អ៊ីស្រាអែលផ្អាកមិនផ្ទេរលុយទៅឲ្យប៉ាឡេស្ទីន និងសន្យាការពារកងទ័ពមិនឲ្យគេយកទៅកាត់ទោសនៅCPI
អស់ពីពាក្យគំរាមកំហែង អ៊ីស្រាអែលចាប់ផ្តើមធ្វើសកម្មភាពជាក់ស្តែងដើម្បីដាក់ពិន័យប៉ាឡេស្ទីន។ កាលពីសៅរ៍ ពោលគឺនៅមួយថ្ងៃក្រោយប៉ាឡេស្ទីនដាក់ពាក្យសុំជាផ្លូវការ ដើម្បីចូលជាសមាជិករបស់តុលាការព្រហ្មទណ្ឌអន្តរជាតិ មន្រ្តី អ៊ីស្រាអែលបានអះអាងថា រដ្ឋាភិបាលនឹងដាក់ពិន័យលើប៉ាឡេស្ទីន ដោយនឹងផ្អឹប មិនបញ្ជូនថវិកាប្រចាំខែ ជាង ១០០លានអឺរ៉ូ ទៅឲ្យប៉ាឡេស្ទីននៅខែក្រោយនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
អ៊ីស្រាអែលបានចាត់វិធានការក្តៅ សងសឹកនឹងប៉ាឡេស្ទីនដែលនៅតែចចេសដាក់ពាក្យសុំជាសមាជិករបស់តុលាការព្រហ្មទណ្ឌអន្តរជាតិ។ យោងតាមមន្រ្តីរដ្ឋាភិបាលអ៊ីស្រាអែលដែលសុំមិនបញ្ចេញឈ្មោះ លោកនាយករដ្ឋមន្រ្តីបិនចាមីន នេតានីញ៉ាហ៊ូ បានកោះប្រជុំគណៈរដ្ឋមន្រ្តីតាំងពីថ្ងៃព្រហស្បតិ៍ ដើម្បីនិយាយពីការដាក់ទណ្ឌកម្មទៅលើប៉ាឡេស្ទីន។ ទើបតែនៅថ្ងៃសៅរ៍ គឺនៅក្រោយដឹងថា ប៉ាឡេស្ទីនបានដាក់ពាក្យសុំជាផ្លូវការ អ៊ីស្រាអែលក៏ចាប់ប្រកាសពីការផ្អឹបទុក មិនផ្ទេរថវិកា១០៦លានអឺរ៉ូទៅឲ្យរដ្ឋអំណាចប៉ាឡេស្ទីន និងប្រកាសគំរាមប្តឹងមេដឹកនាំប៉ាឡេស្ទីនទៅតុលាការនៅអាមេរិក ឬនៅប្រទេសផ្សេង ពីបទឧក្រិដ្ឋកម្មប្រឆាំងមនុស្សជាតិ។
នៅថ្ងៃអាទិត្យនេះដែរ នាយករដ្ឋមន្រ្តីអ៊ីស្រាអែល បិនចាមីន នេតានីញ៉ាហ៊ូ បានប្រកាសនៅក្នុងអំឡុងកិច្ចប្រជុំប្រចាំសប្តាហ៍ថា អ៊ីស្រាអែលនឹងមិនព្រម អនុញ្ញាតឲ្យទាហានរបស់ខ្លួន ត្រូវគេយកទៅជំនុំជម្រះនៅតុលាការព្រហ្មទណ្ឌអន្តរជាតិទេ។ “កងកម្លាំងការពារជាតិអ៊ីស្រាអែលនឹងនៅតែបន្តការពារអ៊ីស្រាអែលជាមួយនឹងការប្តេជ្ញាខ្ពស់។ ទាហានអ៊ីស្រាអែលការពារពួកយើង ដូច្នេះ យើងត្រូវតែការពារពួកគេ ជាមួយនឹងការប្តេជ្ញា យ៉ាងមោះមុត”។ នេះជាសំដីរបស់លោកនាយករដ្ឋមន្រ្តី អ៊ីស្រាអែល បិនចាមីន នេតានីញ៉ាហ៊ូ។
យោងតាមកិច្ចព្រមព្រៀងក្រុងអូស្លូ ឆ្នាំ ១៩៩៣ ដែលនិយាយពីស្វ័យភាព អ៊ីស្រាអែលមានភារកិច្ចប្រមូលពន្ធលើទំនិញដែលត្រូវដឹកជញ្ជូនទៅក្នុងទឹកដីប៉ាឡេស្ទីន ជំនួសឲ្យប៉ាឡេស្ទីន (រាល់ទំនិញនាំចូលត្រូវឆ្លងកាត់តាមកំពង់ផែអ៊ីស្រាអែល)។ ជារៀងរាល់ខែ អ៊ីស្រាអែលត្រូវផ្ទេរមូលនិធិប្រមាណជាង ១០០លានអឺរ៉ូ ទៅឲ្យរដ្ឋអំណាចប៉ាឡេស្ទីន។
ការសម្រេចរបស់អ៊ីស្រាអែលកាលពីថ្ងៃសៅរ៍បានបង្កឲ្យមានការខឹង ថ្កោលទោសពីសំណាក់អាជ្ញាធរប៉ាឡេស្ទីន។ ប្រធានផ្នែកចរចារបស់ប៉ាឡេស្ទីន លោកSaëb Erakatបានចាត់ទុកចំណាត់ការរបស់អ៊ីស្រាអែលថា ជាឧក្រិដ្ឋកម្មសង្រ្គាមមួយទៀត ដែលអ៊ីស្រាអែលធ្វើទៅលើប្រជាជនប៉ាឡេស្ទីន ព្រោះថា លុយទាំងនោះជាលុយរបស់ប្រជាជនប៉ាឡេស្ទីន ដែលអ៊ីស្រាអែលគ្រាន់តែត្រូវប្រមូលជំនួសតែប៉ុណ្ណោះ។ ពន្ធដែលអ៊ីស្រាអែលប្រមូលបាន និងបញ្ជូនទៅឲ្យប៉ាឡេស្ទីន ជារៀងរាល់ខែ មានសារៈសំខាន់ណាស់សម្រាប់សេដ្ឋកិច្ចប៉ាឡេស្ទីន ព្រោះវាតំណាងឲ្យជិតពាក់កណ្តាលនៃថវិកាជាតិរបស់ប៉ាឡេស្ទីន។
នយោបាយផ្អឹប មិនបញ្ជូនលុយទៅឲ្យប៉ាឡេស្ទីន ត្រូវបានអ៊ីស្រាអែលធ្វើដដែលៗ ជាច្រើនដង ដើម្បីដាក់សម្ពាធលើប៉ាឡេស្ទីន។ កាលពីខែឆ្នាំ ២០១២ អ៊ីស្រាអែលបានផ្អាកមិនបញ្ជូនលុយទៅឲ្យប៉ាឡេស្ទីន បន្ទាប់ ពីប៉ាឡេស្ទីនបានទទួលសិទ្ធិជាសមាជិកសង្កេតការណ៍របស់អង្គការសហប្រជាជាតិ។
អ៊ីស្រាអែល មិនចង់ឲ្យប៉ាឡេស្ទីនសុំចូលជាសមាជិករបស់តុលាការព្រហ្មទណ្ឌអន្តរជាតិ ព្រោះថា បើសិនជា ប៉ាឡេស្ទីន អាចចូលជាសមាជិករបស់តុលាការព្រហ្មទណ្ឌអន្តរជាតិ បានសម្រេច មានន័យថា ប៉ាឡេស្ទីន នឹងមានលទ្ធភាពដាក់ពាក្យបណ្តឹង ប្តឹងមេដឹកនាំអ៊ីស្រាអែលពីបទឧក្រិដ្ឋកម្មប្រឆាំងមនុស្សជាតិទៅតុលាការCPI។
អាមេរិកវិញ ដែលប្រឆាំងនឹងវិធានការឯកតោភាគីរបស់ប៉ាឡេស្ទីន បានព្រមានរួចហើយថា នឹងផ្តាច់ជំនួយ ៤០០លានដុល្លារ ដែលអាមេរិកផ្តល់ទៅឲ្យប៉ាឡេស្ទីន ជារៀងរាល់ឆ្នាំ បើសិនជាប៉ាឡេស្ទីនចង់ប្តឹងអ៊ីស្រាអែលតាមផ្លូវតុលាការអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ