ដំណើរទស្សនៈកិច្ចដ៏កម្ររបស់រដ្ឋមន្ត្រីការបរទេសអូម៉ង់នៅលើទីលាននៃវិហារអ៊ីស្លាមនៅទីក្រុង Jérusalem
រដ្ឋមន្ត្រីក្រសួងការបរទេសរាជាណាចក្រ អូម៉ង់លោក Youssef ben Alaoui បានអញ្ជើញទៅកាន់ទីលាននៃវិហារអ៊ីស្លាមនៅ Jérusalem កាលពីថ្ងៃព្រហស្បតិ៍ម្សិលមិញ។ ជាទស្សនៈកិច្ចដ៏កម្រមួយពីសំណាក់អ្នកដឹកនាំអារ៉ាបម្នាក់ នៅលើទីលានសក្ការៈទី៣នៃសាសនាអ៊ីស្លាមដែលស្ថិតនៅក្នុងទីក្រុង Jérusalem ខាងកើត ដែលកាន់កាប់ដោយអាជ្ញាធរអ៊ីស្រាអែល។
ចុះផ្សាយនៅថ្ងៃ៖ កែប្រែថ្ងៃទី៖
លោក Youssef ben Alaoui ដែលដឹកនាំការទូតអូម៉ង់តាំងពីច្រើនឆ្នាំកន្លងមកហើយ បានអញ្ជើញទៅកាន់ទីលាននៃវិហារសាសនាអ៊ីស្លាម Al-Aqsa នៅ Jérusalem ខាងកើតដែលកាន់កាប់ដោយអាជ្ញាធរអ៊ីស្រាអែល។
ទស្សនៈកិច្ចរបស់រដ្ឋមន្ត្រីការទូត អូម៉ង់នេះ ត្រូវបានប្រព្រឹត្តទៅបន្ទាប់ពីសេចក្តីថ្លែងដ៏ចម្រូងចម្រាសរបស់ប្រធានាធិបតីអាមេរិក លោក Donald Trump កាលពីថ្ងៃទី៦ធ្នូឆ្នាំ ២០១៧កន្លងទៅ ដែលធ្វើការទទួលស្គាល់ទីក្រុង Jérusalem ថាជារដ្ឋធានីរបស់អ៊ីស្រាអែល ។ សេចក្តីថ្លែងរបស់ប្រធានាធិបតីអាមេរិកនេះ បានបំផុសអោយពិភពអ្នកកាន់សាសនាអ៊ីស្លាម មានការខឹងក្រេវក្រោធយ៉ាងសម្បើម ។ រីឯប្រជាជនប៉ាឡេស្ទីនវិញ ក៏ពុំព្រមចាត់ទុកអាមេរិកថាជាអ្នកសម្របសម្រួលនៅក្នុងការដោះស្រាយជម្លោះនៅក្នុងដែនដីរបស់គេដែរ។ គួរបញ្ជាក់ថាលក្ខ័ន្តិកៈនៃទីក្រុង Jérusalem គឹជាបញ្ហាមួយដ៏ចម្រូងចម្រាសបំផុតនៅក្នុងដំណោះស្រាយ អធិករណ៍រវាងអ៊ីស្រាអែលនឹងប៉ាឡេស្ទីន។
ម្យ៉ាងទៀត ទស្សនកិច្ចរបស់លោក ben Alaoui នេះ គឺធ្វើឡើងនៅចំពេលដែលនាយករដ្ឋមន្ត្រីអ៊ីស្រាអែល Benjamin Netanyahu និង រដ្ឋបាលអាមេរិករបស់លោក Donald Trump កំពុងធ្វើការលើកតម្កើងយ៉ាងផុសផុល ចំពោះគំនិតការពារផលប្រយោជន៍រួមរវាងបណ្តាប្រទេសអារ៉ាបនិងអ៊ីស្រាអែល ប្រឈមមុខនឹងការឡើងឥទ្ធិពលរបស់ប្រទេសអ៊ីរ៉ង់ផងនិងការគំរាមរបស់ពួកអ៊ីស្លាមជ្រុលនិយមផង ក៏ព្រមទាំងហេតុការណ៍ថ្មីៗនៅក្នុងតំបន់។
គួរបញ្ជាក់ថារាជាណាចក្រអូម៉ង់និងអ៊ីស្រាអែល ពុំមានទំនាក់ទំនងការទូតផ្លូវការជាមួយគ្នាទេ។ ដូច្នេះ ទស្សនកិច្ចបែបនេះ តាមធម្មតាទាមទារអោយមានការសម្របសម្រួលគ្នាជាមួយនឹងអាជ្ញាធរអ៊ីស្រាអែលជាមុនសិន។ អាជ្ញាធរអ៊ីស្រាអែល ដែលធ្វើការត្រួតត្រានៅគ្រប់ច្រកល្ហកចេញចូលនៅក្នុងទីក្រុង Jérusalem ខាងកើត ក៏ព្រមទាំងទីលាននៃវិហារសាសនាអ៊ីស្លាម។
នៅលើដំណើរទស្សនកិច្ចរបស់លោក Ben Alaoui នេះ ទាំងក្រសួងការបរទេសនិងទាំងប៉ូលីសអ៊ីស្រាអែល ពុំបានឆ្លើយទៅនឹងសំណួររបស់ទីភ្នាក់ងារព័ត៌មានបារាំងទេនៅលើការសម្របសម្រួលគ្នានេះជាមួយនឹងអាជ្ញាធរអ៊ីស្រាអែល។ ក៏ប៉ុន្តែ លោក Ben Alaoui វិញ បានអះអាងថា "គឺជាកាតព្វកិច្ច មួយរបស់ប្រជាជនអារ៉ាប់ នៅក្នុងការអញ្ជើញមកទស្សនា នៅលើទីលានសក្ការៈនៃ វិហារសាសនាអ៊ីស្លាម Al-Aqsa នេះ។
រដ្ឋមន្ត្រីការបរទេសអូម៉ង់ ជាបន្ទាប់មកទៀត បានអញ្ជើញទៅកាន់ព្រះវិហារសាសនាកាតូលីក Saint-Sépulcre ដែលស្ថិតនៅចម្ងាយប្រមាណជាពីរឬ៣រយម៉ែត្រប៉ុណ្ណោះពីទីលានសក្ការៈនៃវិហារអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ