អ៊ីរ៉ាក់ ៖ គួឌីស្ថានបង្កកលទ្ធផលប្រជាមតិ ដើម្បីបានចូលចរចាជាមួយរដ្ឋាភិបាល
នៅទីបំផុត រដ្ឋអំណាចគួឌីស្ថាននៅអ៊ីរ៉ាក់ ដែលកំពុងវិលវល់ក្នុងវិបត្តិនយោបាយ សេដ្ឋកិច្ច និងគំនាបពីអាជ្ញាធរក្រុងបាកដាដ បានប្រកាសផ្អិបចោលលទ្ធផលនៃការបោះឆ្នោតប្រជាមតិទាមទារឯករាជ្យកាលពីថ្ងៃទី២៥កញ្ញា ដោយសង្ឃឹមថាសំណើនេះនឹងអាចបិទបញ្ចប់វិបត្តិបាន។ សូមបញ្ជាក់ថា ក្នុងរយៈពេលមួយខែកន្លងមកនេះ គួឌីស្ថានបានខាតបង់ច្រើនណាស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ថ្ងៃនេះជាគម្រប់មួយខែគត់ ដែលរដ្ឋអំណាចស្វ័យតគួឌីស្ថាន នៅភាគខាងជើងប្រទេសអ៊ីរ៉ាក់ បានរៀបចំប្រជាមតិទាមទារឯករាជ្យតំបន់។ បោះឆ្នោតឈ្នះ តែ វិបត្តិក៏ចាប់ផ្ទុះឡើង ក្នុងទ្រង់ទ្រាយធំមិនធ្លាប់មាន។ រដ្ឋាភិបាលអ៊ីរ៉ាក់ គាំទ្រដោយតួកគី អ៊ីរ៉ង់ បានគ្នាគាបគួឌីស្ថាន។ អាមេរិកដែលធ្លាប់ជាជំនួយ និងពឹងពាក់ទាហានគួឌីស្ថាន ក្នុងប្រតិបត្តិការកម្ចាត់ពួកអង្គការរដ្ឋអ៊ីស្លាម ក៏មិនស្វាគមន៍និងទទួលស្គាល់លទ្ធផលប្រជាមតិ ហើយបានអំពាវនាវឱ្យមានការរួបរួមគ្នា។ ជាចុងក្រោយ នាយករដ្ឋមន្ត្រីអ៊ីរ៉ាក់ បានប្រើកម្លាំងបាយ បញ្ជូនទ័ពទៅវាយដណ្តើមយករាល់គ្រប់ទីតាំងកាន់ដោយគួឌីស្ថាន ក្រៅតំបន់ស្វយ័ត
កន្លងមកគួឌីស្ថាន តែងបដិសេធរាប់គ្រប់លក្ខខណ្ឌនៃការចរចាជាមួយអាជ្ញាធរកណ្តាលបាតដាដ ព្រោះអាងតែខ្លួនស្ថិតក្នុងជំហរជាអ្នកខ្លាំង។ ប៉ុន្តែនៅថ្ងៃអង្គារម្សិលមិញ កងកម្លាំងរដ្ឋាភិបាលអ៊ីរ៉ាក់បានបើកយុទ្ធនាការវាយប្រហារលើទីតាំងរបស់ទាហានគួឌីស្ថាននៅតាមបណ្តោយព្រំដែនតួកគី និងបានប្រកាសដាច់ខាតសំដៅវាយលើគ្រប់ចំណុចកាន់កាប់ដោយគួឌីស្ថានទាំងអស់។
នៅទីបំផុត អាជ្ញាធរគួឌីស្ថាន ក៏បានប្រកាសនៅថ្ងៃពុធនេះ តាំងពីព្រហាម ថានឹងផ្អិបលទ្ធផលបោះឆ្នោតប្រជាមតិ និងប្រកាសត្រៀមទទួលយកបទឈប់បាញ់ភ្លាម ដើម្បីបញ្ជៀសសង្គ្រាម បញ្ជៀសការបំផ្លិចបំផ្លាញសង្គម និងដើម្បីផ្តល់ឱកាសបើកការចរចាជាមួយរដ្ឋាភិបាលអ៊ីរ៉ាក់ ដោយយករដ្ឋធម្មនុញ្ញជាមូលដ្ឋាន។
តាមការពិត អាជ្ញាធរគួឌីស្ថាន សុខចិត្តប្តូរជំហារ ព្រោះកំពុងចាញ់នៅក្នុងការប្រយុទ្ធផង បាត់បង់ខេត្តគៀកូគ ដែលជាប្រភពចំណូលសេដ្ឋកិច្ចបានមកពីការបូមប្រេងផង និងគ្មានការគាំទ្រពីអន្តរជាតិណាម្នាក់ដូចការគិតទៀត។ អាជ្ញាធរអ៊ីរ៉ាក់មិនទាន់បញ្ចេញប្រតិកម្មអ្វី ទេថ្ងៃនេះ ប៉ុន្តែអ្នកនាំពាក្យកងយុទ្ធជនស្វ័យត្រាន បានផ្តល់ចម្លើយយ៉ាងកំបុតច្រានចោលសំណើរបស់គួឌីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ