វេទិកាសេដ្ឋកិច្ច និងវិនិយោគនៅអារ៉ាប៊ីសាអូឌីតកំពុងបំពុលដោយរឿងរ៉ាវលោកខាស្ហូហ្ស៊ី
ចុះផ្សាយនៅថ្ងៃ៖
ស្តាប់ - ០៦:៤៩
នៅថ្ងៃអង្គារ ទី២៣ តុលា វេទិកាអន្តរជាតិស្តីពីគំនិតផ្តួចផ្តើមវិនិយោគទៅថ្ងៃអនាគត « Future Investment Initiative » បានបើកធ្វើក្នុងប្រទេសអារ៉ាប៊ីសាអូឌីតរយៈពេល ៣ថ្ងៃ។ តែវេទិកាមួយនេះកំពុងបំពុលដោយរឿងរ៉ាវមរណភាពអ្នកកាសែតអារ៉ាប៊ីសាអូឌីតលោកហ្សាម៉ាល់ ខាស្ហូហ្ស៊ីក្នុងស្ថានកុងស៊ុលអារ៉ាប៊ីសាអូឌីតប្រចាំទីក្រុងអ៊ីស្តង់ប៊ូល ប្រទេសតួកគីកាលពីថ្ងៃទី២ តុលា។ មានថ្នាក់ដឹកនាំបរទេសជាច្រើន អគ្គនាយកអង្គការអន្តរជាតិ អគ្គនាយកក្រុមហ៊ុនបរទេសគ្រាក់ៗ និងអ្នកជំនួញបរទេសជាច្រើនរូបបានធ្វើពហិការមិនទៅចូលរួម។ ដោយឡែកក្នុងថ្ងៃនេះដែរ លោកប្រធានាធិបតីតួកគីអ៊ែរដូហ្កានបានប្រកាសលាតត្រដាងការពិតជុំវិញមរណភាពលោកខាស្ហូហ្ស៊ី។
ការថ្លែងរបស់លោកអ៊ែរដូហ្កានបានធ្វើឡើងនៅក្នុងកិច្ចប្រជុំប្រចាំសប្តាហ៍ជាមួយក្រុមអ្នកតំណាងរាស្រ្តនៃគណបក្សកាន់អំណាចក្នុងទីក្រុងអង់ការ៉ា។ លោកអ៊ែរដូហ្កានបានលំអិតម្តងមួយៗលើលទ្ធផលនៃការស៊ើបអង្កេតរបស់ក្រុមអ្នកស៊ើបអង្កេតតួកគី។ លោកអ៊ែរដូហ្កានបានបញ្ជាក់ថា នៅមួយថ្ងៃមុនថ្ងៃបាត់ខ្លួនលោកខាស្ហូហ្ស៊ីក្នុងថ្ងៃទី២ តុលា មានភ្នាក់ងារអារ៉ាប៊ីសាអូឌីតចំនួន ៣នាក់បានមកដល់តួកគី រួចធ្វើដំណើរទៅកាន់ព្រៃមួយស្ថិតក្បែរទីក្រុងអ៊ីស្តង់ប៊ូល និងស្រុកមួយជាប់សមុទ្រម៉ារម៉ារ៉ាស្ថិតចម្ងាយ ៩០គីឡូម៉ែត្រពីទីក្រុងអ៊ីស្តង់ប៊ូល។ គឺនៅម្តុំនោះហើយដែលសាកសពលោកខាស្ហូហ្ស៊ីកាត់ជាកង់ៗអាចត្រូវគេកប់ចោល ឬបោះចូលសមុទ្រ។
បន្ទាប់មក លោកអ៊ែរដូហ្កានក៏បានបញ្ជាក់ដែរថា ក្នុងថ្ងៃទី២ តុលាដែលជាថ្ងៃបាត់ខ្លួនលោកខាស្ហូហ្ស៊ីនៅក្នុងស្ថានកុងស៊ុលអារ៉ាប៊ីសាអូឌីតប្រចាំទីក្រុងអ៊ីស្តង់ប៊ូល មានភ្នាក់ងារអារ៉ាប៊ីសាអូឌីតចំនួន ១៥នាក់បានចូលក្នុងស្ថានកុងស៊ុលនោះ ហើយកាំមេរ៉ានៅខាងក្នុងស្ថាកុងស៊ុលក៏ត្រូវបានគេដោះចេញទាំងអស់ដែរ។ តាមរយៈការទម្លាយលទ្ធផលស៊ើបអង្កេតពេលនេះ លោកអ៊ែរដូហ្កានមិនបានចោទអារ៉ាប៊ីសាអូឌីតចំមុខទេ តែបានទាមទារឲ្យអារ៉ាប៊ីសាអូឌីតកាត់ទោសជនទាំង ១៨នាក់ដែលអារ៉ាប៊ីសាអូឌីតបានឃាត់ខ្លួន និងថា លោកមានជំនឿលើភាពស្មោះត្រង់របស់ព្រះមហាក្សត្រអារ៉ាប៊ីសាអូឌីតសាលម៉ាន។
អ្វីដែលលោកអ៊ែរដូហ្កានចង់ដឹង តើអ្នកណាបានបញ្ជាឲ្យសម្លាប់លោកខាស្ហូហ្ស៊ីនៅក្នុងស្ថានកុងស៊ុល និងថា ហេតុអ្វីបានជាភ្នាក់ងារអារ៉ាប៊ីសាអូឌីតទាំង ១៥នាក់បានចូលស្ថានកុងស៊ុងក្នុងថ្ងៃបាត់ខ្លួនលោកខាស្ហូហ្ស៊ីថ្ងៃទី២ តុលា?។
គួររម្លឹកថា ទោះបីជារដ្ឋអំណាចអារ៉ាប៊ីសាអូឌីតទើបបានប្រកាសទទួលស្គាល់មរណភាពលោកខាស្ហូហ្ស៊ីក្នុងថ្ងៃសៅរ៍ ទី២០ តុលាក៏ដោយក៏រហូតមកដល់ពេលនេះ ទីក្រុងរីយ៉ាដបន្តអះអាងម្តងជាពីរដងថា ខ្លួនមិនជាប់ពាក់ព័ន្ធនឹងឃាតកម្មសម្លាប់លោកខាស្ហូហ្ស៊ីទេ ហើយរឿងរ៉ាវមួយក៏រាជទាយាទបេនសាលម៉ាន រួមទាំងក្រសួងស៊ើបការណ៍សម្ងាត់អារ៉ាប៊ីសាអូឌីតមិនបានដឹងដែរ។ សម្រាប់ទីក្រុងរីយ៉ាទ គឺជនពាលមួយក្រុមជាអ្នកសម្លាប់លោកខាស្ហូហ្ស៊ី។ ក៏ប៉ុន្តែ ក្រុមប្រទេសបស្ចិមលោក រួមទាំងអាមេរិក និងតួកគីមិនជឿសម្តីអារ៉ាប៊ីសាអូឌីត ហើយបន្តដាក់គំនាបឲ្យអារ៉ាប៊ីសាអូឌីតឆ្លើយការពិត។
អារ៉ាប៊ីសាអូឌីតកំពុងទទួលគំនាបកាន់តែខ្លាំង
គំនាបអន្តរជាតិ មានទាំងអាមេរិកដែលជាសម្ព័ន្ធមិត្តចាក់ទឹកមិនលេចរបស់អារ៉ាប៊ីសាអូឌីតកំពុងបន្តមានកាន់តែខ្លាំងឡើងៗពីមួយថ្ងៃទៅមួយថ្ងៃ។ បន្ទាប់ពីចាត់ទុកចម្លើយបដិសេធរបស់អារ៉ាប៊ីសាអូឌីតថាជាការភូតកុហក លោកប្រធានាធិបតីអាមេរិកដូណាល់ ត្រាំបានបន្ថែមនៅថ្ងៃចន្ទ ទី២២ តុលាថា លោកមិនពេញចិត្តនឹងចម្លើយរបស់អារ៉ាប៊ីសាអូឌីតទេ។ តាមមើលទៅ អារ៉ាប៊ីសាអូឌីតគ្មានជម្រើសអ្វីក្រៅពីទទួលស្គាល់ការពិតនៅនាទីចុងក្រោយ។ នៅក្នុងដំណាក់កាលដំបូង ក៏អារ៉ាប៊ីសាអូឌីតឆ្លើយមិនដឹងអ្វីទាំងអស់ដែរ តែទីបំផុតបានទទួលស្គាល់ថា លោកខាស្ហូហ្ស៊ីពិតជាត្រូវបានសម្លាប់នៅក្នុងស្ថានកុងស៊ុល តែថា មិនមែនជាស្នាដៃរបស់ខ្លួនទេ។
គេត្រូវរង់ចាំមើលថា តើអារ៉ាប៊ីសាអូឌីតទ្រាំមិនឆ្លើយការពិតដល់ពេលណា និងថា តើរឿងរ៉ាវមួយនេះអាចនឹងមានជាប់ពាក់ព័ន្ធភាគីណាផ្សេងក្រៅពីអារ៉ាប៊ីសាអូឌីតដែរ ឬទេ?។
អង្គការអន្តរជាតិ និងអ្នកវិនិយោគបរទេសគ្រាក់ៗធ្វើពហិការ
ក្នុងថ្ងៃដែលលោកអ៊ែរដូហ្កានបានទម្លាយលទ្ធផលស៊ើបអង្កេតជុំវិញរឿងរ៉ាវលោកខាស្ហូហ្ស៊ី អារ៉ាប៊ីសាអូឌីតផ្តើមវេទិកាអន្តរជាតិស្តីពីគំនិតផ្តួចផ្តើមវិនិយោគទៅថ្ងៃអនាគត « Future Investment Initiative » រយៈពេល ៤ថ្ងៃ។ តែគេបានសង្កេតឃើញជារួមថា រឿងរ៉ាវលោកខាស្ហូហ្ស៊ីកំពុងបំពុលវេទិកាមួយនេះដោយមានថ្នាក់ដឹកនាំបរទេសជាច្រើន អគ្គនាយកអង្គការអន្តរជាតិ អគ្គនាយកក្រុមហ៊ុនបរទេស រួមទាំងអ្នកជំនួញបរទេសគ្រាក់ៗជាច្រើនរូបបានធ្វើពហិការមិនទៅចូលរួមនៅក្នុងវេទិកានោះទេ។
ទន្ទឹមគ្នានេះ មានប្រព័ន្ធឃោសនាមហាជនអន្តរជាតិធំៗ ដូចយ៉ាង Bloomberg CNN Financial Times ក៏បានធ្វើពហិការមិនទៅយកព័ត៌មានដែរ។ សូមជម្រាបថា វេទិកាអន្តរជាតិស្តីពីគំនិតផ្តួចផ្តើមវិនិយោគទៅថ្ងៃអនាគត គឺជាគម្រោងកំណែទម្រង់សេដ្ឋកិច្ចរបស់រាជទាយាទអារ៉ាប៊ីសាអូឌីតបេន សាលម៉ានក្រោមប្រធានបទ « ចក្ខុវិស័យឆ្នាំ ២០៣០ »។ តាមរយៈស្មារតី « ចក្ខុវិស័យឆ្នាំ ២០៣០ » រាជទាយាទបេនសាលម៉ានចង់ប្តូរពីសេដ្ឋកិច្ចជាតិដែលពឹងតែលើចំណូលបានមកពីការបូមប្រេងលក់ទៅជាសេដ្ឋកិច្ចជាតិដែលចំណូលបានមកពីប្រភពផ្សេង ដូចយ៉ាងបច្ចេកវិទ្យា ទេសចរណ៍ និងសេវាកម្មចម្រុះ។
តែដើម្បីអាចសម្រេចបាននូវមហិច្ឆតានេះបាន អារ៉ាប៊ីសាអូឌីតត្រូវការក្រុមអ្នកវិនិយោគបរទេសដោយចៀសមិនរួច។ ក្រុមអ្នកវិនិយោគបរទេសនៅគ្រប់ជ្រុងជ្រោយលើលោកកំពុងសម្លឹងឃើញសក្តានុពលសេដ្ឋកិច្ចដ៏សម្បើមនៅក្នុងមហាគម្រោងសេដ្ឋកិច្ចរបស់អារ៉ាប៊ីសាអូឌីតដែលជាមហាអំណាចសេដ្ឋកិច្ចក្នុងពិភពអារ៉ាប់។ តែរឿងរ៉ាវមរណភាពលោកខាស្ហូហ្ស៊ីកំពុងធ្វើឲ្យក្រុមអ្នកវិនិយោគបរទេសខ្លះបាត់បង់ជំនឿទុកចិត្តលើរាជទាយាទបេនសាលម៉ាន។ ដូច្នេះដើម្បីបង្កើតឲ្យទំនុកទុកចិត្តឡើងវិញលើឆាកអន្តរជាតិ ពិសេសក្រុមអ្នកវិនិយោគបរទេស រាជទាយាទបេនសាលម៉ានត្រូវហ៊ានស៊ី ហ៊ានសង និងត្រូវបង្ហាញពីតម្លាភាពក្នុងរឿងរ៉ាវមរណភាពលោកខាស្ហូហ្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ