ៉ាងណាមិញ យុទ្ធសាស្ត្រថ្មី ដែលមានរុស្ស៊ីចេញមុខនេះ ហាក់បានទទួលការគាំទ្រ ពីប្រទេសផ្សេងទៀតដែរ គឺដូចជាអ៊ីរ៉ាក់ និងអ៊ីរ៉ង់។ ប្រទេសពីរនេះ ទើបបានចុះកិច្ចព្រមព្រៀងនៅថ្ងៃនេះ ជាមួយរុស្ស៊ី ក្នុងការបង្កើនកិច្ចសហប្រតិបត្តិការយោធា ដោយបង្កើតជាមូលដ្ឋានស្រង់ទិន្នន័យរួមមួយ នៅក្រុងបាដដាត ដោយមានការសហការ ពីយោធាទាំង៣ប្រទេស ក្នុងគោលដៅ កម្ទេចក្រុមជីហាដរដ្ឋអ៊ីស្លាម នៅអ៊ីរ៉ាក់ និងស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ