អារ៉ាប៊ីសាអូឌីតថា គ្មានចេតនាប្រើទណ្ឌកម្មប្រេង ប្រឆាំងបស្ចឹមលោកទេ
ក្រោយប្រតិកម្មរបស់សហគមន៍លោកខាងលិច ទាក់ទងនឹងហេតុការណ៍សម្លាប់អ្នកកាសែតហ្សាម៉ាល់ ខាស្ហូហ្ស៊ី Jamal Khashoggi អារ៉ាប៊ីសាអូឌីត បានប្រកាសបញ្ជាក់នៅថ្ងៃចន្ទនេះ ថាគ្មានចេតនា ដាក់ទណ្ឌកម្ម ដំឡើងថ្លៃប្រេង ប្រឆាំងនឹងក្រុមប្រទេសលោកខាងលិច ដូចអ្វីដែលអារ៉ាប៊ីសាអូឌីត ធ្លាប់បានធ្វើកាលពីឆ្នាំ១៩៧៣ទេ។ គ្មានចេតនាសោះ បើទោះបីជាពេលនេះទំនាក់ទំនងជាមួយបស្ចឹមលោកហាក់ដូចជារអាក់រអួលបន្តិចក៏ដោយ។ នេះបើតាមប្រសាសន៍របស់លោករដ្ឋមន្ត្រីក្រសួងថាមពលអារ៉ាប៊ីសាអូឌីត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
តម្លៃប្រេងឆៅអាចនឹងឡើងថ្លៃ តែមិនមែនជាទណ្ឌកម្មរបស់អារ៉ាប៊ីសាអូឌីតប្រឆាំងនឹងអ្នកណាឡើយ ! អារ៉ាប៊ីសាអូឌីត ជាប្រទេសមានទំនួលខុសត្រូវខ្ពស់ ! តាំងពីជាច្រើនទសវត្សរ៍ អារ៉ាប៊ីសាអូឌីត ប្រើវិស័យប្រេងជាឧបករណ៍សេដ្ឋកិច្ចប្រកបដោយការទទួលខុសត្រូវ និងដាក់ឱ្យនៅដាច់ដោយឡែកពីនយោបាយ ! នេះជាការពន្យល់លម្អិតរបស់រដ្ឋមន្ត្រីក្រសួងថាមពលអារ៉ាប៊ីសាអូឌីត ទៅកាន់ភ្នាក់ងារសារព័ត៌មានផ្លូវការរុស្ស៊ី ដោយអះអាងថា អារ៉ាប៊ីសាអូឌីត ប្រកាន់ខ្ជាប់នូវនយោបាយរក្សាស្ថិរភាពទីផ្សារប្រេងពិភពលោក និងសម្រួលកំណើនសេដ្ឋកិច្ចពិភពលោក។
ប៉ុន្តែអារ៉ាប៊ីសាអូឌីតមិនអាចធានាថាតម្លៃប្រេងឆៅមិនឡើងថ្លៃលើសពី ១០០ដុល្លារក្នុងមួយធុងបារីលបានឡើយ។ ព្រោះសក្តានុពលផលិតប្រេងនៅលីប៊ី នីហ្សេរីយ៉ា ម៉ិចស៊ិក និងវេណេស៊ុយអេឡា ធ្លាក់ស្រុតខ្លាំង ហើយម្យ៉ាងទៀតគេមិនដឹងថាតើអ៊ីរ៉ង់ដែលជាប់ទណ្ឌកម្មពិភពលោក គិតយ៉ាងណាចំពោះនយោបាយប្រេងរបស់គេទេ។ បើតាមលោករដ្ឋមន្ត្រី អារ៉ាប៊ីសាអូឌីត នឹងបង្កើនការបូមប្រេងពី១០,៧លានធុងក្នុងថ្ងៃ ទៅ ១១ឬ១២ធុង ហើយក្រុមហ៊ុនប្រេងជាតិនឹងសហការចម្រាញ់ជាមួយក្រុមហ៊ុនរុស្ស៊ី។
សេចក្តីប្រកាសរបស់រដ្ឋមន្ត្រីក្រសួងថាមពលអារ៉ាប៊ីសាអូឌីត ធ្វើឡើងបន្ទាប់ពី បណ្តាលប្រទេសលោកខាងលិចធំៗបង្ហាញភាពមិនទុកចិត្តចំពោះក្រុងរីយ៉ាដ ដែលព្រមទទួលស្គាល់ថាអ្នកកាសែត ខាស្ហូហ្ស៊ី ពិតជាត្រូវបានសម្លាប់នៅស្ថានកុងស៊ុលអារ៉ាប៊ីសាអូឌីត។ អាល្លឺម៉ង់ បានព្រមានកាលពីថ្ងៃអាទិត្យថា មិននាំអាវុធទៅអារ៉ាប៊ីសាអូឌីតទេ ក្នុងសភាពបែបនេះ។ លោកដូណាល់ត្រាំ ក៏បានប្រកាសគិតគូរចង់ដាក់ទណ្ឌកម្មដែរ ដែលធ្វើរីយាដបានសន្យាសងសឹងតបវិញ។
សូមបញ្ជាក់ថា កាលពីឆ្នាំ១៩៧៣ សមាជិកអង្គការOpep ចំនួន៦ប្រទេសនៅតំបន់ឈូងសមុទ្ទពែក្ស ក្នុងនោះមានអារ៉ាប៊ីសាអូឌីតមួយផង បានដំឡើងថ្លៃប្រេង ៧០% និងចេញក្រិត្យដាក់ទណ្ឌកម្មប្រទេសលោកខាងលិច ពីបទគាំទ្រអ៊ីស្រាអែល។ ទណ្ឌកម្មនោះបានជំរុញឱ្យតម្លៃប្រេងឥន្ធនៈឡើងថ្លៃខ្លាំង និងមានវិបត្តិប្រេងពិភពលោកយ៉ាងធ្ងន់ធ្ងរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ