តើក្រុមជីហាតនៃអង្គការរដ្ឋអ៊ីស្លាមរាលដាលឆ្លងចូលទៅដល់អាហ្វហ្កានីស្ថាន?
ចុះផ្សាយនៅថ្ងៃ៖
ស្តាប់ - ០៤:១២
អាហ្វហ្កានីស្ថានបានទទួលរងអំពើភេរវកម្ម កាលពីថ្ងៃសៅរ៍ ទី ១៨មេសា ដែលបានផ្តាច់ជីវិតជនស៊ីវិល ៣៤នាក់ និងបង្កឲ្យមានអ្នករបួស ជាង ១០០នាក់។ អំពើភេរវកម្មសម្លាប់ជីវិតមនុស្សមិនមែនជារឿងថ្មី នៅអាហ្វហ្កានីស្ថាន ជាទីដែលក្រុមប្រដាប់អាវុធតាលីបង់ ឧស្សាហ៍វាយប្រហារលើកងទ័ពរដ្ឋាភិបាល និងកម្លាំងទ័ពបរទេស។ ប៉ុន្តែ អ្វីដែលប្លែក ខុសពីមុន គឺលើកនេះ ក្រុមជីហាតនៃអង្គការរដ្ឋអ៊ីស្លាម ដែលកំពុងមានវត្តមាននៅ ប្រទេសស៊ីរី និងអ៊ីរ៉ាក់ បានប្រកាសទទួលខុសត្រូវលើការវាយប្រហារសម្លាប់ជីវិតមនុស្ស កាលពីថ្ងៃសៅរ៍។
នៅក្រោយអំពើភេរវកម្មវាយប្រហារទៅលើប្រជាជនស៊ីវិលដែលកំពុងឈរតម្រង់ជួរ ចាំដកលុយនៅធនាគារ ក្នុងទីក្រុងចាឡាឡាបាត ភាគខាងកើតអាហ្វហ្កានីស្ថាន គេឃើញក្រុមជីហាតនៃអង្គការរដ្ឋអ៊ីស្លាមបង្ហោះរូបថតអត្តឃាតជន នៅលើវិបសៃត៍។ ដោយផ្អែកលើចំណុចនេះហើយ ទើបប្រធានាធិបតីអាហ្វាហ្កានីស្ថាន លោកអាស្រាហ្វ ហ្កានី បានប្រកាសថា គឺក្រុមជីហាតនៃអង្គការរដ្ឋអ៊ីស្លាមជាអ្នកបង្កអំពើភេរវកម្មសម្លាប់ប្រជាជនស៊ីវិល កាលពីថ្ងៃសៅរ៍។
តើក្រុមជីហាតនៃអង្គការអ៊ីស្លាម ដែលកំពុងធ្វើសង្រ្គាមនៅស៊ីរី និងអ៊ីរ៉ាក់ ជាអ្នកនៅពីក្រោយការវាយប្រហារអំពើភេរវកម្មនោះមែន ឬយ៉ាងណា? រហូតមកដល់ពេលនេះ ក្រុមនេះនៅមិនទាន់បានប្រកាសជាផ្លូវការនោះទេ។ ចំណែក ក្រុមតាលីបង់វិញ គឺដូចទម្លាប់ចាស់ មិនដែលចេញមុខទទួលខុសត្រូវ នៅពេលអំពើភេរវកម្មសម្លាប់ជនស៊ីវិលនោះទេ។ ក្រុមឧទ្ទាមតាលីបង់ ដែលត្រូវទ័ពអាមេរិកបណ្តេញចេញពីអំណាច នៅឆ្នាំ ២០០១ មានគោលដៅវាយប្រហារតែទៅលើកងកម្លាំងបរទេស ដែលរក្សាសន្តិភាព នៅអាហ្វហ្កានីស្ថាន និងក្រុមទាហានអាហ្វហ្កានីស្ថានតែប៉ុណ្ណោះ។
បើគ្មានក្រុមណាមួយ ចេញមុខទទួលខុសត្រូវ ជាផ្លូវការ ហេតុអ្វី បានជាប្រធានាធិបតីថ្មីរបស់អាហ្វហ្កានីស្ថានប្រញាប់សន្និដ្ឋាន ថា គឺក្រុមជីហាតនៃអង្គការរដ្ឋអ៊ីស្លាមដែលជាបង្កភេរវកម្ម សម្លាប់មនុស្សកាលពីថ្ងៃសៅរ៍? សូម្បីតែក្រុមអ្នកជំនាញ និងមន្រ្តីក្នុងរដ្ឋាភិបាលអាហ្វហ្កានីស្ថាន ក៏ប្រយ័ត្នប្រយែង មិនទាន់ហ៊ានចោទថា អំពើភេរវកម្ម នៅទីក្រុងចាឡាឡាបាត ថា ជាស្នាដៃរបស់ក្រុមជីហាតនៃអង្គការរដ្ឋអ៊ីស្លាមដែរ។ រហូតមកដល់ពេលនេះ គ្មានភស្តុតាងណាមួយ ដែលបញ្ជាក់ថា ក្រុមជីហាតនៃអង្គការរដ្ឋអ៊ីស្លាម ឈរជើងបោះទីតាំងនៅក្នុងទឹកដីអាហ្វហ្កានីស្ថាននោះទេ។ បើនិយាយពីកត្តាភូមិសាស្រ្ត និងមនោគមវិជ្ជា អាហ្វហ្កានីស្ថាន មិនអាចជាទីតាំងយុទ្ធសាស្រ្តរបស់ក្រុមជីហាតបានទេ។ នេះបើតាមអ្នកជំនាញខាងប្រទេសអាហ្វហ្កានីស្ថាន លោកGraeme Smith។
តាមអ្នកជំនាញមួយចំនួន គេអាចជឿថា ការដែលប្រធានាធិបតីអាហ្វហ្កានីស្ថានប្រញាប់ប្រកាស សន្និដ្ឋានថា ក្រុមជីហាតជាអ្នកបង្កភេរវកម្ម កាលពីថ្ងៃសៅរ៍ ក៏ព្រោះតែលោកចង់ទាញចំណាប់អារម្មណ៍របស់អន្តរជាតិ។ អាហ្វហ្កានីស្ថានដែលត្រូវការទាំងជំនួយសេដ្ឋកិច្ច និងកងទ័ព ចង់បញ្ជាក់ថា ក្រៅតែពីតាលីបង់ នៅមានក្រុមជីហាត មួយទៀត ដែលគំរាមកំហែងសន្តិសុខអាហ្វហ្កានីស្ថាន។ ដូច្នេះ គេមិនត្រូវព្រងើយកន្តើយនោះទេ។
សព្វថ្ងៃនេះ កងទ័ពអាហ្វហ្កានីស្ថានកំពុងប្រឈមតទល់តែម្នាក់ នឹងក្រុមឧទ្ទាមតាលីបង់ បន្ទាប់ពីកម្លាំងទ័ពអូតង់ ដកអស់ពីអាហ្វហ្កានីស្ថាន កាលពីចុងខែឆ្នាំមុន។ កាលពីថ្ងៃអាទិត្យ នៅក្នុងដំណើរទស្សនកិច្ចទៅប្រទេសអ៊ីរ៉ង់ លោកប្រធានាធិបតី ហ្កានី ថែមទាំងស្វែងរកការសហការពីអ៊ីរ៉ង់ដើម្បីប្រយុទ្ធប្រឆាំងនឹងក្រុមជីហាតផងដែរ។
ជីហាត ឬតាលីបង់ គឺសុទ្ធតែជាក្រុមគ្រោះថ្នាក់ ដែលបង្កអន្តរាយដល់ជីវិតមនុស្សដូចគ្នា។ មួយរយៈចុងក្រោយនេះ ក្រុមតាលីបង់ ដែលបដិសេធមិនចរចាសន្តិភាពជាមួយរដ្ឋាភិបាល បានចាប់ផ្តើមវាយប្រហារជាច្រើនលើក ទៅលើទាហានអាហ្វហ្កានីស្ថាន។ ជាទម្លាប់របស់ក្រុមតាលីបង់ ដែលបើកការវាយប្រហារនៅ រដូវផ្ការីក បន្ទាប់ពីផ្អាកមួយរយៈនៅរដូវធ្លាក់ទឹកកក នៅអាហ្វហ្កានីស្ថាន។
តាមអ្នកជំនាញខ្លះទៀត បើទោះបីជាក្រុមជីហាតមិនមែនជាអ្នកបញ្ជា រៀបចំផែនការធ្វើភេរវកម្មសម្លាប់មនុស្សនៅអាហ្វហ្កានីស្ថាន ក៏ដោយ ប៉ុន្តែ ក្រុមនេះអាចទទួលបានសមានចិត្តពីក្រុមប្រដាប់អាវុធ នៅក្នុងទឹកដីអាហ្វហ្កានីស្ថាន ដូចជាពួកតាលីបង់ ឬសមាជិករបស់អាល់កៃដាជាដើម ដែលមួយរយៈចុងក្រោយនេះ ត្រូវគេកត់សំគាល់ឃើញថា បានលើកគ្រវីទង់ពណ៌ខ្មៅ របស់ក្រុមជីហាត នៃអង្គការរដ្ឋអ៊ីស្លាម។
អាហ្វហ្កានីស្ថានជាទីកំណើត កកើតបណ្តាញអាល់កៃដា និងក្រុមតាលីបង់ក៏ពិតមែន ប៉ុន្តែ គេសង្កេតឃើញថា ការផ្សព្វផ្សាយរបស់ក្រុមជីហាតបានទាក់ទាញក្រុមប្រដាប់អាវុធតាលីបង់មួយចំនួនឲ្យប្រកាសភ្ជាប់ខ្លួនទៅក្រុមជីហាតនៃអង្គការរដ្ឋអ៊ីស្លាម។ គេអាចជឿថា សមាជិករបស់ក្រុមតាលីបង់ ឬអាល់កៃដា មួយចំនួន ដែលចង់ចុះចូលក្នុងក្រុមជីហាតនៃអង្គការរដ្ឋអ៊ីស្លាម អាចបង្កអំពើភេរវកម្ម សម្លាប់មនុស្សយ៉ាងសាហាវ ដូចដែលក្រុមជីហាតធ្វើកន្លងមក ដើម្បី ទាក់ទឹកចិត្តឲ្យក្រុមនេះយកខ្លួនជាសមាជិក។ ក្រុមតាលីបង់ជឿថា ក្រុមជីហាតពេលនេះ កំពុងមានអំណាច មានលុយពេញដៃ សម្រាប់ធ្វើសង្រ្គាមប្រឆាំងនឹងបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ