លោកចន ឃែរី ទាមទារឲ្យមានការចរចាបញ្ចប់វិបត្តិស៊ីរី
លោកចន ឃែរី រដ្ឋមន្រ្តីការបរទេសអាមេរិក បានអំពាវនាវនៅថ្ងៃសៅរ៍ ឲ្យចាប់បើកធ្វើឡើងវិញ នូវការចរចាការទូត ដើម្បីបញ្ចប់វិបត្តិនៅស៊ីរី។ លោកការទូតអាមេរិកបានបញ្ជាក់សាជាថ្មីឡើងវិញថា អាមេរិកនៅតែរក្សាជំហរទាមទារឲ្យលោកបាស្ហា អាល់អាសាដ ចុះចេញពីតំណែង ក៏ប៉ុន្តែ ចុះចេញនៅពេលណា គឺអាចចរចាគ្នាបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ថ្លែងនៅក្នុងអំឡុងទស្សនកិច្ចនៅអង់គ្លេស លោកចន ឃែរី បានលើកឡើងថា អស់រយៈពេល១ឆ្នាំកន្លះហើយ ដែលអាមេរិកទាមទារថា ដើម្បីបញ្ចប់សង្រ្គាមស៊ីវិលនៅស៊ីរីបាន លោកអាសាដត្រូវតែចុះចេញពីអំណាច ក៏ប៉ុន្តែ នីតិវិធី និងកាលបរិច្ឆេទនៃការចុះចេញរបស់លោកអាសាដអាចត្រូវសម្រេចតាមរយៈកិច្ចចរចា ក្នុងក្របខ័ណ្ឌកិច្ចព្រមព្រៀងដែលបានចុះក្នុងទីក្រុងហ្សឺណែវ ពោលគឺ មិនមែនទាមទារឲ្យលោកអាសាដចុះចេញពីតំណែងភ្លាមៗនោះទេ។ ជំហរនេះត្រូវបានថ្លែងគាំទ្រភ្លាមៗ ដោយរដ្ឋមន្រ្តីការបរទេសអង់គ្លេស ដែលបានបញ្ជាក់បន្ថែមថា ការដោះស្រាយវិបត្តិស៊ីរី គឺជារឿងចាំបាច់ និងបន្ទាន់ ដើម្បីបញ្ចប់វិបត្តិជនភៀសខ្លួន ដែលកំពុងតែសម្រុកចូលមកក្នុងតំបន់អឺរ៉ុប ហើយដែលកំពុងតែបង្កឲ្យមានភាពតានតឹងយ៉ាងខ្លាំងរវាងប្រទេសជាសមាជិកសហភាពអឺរ៉ុប។
លោកចន ឃែរី បានបញ្ជាក់ថា អាមេរិកត្រៀមខ្លួនក្នុងការចរចាគ្រប់ភាគីពាក់ព័ន្ធទាំងអស់ សំខាន់ឲ្យតែលោកអាសាដពិតជាមានឆន្ទៈចង់ចរចាបញ្ចប់វិបត្តិ ហើយរុស្ស៊ីគួរជាអ្នកដើរតួនាទីសំខាន់ក្នុងការដាក់សម្ពាធឲ្យលោកអាសាដវិលត្រឡប់មករកតុចរចា។
គួរបញ្ជាក់ថា តាំងពីដើមមក លោកវ៉ា្លឌីមៀរ ពូទីន ប្រធានាធិបតីរុស្ស៊ី ក៏តែងតែគាំទ្រឲ្យដោះស្រាយវិបត្តិស៊ីរីតាមរយៈការចរចាដូចគ្នានេះដែរ ក៏ប៉ុន្តែ សម្រាប់រុស្ស៊ី ជោគវាសនារបស់លោកអាសាដ ត្រូវទុកឲ្យស៊ីរីខ្លួនឯងជាអ្នកសម្រេច ដោយមិនត្រូវមានការជ្រៀតជ្រែកពីប្រទេសខាងក្រៅនោះទេ។
ការអំពាវនាវរបស់លោកចន ឃែរី ឲ្យមានការចរចាដោះស្រាយវិបត្តិស៊ីរី ត្រូវបានធ្វើឡើង តែមួយថ្ងៃប៉ុណ្ណោះ ក្រោយពីរដ្ឋមន្រ្តីការពារជាតិអាមេរិក និងសមភាគីរុស្ស៊ី បានជួបជជែកគ្នាតាមទូរស័ព្ទរហូតដល់ទៅ១ម៉ោង ដើម្បីនិយាយអំពីអន្តរាគមន៍យោធារបស់រុស្ស៊ី និងអាមេរិក ដើម្បីប្រយុទ្ធប្រឆាំងនឹងក្រុមជីហាតរដ្ឋអ៊ីស្លាម នៅក្នុងប្រទេសស៊ីរី។
នៅទីក្រុងឡុងដ៍ លោកប្រមុខការទូតអាមេរិកបានសម្តែងនូវការស្វាគមន៍ចំពោះអន្តរាគមន៍យោធារបស់រុស្ស៊ីនៅស៊ីរី ព្រមទាំងបានលើកឡើងថា អាមេរិកត្រៀមខ្លួនសាកល្បងប្រើគ្រប់មធ្យោបាយទាំងអស់ ធ្វើយ៉ាងណាឲ្យតែអាចកម្ចាត់ពួកជីហាតបានឆាប់ និងប្រកបដោយប្រសិទ្ធភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ