ហេតុអ្វីបានជាកម្លាំងសម្ព័ន្ធមិត្តចង់បើកសមរភូមិថ្មីនៅលីប៊ីដើម្បីប្រឆាំងអង្គការរដ្ឋអ៊ីស្លាម?
ចុះផ្សាយនៅថ្ងៃ៖
ស្តាប់ - ០៥:០០
នៅថ្ងៃអង្គារ ទី២ កុម្ភៈ ក្រុមប្រទេសនៅក្នុងសម្ព័ន្ធមិត្តប្រឆាំងអង្គការរដ្ឋអ៊ីស្លាម ដឹកនាំដោយអាមេរិកបានរួមប្រជុំគ្នាក្នុងទីក្រុងរ៉ូម ប្រទេសអ៊ីតាលី។ គោលដៅនៃកិច្ចប្រជុំ គឺដើម្បីធ្វើតុល្យការ និងពិនិត្យមើលស្ថានភាពរួមស្តីពីយុទ្ធនាការប្រយុទ្ធប្រឆាំងអង្គការរដ្ឋអ៊ីស្លាមនៅលើសមរភូមិក្នុងប្រទេសអ៊ីរ៉ាក់ និងស៊ីរី។ តែអ្វីក្រុមសម្ព័ន្ធមិត្តកំពុងគិតគូរដោយយកចិត្តទុកដាក់យ៉ាងខ្លាំងពេលនេះ គឺការបើកសមរភូមិថ្មីប្រឆាំងអង្គការរដ្ឋអ៊ីស្លាមនៅក្នុងប្រទេសលីប៊ី។ ហេតុអ្វីបានជាជ្រើសយកប្រទេសលីប៊ី?
« ការពារប្រសើរជាងព្យាបាល » និង « ប្រដៅមនុស្សទាន់នៅក្មេង » គឺពាក្យស្លោកទាំងពីរខាងនេះហើយដែលសម្ព័ន្ធមិត្តប្រឆាំងអង្គការរដ្ឋអ៊ីស្លាមយកមកប្រើដើម្បីត្រៀមបើកសមរភូមិថ្មីប្រឆាំងពួកជីហាតអង្គការរដ្ឋអ៊ីស្លាមនៅក្នុងប្រទេសលីប៊ី។ ជម្រើសយកលីប៊ីដើម្បីបើកសមរភូមិថ្មីប្រឆាំងអង្គការរដ្ឋអ៊ីស្លាមមិនមែនជាជម្រើសចៃដន្យទេ មិនចៃដន្យព្រោះទី១ សហគមន៍អន្តរជាតិកំពុងព្រួយបារម្ភយ៉ាងខ្លាំងចំពោះវិបត្តិនយោបាយផ្ទៃក្នុងដែលនៅមិនទាន់មានច្រកចេញ និងទី២ គឺការកើនឡើងជាលំដាប់នៃចំនួនជីហាតអង្គការរដ្ឋអ៊ីស្លាម និងឥទ្ធិពលរបស់អង្គការភេរវនិយមមួយនេះក្នុងទឹកដីលីប៊ី។
មែនទែនទៅ កំណើននៃចំនួនជីហាត និងឥទ្ធិពលរបស់អង្គការរដ្ឋអ៊ីស្លាមនៅលីប៊ីសព្វថ្ងៃ ក៏ដោយសារតែប្រទេសអាហ្រ្វិកមួយនេះកំពុងបន្តហែកហួរគ្នាយ៉ាងខ្លាំង។ សូមជម្រាបជូនថា តាំងពីក្រោយការផ្តួលរំលំរបបផ្តាច់ការដឹកនាំដោយកាដាហ្វីក្នុងឆ្នាំ ២០១១ មក លីប៊ីត្រូវបានពុះចែកជាពីរ នៅម្ខាង គឺរដ្ឋាភិបាលបណ្តោះអាសន្នកើតចេញពីបដិវត្តន៍ប្រជាជានមានទីតាំងនៅក្នុងទីក្រុងតូព្រុក និងទទួលស្គាល់ដោយសហគមន៍អន្តរជាតិ រីឯនៅម្ខាងទៀត គឺរដ្ឋាភិបាលដឹកនំាដោយក្រុមអ៊ីស្លាមនិយមជ្រុលមានទីតាំងនៅក្នុងទីក្រុងទ្រីប៉ូលី និងដែលសហគមន៍អន្តរជាតិមិនបានទទួលស្គាល់ទេ។
ការប្រឈមមុខដាក់គ្នារវាងភាគីជម្លោះទាំងពីរដើម្បីក្រសោបអំណាចគ្រប់គ្រងប្រទេសនារយៈពេលប៉ុន្មានឆ្នាំកន្លងទៅ បានធ្វើឲ្យស្ថានការណ៍ក្នុងប្រទេសកាន់តែធ្លាក់ដុនដាបទៅៗពីមួយថ្ងៃទៅមួយថ្ងៃ ទាំងនៅក្នុងផ្នែកសន្តិសុខ និងសេដ្ឋកិច្ច។ កាលពីថ្ងៃទី១៧ ធ្នូ ឆ្នាំ ២០១៥ និងក្រោមគំនិតផ្តួចផ្តើមរបស់អង្គការសហប្រជាជាតិ រដ្ឋាភិបាលទាំងពីរបានចុះហត្ថលេខាលើកិច្ចព្រមព្រៀងមួយដើម្បីបង្កើតឲ្យមានរដ្ឋាភិបាលឯកភាពជាតិមួយនៅដំណាច់ខែមករាកន្លងទៅ។
តែពេលនេះឈានចូលដល់ខែកុម្ភៈទៅហើយ រដ្ឋាភិបាលឯកភាពជាតិនៅតែគ្មានរូបរាង សូម្បីតែស្រមោលក៏គ្មានដែរ។ ផ្ទុយទៅវិញ អ្នកដែលបានឆក់ឱកាសទាញចំណេញពីការបែកបាក់ផ្ទៃក្នុងនៅលីប៊ីសព្វថ្ងៃ គឺគ្មាននរណាក្រៅអង្គការរដ្ឋអ៊ីស្លាមទេ។ ត្រង់ចំណុចនេះ សហគមន៍ពិតជាយល់មិនច្រឡំទេថា ការទុកបណ្តោយឲ្យលីប៊ីបន្តធ្លាក់ក្នុងវិបត្តិផ្ទៃក្នុង មានន័យស្មើនឹងទុកបណ្តោយឲ្យអង្គការរដ្ឋអ៊ីស្លាមឡើងសោយរាជ្យ។ គឺនៅក្នុងន័យនេះហើយបានជាក្រុមសម្ព័ន្ធមិត្តប្រឆាំងអង្គការរដ្ឋអ៊ីស្លាមយល់ឃើញថា វាជារឿងបន្ទាន់បំផុតដែលត្រូវបើកសមរភូមិថ្មីនៅលីប៊ីដើម្បីកំចាត់ពួកនេះ។ បើពុំនោះសោតទេ គឺប្រទេសលីប៊ីទាំងមូលតែម្តងដែលនឹងក្លាយជាជង្រុករបស់អង្គការរដ្ឋអ៊ីស្លាម។
ការទុកបណ្តោយឲ្យអង្គការរដ្ឋអ៊ីស្លាមសោយរាជ្យនៅលីប៊ីមិនមែនជាគ្រោះថ្នាក់សម្រាប់លីប៊ីតែមួយទេ តែវានឹងបង្កគ្រោះថ្នាក់ដល់តំបន់ និងពិភពលោកទាំងមូល។ ក្រុមប្រទេសសម្ព័ន្ធមិត្តអន្តរជាតិប្រឆាំងអង្គការរដ្ឋអ៊ីស្លាមបានយល់ឃើញដូចគ្នាថា អន្តរាគមន៍នៅលីប៊ីត្រូវតែធ្វើឡើងដូចអន្តរាគមន៍នៅអ៊ីរ៉ាក់ និងស៊ីរី ពោលជាអន្តរាគមន៍ផ្លូវអាកាស ការប្រើយន្តហោះគ្មានមនុស្សបើកបរ និងការបញ្ជូនកម្លាំងពិសេសនៅនឹងកន្លែង ព្រមទាំងមានមានជំនួយពីកម្លាំងលីប៊ីក្នុងស្រុក។ គោលដៅរបស់ក្រុមសម្ព័ន្ធមិត្ត គឺវាយប្រហារឲ្យចំទីតាំងរបស់ពួកជីហាតរដ្ឋអ៊ីស្លាមដើម្បីចៀសវាងការស្លាប់ជនស៊ីវិលស្លូតត្រង់។
នៅក្នុងចំណោមប្រទេសសម្ព័ន្ធមិត្ត អាមេរិកហាក់ដូចជាសម្រេចចិត្តមុនគេ តែមិនចង់ក្លាយជាអ្នកដឹកនាំម្នាក់ឯងដូចដែលខ្លួនបានធ្វើនៅអ៊ីរ៉ាក់ និងស៊ីរីទេ។ អាមេរិកចង់មានការសហការណ៍រួមគ្នាពីប្រទេសអ៊ីតាលីដែលជាអតីតម្ចាស់អាណានិគមលីប៊ី ប្រទេសបារាំង ប្រទេសអង់គ្លេស និងប្រហែលជាមានប្រទេសអារ៉ាប់មួយចំនួន។ តែយ៉ាងណាក៏ដោយ សំណួរដែលកំពុងបន្តចោទឡើងដោយនៅមិនទាន់មានចម្លើយពេលនេះគឺថា តើអន្តរាគមន៍របស់កម្លាំងសម្ព័ន្ធមិត្តអាចនឹងចាប់ផ្តើមនៅពេលណា និងក្រោមទ្រង់ទ្រាយយ៉ាងម៉េចខ្លះ?។
ជាការពិត ក្រុមប្រទេសសម្ព័ន្ធមិត្តបានយល់ដូចគ្នាពីភាពចាំបាច់ និងបន្ទាន់ដែលគេត្រូវទប់ស្កាត់ការឡើងឥទ្ធិពលរបស់អង្គការរដ្ឋអ៊ីស្លាមនៅក្នុងប្រទេសលីប៊ី។ តែអ្វីដែលគ្រប់ភាគីជម្លោះផ្ទៃក្នុងលីប៊ីមិនចង់ឃើញនោះ គឺការប្រែក្លាយអន្តរគមន៍យោធារបស់កម្លាំងសម្ព័ន្ធមិត្តលើអង្គការរដ្ឋអ៊ីស្លាមទៅជាមធ្យាបាយដើម្បីដំណោះស្រាយវិបត្តិផ្ទៃក្នុងនៅលីប៊ី។ សម្រាប់ប្រទេសខ្លះនៅក្នុងក្រុមប្រទេសសម្ព័ន្ធមិត្ត ពិសេសបារាំងបានបញ្ជាក់ថា អ្វីដែលសំខាន់នៅចំពោះមុខ គឺមិនមែនអន្តរាគមន៍យោធានៅលីប៊ីទេ តែគឺការពង្រឹងរដ្ឋាភិបាលបង្រួបបង្រួមជាតិមួយដើម្បីឲ្យលីប៊ីនិយាយសម្លេងតែមួយ។
ការយល់ឃើញរបស់បារាំងពិតជាមិនខុសទេ ព្រោះថា ស្ថិរភាពនយោបាយនៅលីប៊ីអាចជាបច្ច័យមួយដ៏សំខាន់ដើម្បីទប់ស្កាត់ការឡើងចាងរបស់អង្គការរដ្ឋអ៊ីស្លាម។ តែបើអន្តរាគមន៍យោធារបស់ក្រុមសម្ព័ន្ធមិត្តប្រឆាំងអង្គការរដ្ឋអ៊ីស្លាមធ្វើឡើងក្នុងពេលដែលលីប៊ីកំពុងប្រកាប់ប្រចាក់គ្នាឯងនោះ វានឹងរឹតតែធ្វើវិបត្តិនយោបាយលីប៊ីផុងខ្លួនកាន់តែជ្រៅទៅវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ