លីប៊ី៖ហេតុអ្វីបានអង្គការរដ្ឋអ៊ីស្លាមកាន់តែឡើងឥទ្ធិពល?
ស្ថានការណ៍កំពុងបន្តដុនដាបនៅក្នុងប្រទេសលីប៊ី។ នៅថ្ងៃព្រហស្បតិ៍ ទី៧ មករា មានមនុស្សស្លាប់យ៉ាងតិច ៧៤នាក់ និងរបួសជាច្រើនរយនាក់ផ្សេងទៀត។ បើគិតតាំងពីឆ្នាំ ២០១១ ពោលតាំងពីការដួលរលំរបបដឹកនាំដោយមេផ្តាច់ការកាដាហ្វីក្នុងខែកុម្ភៈ ឆ្នាំ ២០១១ មក នេះជាអំពើភេរវកម្មដែលបានសម្លាប់ច្រើនជាងគេនៅក្នុងទឹកដីលីប៊ី។ សហគមន៍អន្តរជាតិបានថ្កោលទោសលើអំពើភេរវកម្ម និងបានអំពាវនាវឲ្យមានការឯកភាពរវាងប្រជាជនលីប៊ី ពិសេសរវាងភាគីជម្លោះផ្ទៃក្នុងដែលកំពុងបន្តហែកហួរគ្នាដើម្បីអំណាច។ អ្វីដែលសហគមន៍អន្តរជាតិបារម្ភខ្លាំង គឺខ្លាចតែលីប៊ីធ្លាក់ក្នុងកណ្តាប់ដៃរបស់អង្គការរដ្ឋអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៣៣
ក្រោយការផ្តួលរំលំរបបផ្តាច់ការរបស់កាដាហ្វីក្នុងថ្ងៃទី១៧ កុម្ភៈ ឆ្នាំ ២០១១ ប្រជាជនលីប៊ីសង្ឃឹមនឹងទទួលបានភាពរុងរឿង និងសិទ្ធិសេរីភាពពេញលេញ។ តែក្តីសង្ឃឹមនេះគ្រាន់ជាសុបិន្តប៉ុណ្ណោះ ព្រោះតាំងពីពេលនោះមក ប្រទេសលីប៊ីទំាងមូលបាន និងកំពុងបន្តប្រឈមមុខនឹងអំពើហិង្សា និងអស្ថិរភាពនយោបាយមកដល់សព្វថ្ងៃ ដូចយ៉ាងអំពើភេរវកម្មអត្តឃាតចំនួនពីរផ្តាច់ជីវិតមនុស្សជាង ៧០នាក់នៅថ្ងៃព្រហស្បតិ៍ ទី៧ មករា ឆ្នាំ ២០១៦ ជាឧទាហរណ៍ជាក់ស្តែង។
គួររម្លឹកជូនឡើងវិញថា ៤ឆ្នំា ក្រោយការដួលរលំរបបផ្តាច់ការកាដាហ្វីមក លីប៊ីកំពុងបន្តស្ថិតក្រោមការដឹកនំារបស់រដ្ឋាភិបាលបណ្តោះអាសន្នមកដល់បច្ចុប្បន្ន។ តែទន្ទឹមគ្នានឹងរដ្ឋាភិបាលបណ្តោះអាសន្នដែលមានទីតាំងនៅក្នុងទីក្រុងតូព្រុក និងដែលទទួលស្គាល់ដោយសហគមន៍អន្តរជាតិ ក៏នៅមានរដ្ឋាភិបាលក្រៅខោមួយដែលមានទីតាំងនៅក្នុងទីក្រុងទ្រីប៉ូលី និងដែលសហគមន៍អន្តរជាតិមិនបានទទួលស្គាល់ទេ។ រដ្ឋាភិបាលក្រៅខោនៅទ្រីប៉ូលីនោះកំពុងដឹកនំាដោយក្រុមអ៊ីស្លាមនិយមជ្រុលដែលបានតាំងខ្លួនជាអ្នកបដិវត្ដន៍ប្រឆាំងនឹងរបបផ្តាច់ការរបស់កាដាហ្វី។
ប៉ុន្មានឆ្នាំចុងក្រោយនេះ ភាគីជម្លោះផ្ទៃក្នុងទាំងពីរបានប្រឈមមុខដាក់គ្នាដើម្បីក្រសោបអំណាចគ្រប់គ្រងប្រទេស។ តែបញ្ហានៅត្រង់ថា ភាពប្រទូស្រ្តាយរវាងគូបដិបក្ខទាំងពីរបានធ្វើឲ្យស្ថានការណ៍ក្នុងប្រទេសកាន់តែធ្លាក់ដុនដាបទៅៗពីមួយថ្ងៃទៅមួយថ្ងៃ ទាំងនៅក្នុងផ្នែកសន្តិសុខ និងសេដ្ឋកិច្ច។ ទំាងនេះពិតជារូបភាពមួយដែលប្រជាជនលីប៊ីមិនបានរង់ចំាទាល់តែសោះ នៅក្រោយការធ្វើបដិវត្តន៍របស់ពួកគេ។
អង្គការរដ្ឋអ៊ីស្លាមឆក់ឱកាសក្នុងពេលលីប៊ីបែកបាក់ផ្ទៃក្នុង
កាលពីថ្ងៃទី១៧ ធ្នូ ឆ្នាំ ២០១៥ និងក្រោមគំនិតផ្តួចផ្តើមរបស់អង្គការសហប្រជាជាតិ រដ្ឋាភិបាលទាំងពីរនៅលីប៊ីបានចុះហត្ថលេខាលើកិច្ចព្រមព្រៀងមួយដើម្បីបង្កើតឲ្យមានរដ្ឋាភិបាលឯកភាពជាតិ។ កិច្ចព្រមព្រៀងនោះត្រូវបានចុះហត្ថលេខានៅក្នុងប្រទេសម៉ារ៉ុក ពោលមិនមែនក្នុងទឹកដីលីប៊ីទេ ព្រោះកុំឲ្យមានការប្រទាញប្រទង់គ្នារវាងភាគីជម្លោះផ្ទៃក្នុងទាំងពីរ។ តាមធម្មតា ក្រុមអ្នកតំណាងរដ្ឋាភិបាលទាំងពីរនៅលីប៊ីនឹងត្រូវឲ្យសច្ចាប័ន្រលើកិច្ចព្រមព្រៀងដែលខ្លួនបានចុះហត្ថលេខាឲ្យបានមុនថ្ងៃទី១៧ មករាខាងមុខ ហើយរដ្ឋាភិបាលឯកភាពជាតិនឹងត្រូវចេញរូបរាងនៅចុងខែមករានេះ។
តែបើតាមមើលទៅ គឺប្រហែលជាពិបាកបន្តិច ព្រោះក្រុមអ្នកតំណាងរដ្ឋាភិបាលក្រៅខោនៅទ្រីប៉ូលីទើបបានយល់ឃើញថា កិច្ចព្រមព្រៀងនោះបានផ្តល់ផលចំណេញតិចតួចណាស់ចំពោះខ្លួន។ យ៉ាងណាក៏ដោយ ប្រេសិតពិសេសរបស់អង្គការសហប្រជាជាតិទទួលបន្ទុកវិបត្តិលីប៊ីលោក Martin Kobler បានបញ្ជាក់ជាថ្មីម្តងទៀតពីភាពចាំបាច់ដែលភាគីជម្លោះទាំងពីរត្រូវអនុវត្តន៍កិច្ចព្រមព្រៀងឲ្យបានឆាប់ និងបន្ទាន់បំផុត។ គេមិនដឹងថា តើអំពើភេរវកម្មអត្តឃាតបង្កឡើងដោយពួកជីហាតអង្គការរដ្ឋអ៊ីស្លាមនៅថ្ងៃទី៧ មករា ឆ្នាំ ២០១៦ អាចនឹងជួយដាស់សតិភាគីជម្លោះទាំងពីរឲ្យយល់ពីផលវិបាកដែលប្រទេសកំពុងជួបប្រទះ ឬអត់ទេ។
តែលោក Martin បានព្រមានទុកជាមុនថា ការបន្តពន្យារពេលទៅមុខក្នុងការបង្កើតរដ្ឋាភិបាលឯកភាពជាតិ គឺមានន័យស្មើនឹងទុកពេលឲ្យពួកជីហាតអង្គការរដ្ឋអ៊ីស្លាមឡើងចាងកាន់តែខ្លាំង។ ការអះអាងរបស់ប្រេសិតពិសេសសហប្រជាជាតិរូបនេះពិតជាមិនខុសទេ ព្រោះថា អង្គការរដ្ឋអ៊ីស្លាមកំពុងឆក់ឱកាសក្នុងពេលដែលលីប៊ីកំពុងច្របូកច្របល់ ពោលក្នុងពេលដែលលីប៊ីគ្មានរចនាសម្ព័ន្ធគ្រប់គ្រងរឹងមាំ។ ចំណែកសហគមន៍អន្តរជាតិវិញក៏គ្មានជម្រើសអ្វីនឹងជួយលីប៊ីដែរ ព្រោះថា បើលីប៊ីធ្លាក់ក្នុងដៃរបស់ពួកជីហាតអង្គការរដ្ឋអ៊ីស្លាម គឺជារឿងគ្រោះថ្នាក់ខ្លាំងណាស់សម្រាប់ពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ