ប្រធានធិបតីថ្មីរបស់អាហ្វហ្កានីស្ថានថ្លែងដឹងគុណអាមេរិក
នៅប៉ុន្មានម៉ោងមុននេះលោក Ashraf Ghani ប្រធានាធិបតីថ្មីរបស់ប្រទេសអាហ្កានីស្ថានថ្លែងទៅកាន់សភាអាមេរិកដែលជាវេទិការដ៏មានកិត្យានុភាព និងជាឧឡារិកសម្រាប់មេដឹកនាំបរទេសជាមិត្តរបស់អាមេរិក។ នៅចំពោះមុខសមាជិកសភា និងព្រឹទ្ធសភាអាមេរិក លោក Ghani ថ្លែងពីការដឹងគុណរបស់ប្រទេសអាហ្វហ្កានីស្ថានចំពោះពលរដ្ឋអាមេរិកដែលគំាទ្រ និងស្វែងរកសេរីភាពជូនអាហ្កានីស្ថាន។
ចុះផ្សាយនៅថ្ងៃ៖
ស្តាប់ - ០២:៣៣
«លើសពីអ្វីៗទាំងអស់ ខ្ញុំសូមចាប់ផ្តើមដោយអរគុណពលរដ្ឋសហរដ្ឋអាមេរិក ចំពោះការគាំទ្រដ៏សប្បុរស ដល់ប្រទេសរបស់ខ្ញុំ ដែលការគាំទ្រនេះមានតម្លៃដ៏ធំសម្បើម និងជួយឲ្យអាហ្វហ្កានីស្ថានបោះជំហានទៅមុខក្នុងបុព្វហេតុនៃសេរីភាព»។ នេះសេចក្តីផ្តើមនៃបទសុន្ទរកថាប្រហែលមួយម៉ោងថ្លែងទៅកាន់សភាពេញអង្គអាមេរិកដែលរួមប្រជុំគ្នា ទាំងសមាជិកសភា និងព្រឹទ្ធភា។ លោក Ghani បានថ្លែងថា ប្រទេសរបស់លោកបានកោតសរសើរ និងវាយតម្លៃខ្ពស់ចំពោះ «ភាពក្លាហាន របស់ទាហាន និងការលះបង់បូជាយ៉ាងច្រើនដែលពលរដ្ឋអាមេរិកបានធ្វើដើម្បីឲ្យអាហ្វហ្កានីស្ថានរក្សាបាននូវសេរីភាព»។
ក្នុងកិច្ចទទួលស្វាគមន៍យ៉ាងកក់ក្តៅនាឱកាសសម័យប្រជុំសភារួមគ្នានោះ លោក Ghani បានកោតសរសើរលោកប្រធានាធិបតីបារ៉ាក់អូបាម៉ាសម្រាប់វិធីសាស្ដ្រប្រកបដោយវិន័យ និងច្បាស់លាស់ក្នុងការចូលរួមរបស់អាមេរិក និងសម្រាប់ការដកកងទ័ពអាមេរិកជាងមួយសែននាក់។ សូមរំលឹកផងដែរថា ការថ្លែងនេះគឺប្រព្រឹត្តទៅមួយថ្ងៃ ក្រោយការប្រកាសរបស់លោកប្រធានាធិបតីអូបាម៉ាដែលថានឹងរក្សាទ័ពអាមេរិកចំនួន៩៨០០នៅអាហ្វហ្កានីស្ថានដដែលរហូតដល់ចុងឆ្នាំ២០១៥ ខុសអំពី គម្រោងដើមដែលថានឹងកាត់ឲ្យមកនៅត្រឹមតែចំនួន ៥៥០០នាក់។ ការរក្សាចំនួននេះជាការឆ្លើយតបតាមការស្នើសុំរបស់លោកប្រធានាធិបតី Ghani ដើម្បីនៅជួយគាំទ្រប្រឆាំងភេរវកម្ម និងផ្តល់មធ្យោបាយបច្ចេកទេសយោធាក្នុងដំណើរការសន្តិភាពនៅអាហ្វហ្កានីស្ថាន។
លោក Ghani ក៏បានរំលឹកផងដែរពីសោកនាដកម្មថ្ងៃ១១ កញ្ញារបស់អាមេរិក និងបានប្តេជ្ញាថា៖ ប្រទេស របស់យើងខ្ញុំនឹងលែងក្លាយជាជម្រករបស់ភេរវជនទៀត ជាដាច់ខាត។ ហើយយើងក៏លែងផ្តល់ទីលាក់ ខ្លួនដល់ពួកជ្រុលនិយមដើម្បីរៀបចំគម្រោងបំភ្លេចបំផ្លាញរបស់ពួកគេទៀតដែរ។ ប្រទេសអាហ្វហ្កានីស្ថានបានចូលរួមជាមួយនឹងប្រទេសនៅមជ្ឈិមបូព៌ាដែលបដិសេធចំពោះការមិនអត់ឱនភាពជ្រុលនិយម និងការធ្វើសង្គ្រាម។ សុន្ទរកថារបស់ Ghani នៅសភាអាមេរិកនៅពេលនេះ ជានិមិត្តរូបនៃបើកទំព័រថ្មីមួយក្នុងទំនាក់ទំនង រវាងអាមេរិកនិងអាហ្វហ្គានីស្ថាន។ ព្រោះប្រធានាធិបតីមុនលោក Hamid Karzaï មាន ទំនាក់ទំនងដ៏រឹង ថ្អឹងជាមួយសេតវិមាន ដែលបានបង្កភាពស្មុគស្មាញបន្ថែមលើសង្គ្រាមដ៏យូរបំផុតរួចទៅហើយរបស់សហរដ្ឋអាមេរិក ដែលបណ្តាលឲ្យទាហានអាមេរិកជាង២៣០០នាក់ស្លាប់ និង រាប់ម៉ឺននាក់ទៀតបានរងរបួស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ