អាមេរិកចង់បន្ថែមការវាយលុកបំបែកក្រុមជីហាដអ៊ីស្លាមនៅលីប៊ី
ស្របពេលដែលក្រុមជីហាដអង្គការរដ្ឋអ៊ីស្លាម កំពុងតែថមថយកម្លាំង នៅស៊ីរីនិងនៅអ៊ីរ៉ាក់ នៅឯប្រទេសលីប៊ីឯណោះវិញ ក្រុមនេះហាក់កំពុងតែដណ្តើមបានដែនដីកាន់កាប់ កាន់តែច្រើន និងមានសន្ទុះខ្លាំងជាងមុនគួរឲ្យព្រួយបារម្ភ។ ក្នុងហេតុផលមិនចង់ឲ្យហួសពេល ហើយមិនចង់ឃើញលីប៊ី ក្លាយជាចំណីថ្មី របស់ពួកជីហាដអង្គការរដ្ឋអ៊ីស្លាម ដូចនៅស៊ីរី និងអ៊ីរ៉ាក់ នៅថ្ងៃសៅរ៍ ទី ៣០ មករា រដ្ឋាភិបាលលោកអូបាម៉ា បានបញ្ជាក់ពីគម្រោងថ្មីមួយ ថានឹងបើកការវាយប្រហារ នៅលីប៊ីបន្ថែមទៀត ដោយមានការចូលរួមពីប្រទេសសម្ព័ន្ធមិត្តផ្សេងទៀតផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៤៧
បើយើងនិយាយក្នុងន័យយុទ្ធសាស្ត្រ គម្រោងបើកបន្ថែមសមរភូមិនៅលីប៊ី គឺជារឿងមួយចំបាច់ ដើម្បីកម្ទេចក្រុមជីហាដអង្គការរដ្ឋអ៊ីស្លាម។ ទិសដៅរបស់ក្រុមនេះ គឺពង្រីកដែនដីកាន់កាប់ទូទាំងដំបន់ដើមបូព៌ាតែម្តង។ ដូច្នេះ បើសិនជាក្រុមនេះ ដណ្តើមបានមូលដ្ឋានកាន់តែធំ នៅរវាងស៊ីរី អេហ្ស៊ីប និងលីប៊ី បន្តិចម្តងៗ តំបន់ដើមបូព៌ា នឹងស្ថិតនៅក្នុងកណ្តាប់ដៃ របស់ពួកព្រៃផ្សៃនេះជាមិនខាន។
មិនចង់ឃើញលីប៊ីក្លាយជាចំណីរបស់ក្រុមជីហាដ ដូចនៅស៊ីរី និងអ៊ីរ៉ាក់៖
បើយើងក្រឡេកមើលទៅលើសមរភូមិស៊ីរី និងអ៊ីរ៉ាក់ យើងឃើញថាមួយរយៈចុងក្រោយនេះ ក្រុមជីហាដអង្គការរដ្ឋអ៊ីស្លាម កំពុងធ្លាក់ដៃ ហើយធ្វើការប្រយុទ្ធដកថយ ដោយសារតែការទំលាក់គ្រាប់បែករបស់ក្រុមសម្ព័ន្ធមិត្ត បានបំផ្លាញមូលដ្ឋានរបស់ក្រុមនេះជាច្រើនកន្លែង។ ក៏ប៉ុន្តែនៅឯសមរភូមិលីប៊ីវិញ ក្រុមនេះកំពុងតែឡើងដៃ ដោយសារតែគ្មាននរណា ទៅវាយជាមួយទេ គឺមានតែកងទ័ពលីប៊ី ដែលបែកខ្ញែកគ្នា គ្មានរដ្ឋាភិបាលគ្រប់គ្រងឲ្យត្រឹមត្រូវផងទេ។ ជាក់ស្តែង ចាប់តាំងពីចូលឆ្នាំ២០១៦នេះ ក្រុមជីហាដបានដណ្តើមមានតំបន់ សៀរត៏ ចំងាយ៤៥០គីឡូម៉ែត្រ ពីក្រុងទ្រីប៉ូលី រដ្ឋធានីរបស់លីប៊ី។ បើនៅតែបង្អង់ ក្រុមជីហាដអាចខិតមកកាន់តែជិតរដ្ឋធានីទ្រីប៉ូលី។
ហេតុដូច្នេះហើយ ទើបបានជាកាលពីថ្ងៃសុក្រ ទី២៩ មករា សេតវិមានបានធ្វើការប្រជុំបន្ទាន់ ដើម្បីរិះរកវិធីយកឈ្នះក្រុមនេះ។ និយាយដោយខ្លី ពេលនេះមិនមែនជាពេលត្រូវបន្ធូរដៃទេ តែជាពេលដែលត្រូវតែបន្ថែមកម្លាំង ក្នុងខណៈដែលក្រុមជីហាដកំពុងតែដកថយ នៅស៊ីរី និងអ៊ីរ៉ាក់។ អ្វីដែលថ្នាក់ដឹកនាំកងទ័ពអាមេរិកបានលើកឡើង គឺថាគេមិនចង់ឃើញលីប៊ី ក្លាយជាមូលដ្ឋានថ្មីរបស់ក្រុមនេះ បន្ទាប់ពីស៊ីរី និងអ៊ីរ៉ាក់ទេ។ បើតាមការសន្និដ្ឋាន ក្រុមជីហាដអង្គាររដ្ឋអ៊ីស្លាម មានកម្លាំងប្រហែលជា៣០០០នាក់នៅលីប៊ី។ កម្លាំងនេះអាចនឹងកើនឡើងថែមទៀត ព្រោះថាលីប៊ី ងាយស្រួលចេញចូលណាស់ ជាពិសេសគឺមានព្រំដែនជាប់ជាមួយប្រទេសច្រើននៅអាហ្វ្រិក ហើយសុទ្ធសឹងតែជាប្រទេស ដែលអាចជាផ្លូវឆ្លងកាត់បានយ៉ាងងាយស្រួល របស់ក្រុមជីហាដអ៊ីស្លាមនៅអាហ្វ្រិក។
មកត្រឹមពេលនេះ អ្វីៗស្ថិតនៅក្នុងការពិភាក្សានៅឡើយទេ។ គេមិនទាន់ប្រកដថា សហរដ្ឋអាមេរិក និងបញ្ជូនកងទ័ពជើងគោកទៅលីប៊ី រឺមួយក៏ត្រឹមតែបញ្ជូនយន្តហោះទៅទម្លាក់គ្រាប់នោះទេ។ បើតាមព័ត៌មានបឋម មន្ទីរប៉ង់តាហ្គោន អាចនឹងបញ្ជូនកងទ័ពអាកាសទៅទម្លាក់គ្រាប់ ដូចនៅស៊ីរី និងនៅអ៊ីរ៉ាក់ ហើយនឹងបន្ថែមពីនេះ និងចូលរួមជាមួយកម្លាំងថ្មើរជើង ជាមួយនឹងកងកម្លាំង ដែលដឹកនាំដោយអង្គការសហប្រជាជាតិ។
លីប៊ីត្រូវតែមានរដ្ឋាភិបាលរួបរួមជាតិមួយ ជាបន្ទាន់៖
តាមពិតទៅ ប៉ុន្មានខែចុងក្រោយនេះ ក្រសួងការពារជាតិអាមេរិក បានបញ្ជូនកម្លាំងជាក្រុមតូចៗច្រើនក្រុមមកហើយ ឲ្យទៅធ្វើការសិក្សាពីស្ថានភាពនៅលីប៊ី ប៉ុន្តែអ្វីដែលជាការលំបាកគឺថា ប្រតិបត្តិការបែបនេះ មិនមែនកងទ័ពរឺក៏បេសកកម្មបរទេសមួយ អាចធ្វើតែឯងបានទេ គឺត្រូវតែមានការសហការ ជាមួយក្រុមមូលដ្ឋានដែលជាអ្នកម្ចាស់ស្រុក ហើយជាក្រុមដែលគួរឲ្យទុកចិត្ត។ ចំណុចនេះហើយដែលជាការលំបាក ព្រោះថាបច្ចុប្បន្ននេះ លីប៊ី បែកខ្ញែកគ្នាជាពីរជាបី គ្មានរដ្ឋាភិបាលត្រឹមត្រូវ ដែលធ្វើឲ្យគេទុកចិត្តនិងអាចធ្វើការជាមួយបានទេ។ ដូច្នេះ ដរាបណា លីប៊ីគ្មានរដ្ឋាភិបាលកណ្តាលមួយ ដែលបង្រួបបង្រួមគ្រប់ភាគីទាំងអស់ឲ្យចូលរួម នោះគឺមានន័យថាការប្រយុទ្ធបំបែកសំបុកក្រុមជីហាដ ពិតជាគ្មានថ្ងៃទៅមុខទេ។
អ៊ីតាលីអាចជាអ្នកដឹកនាំបេសកកម្ម៖
ចំណុចមួយទៀត ដែលរដ្ឋាភិបាលអាមេរិក កំពុងពិចារណាដែរ គឺថាអាមេរិក អាចនឹងមិនដឹកនាំការប្រយុទ្ធនៅលីប៊ីដោយផ្ទាល់ទេ ព្រោះថាអាមេរិកមិនសូវជាស្គាល់មូលដ្ឋានច្បាស់លាស់ ហើយមិនធ្លាប់មានប្រវត្តិជិតស្និត ជាមួយប្រទេសនេះទៀត។ ដូច្នេះហើយបានជាគេបានគិតទៅដល់អ៊ីតាលី ដែលជាប្រទេសធ្លាប់មានឥទ្ធិពលអណានិគមទៅលើលីប៊ី។
កិច្ចប្រជុំមួយចំនួនរវាងអ៊ីតាលី និងអាមេរិក ត្រូវគេត្រៀមរួចអស់ហើយ គឺលោកចន ឃែរី និងជួបរដ្ឋមន្តី្រក្រសួងការបរទេសអ៊ីតាលីនៅក្រុងរ៉ូម នៅថ្ងៃទី២ កុម្ភៈខាងមុខនេះ ហើយប្រធានាធិបតីអ៊ីតាលី និងអញ្ជើញទៅសេតវិមានជួបលោកអូបាម៉ា នៅថ្ងៃទី៨កុម្ភៈ។ បើតាមការស្មាន អ៊ីតាលី អាចនឹងទទួលខ្លួនជាអ្នកចាត់ចែងបេសកកម្មវាយប្រហារ នៅលីប៊ី ព្រោះថាវាក៏ជាប្រយោជន៍របស់អ៊ីតាលីដែរ ព្រោះអី ព្រោះថាដរាបណាលីប៊ីនៅតែរញ៉េរញ៉ៃគ្មានស្ថិរភាព ក្រុមជនភៀសខ្លួននឹងនៅតែបន្តឆ្លងមកអ៊ីតាលី។
កាណាដាដកយន្តហោះចម្បាំង ឈប់ទម្លាក់គ្រាប់៖
ការដកយន្តហោះចម្បាំងF18 ទាំង៦គ្រឿងរបស់កាណាដា វាគឺជាជម្រើសថ្មីរបស់រដ្ឋាភិបាលលោក Justin Trudeau នាយករដ្ឋមន្ត្រីថ្មីវ័យក្មេង របស់កាណាដា។ បើតាមការវិភាគ ការដកកម្លាំងចេញនេះ មិនមែនមានន័យថា កាណាដាប្តូរចិត្តលែងចង់ជួយក្រុមសម្ព័ន្ធមិត្តទេ តែជាការផ្លាស់ប្តូរយុទ្ធសាស្ត្រ។ ហើយហេតុផលមួយទៀត គឺរដ្ឋាភិបាលថ្មីរបស់កាណាដា កំពុងថ្លឹងថ្លែងដើម្បីធ្វើយ៉ាងណាកុំឲ្យ មតិសាធារណៈរបស់មហាជនកាណាដា គិតថាកាណាដា ដើរទៅធ្វើសង្រ្គាមនៅស្រុកគេស្រុកឯង។
បើតាមការផ្តល់ព័ត៌មាន ពីរដ្ឋាភិបាលកាណាដា កាណាដាកំពុងតែស្វែងរកវិធីថ្មីផ្សេងទៀត ក្នុងការចូលរួមប្រយុទ្ធប្រឆាំងនឹងក្រុមជីហាដអង្គការរដ្ឋអ៊ីស្លាម មិនមែនបញ្ជូនយន្តហោះទៅទម្លាក់គ្រាប់ទេ តែអាចជាការសហការក្នុងការដឹកជញ្ជូនសម្ភារៈ ផ្តល់ទិន្ន័យ និងជាពិសេសគឺការផ្តល់ជំនួយមនុស្សធម៌ដល់ប្រជាជន ដែលងាយរងគ្រោះ រឺក៏ដែលស្ថិតនៅតាមសមរភូមិ។ រដ្ឋាភិបាលអាមេរិក បានទទួលការសម្រេចចិត្តដកយន្តហោះរបស់កាណាដា ហើយមានទំនុកចិត្តលើកាណាដា ក្នុងការស្វែងរកមធ្យោបាយថ្មី។
បន្ថែមពីនេះទៀត បើតាមការរំពឹងទុក ការប្រជុំគ្នានៅទីក្រុងរូម នៅដែមខែកុម្ភៈ ស្តីពីការបើកសមរភូមិថ្មីនៅលីប៊ី គឺលោករដ្ឋមន្ត្រីការបរទេសកាណាដា ក៏នឹងចូលរួមផងដែរ។ ដូច្នេះកាណាដា នៅតែមានតួនាទីចំបង ក្នុងយុទ្ធនាការកម្ទេចក្រុមជីហាដអ៊ីស្លាមដដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ