ប៉ាឡេស្ទីនដាក់ពាក្យសុំជាផ្លូវការ ចូលជាសមាជិកតុលាការព្រហ្មទណ្ឌអន្តរជាតិ
អាជ្ញាធរប៉ាឡេស្ទីន បានធ្វើការស្នើសុំ ជាផ្លូវការ ដើម្បីបានចូលជាសមាជិក របស់តុលាការព្រហ្មទណ្ឌអន្តរជាតិ។ បើបានសម្រេច ប៉ាឡេស្ទីន និងមានលទ្ធភាព អាចដាក់ពាក្យប្តឹង ទៅតុលាការនេះ ដើម្បីនាំយកមេដឹកនាំអ៊ីស្រាអែល មកកាត់ទោស ពីបទឧក្រិដ្ឋកម្មប្រឆាំងមនុស្សជាតិ។ អង្គការសហប្រជាជាតិ មិនទាន់សម្រេចនៅឡើយទេ ប៉ុន្តែអ៊ីស្រាអែល និង អាមេរិកមានការក្រេវក្រោធយ៉ាងខ្លាំង ព្រោះទង្វើនេះ កាន់តែធ្វើឲ្យ អ៊ីស្រាអែល និងប៉ាឡេស្ទីន មើលមុខគ្នាមិនត្រង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
ពាក្យសុំចូលជាសមាជិក របស់តុលាការព្រហ្មទណ្ឌអន្តរជាតិ ដែលលោក ម៉ាមូដ អាប្បាស បានចុះហត្ថលេខា ពេលនេះ បានទៅដល់ដៃ លោក បាន គីមូន អគ្គលេខាធិការអង្គការសហប្រជាជាតិហើយ។ គេកំពុងរង់ចាំ ស្តាប់ ថាតើពាក្យសុំនេះ នឹងត្រូវអង្គការសហប្រជាជាតិ យល់ព្រមដែរឬទេ។ បើសិនជា ប៉ាឡេស្ទីន អាចចូលជាសមាជិករបស់តុលាការព្រហ្មទណ្ឌអន្តរជាតិ បានសម្រេច មានន័យថា ប៉ាឡេស្ទីន នឹងមានលទ្ធភាពដាក់ពាក្យបណ្តឹងផ្សេងៗ ទៅតុលាការនេះ។
លោក ម៉ាមូដ អាប្បាស ប្រមុខដឹកនាំ ដែនដីប៉ាឡេស្ទីន ធ្លាប់បានប្រាប់ហើយថា លោកមានចេតនា រកយុត្តិធម៌ ជូនប្រជាជនប៉ាឡេស្ទីន ដែលបានស្លាប់ ដោយសារគ្រាប់ផ្លោងរបស់ អ៊ីស្រាអែល។ ដូច្នេះ លោក មានគម្រោងដាក់ពាក្យ ប្តឹង អ៊ីស្រាអែល នៅចំពោះមុខតុលាការព្រហ្មទណ្ឌអន្តរជាតិ ពីបទ ឧក្រិដ្ឋកម្មប្រឆាំងមនុស្សជាតិ។
អ៊ីស្រាអែល បានសម្តែង ការមិនពេញចិត្តជាខ្លាំង ក្រោយដឹងដំណឹង ដែលថា ប៉ាឡេស្ទីន បានដាក់ពាក្យសុំចូល ជាសមាជិក របស់តុលាការព្រហ្មទណ្ឌអន្តរជាតិ។ អ៊ីស្រាអែល ទាមទារ ឲ្យទាត់ចោល ពាក្យស្នើសុំនេះ ព្រោះថា ប៉ាឡេស្ទីន មិនមែនជាប្រទេសទេ ដូច្នេះ មិនមានសិទ្ធិចូលជាសមាជិកតុលាការនេះទេ។ លោកនេតាន់ យ៉ាហ៊ូ នាយករដ្ឋមន្រ្តី អ៊ីស្រាអែល បានថ្លែងទៀតថា ក្រុមហាម៉ាស ប៉ាឡេស្ទីន ជាក្រុមភេរវករ ដែលបានប្រព្រឹត្តអំពើភេរវកម្ម លើអ៊ីស្រាអែល ច្រើនរាប់មិនអស់។ ដូចនេះ គេមិនអាចអនុញ្ញាត ឲ្យក្រុមភេរវករ ក្លាយជាសមាជិក តុលាការព្រហ្មទណ្ឌអន្តរជាតិបានទេ។
ចំណែករដ្ឋាភិបាល អាមេរិក ដែលជាគូកន ចាក់ទឹកមិនលិចជាមួយអ៊ីស្រាអែល វិញ ក៏បានសម្តែងការមិនពេញចិត្តដែរ។ អាមេរិកយល់ថា ទង្វើនេះ វាប្រៀបបានដូចជា ផ្លុំរងើកភ្លើងដែល កំពុងតែរលត់ ឲ្យឆាបឆេះឡើងវិញ។ ពោល គឺវាធ្វើឲ្យ អ៊ីស្រាអែល និងប៉ាឡេស្ទីន មើលមុខគ្នា កាន់តែមិនត្រង់។ សន្តិភាពរវាងភាគីទាំងពីរ គឺត្រូវធ្វើឡើង តាមរយៈការចរចា សម្រុះសម្រួលគ្នា មិនមែនតាមរយៈការប្តឹងផ្តល់គ្នានោះទេ។
យ៉ាងណាក៏ដោយ ពាក្យសុំរបស់ ប៉ាឡេស្ទីន អាចមានសំណាង ទទួលបានការ យល់ព្រម ព្រោះប៉ាឡេស្ទីន បានបំពេញគ្រប់លក្ខខណ្ឌ។ ថ្វីត្បិតតែប៉ាឡេស្ទីន មិនមែនជាប្រទេសសមាជិកពេញសិទ្ធិ របស់ អង្គការសហប្រជាជាតិមែនពិត តែអង្គការនេះ បានតែងតាំង ប៉ាឡេស្ទីន ជាសមាជិកសង្កេតការណ៍ តាំងពីឆ្នាំ២០១២ ម្ល៉េះ។ ទាក់ទិនទៅនឹងអំណះអំណាង របស់លោក នេតាន់ យ៉ាហ៊ូ ដែលថា ក្រុមហាម៉ាស ប៉ាឡេស្ទីន ជាក្រុមភេរវករ ក៏មិនអាចយកជាការបានដែរ ព្រោះថ្មីៗនេះ តុលាការសមាគមអឺរ៉ុប ទើបតែ បានចេញសាលដីការ លុបក្រុមហាម៉ាស ប៉ាឡេស្ទីន ចេញពីបញ្ជីរក្រុមភេរវករ។ យើងឃើញថា សង្គ្រាមការទូត របស់ប៉ាឡេស្ទីន កំពុងហុចផល ជាសន្សឹមៗហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ