បារំាង៖លោកហ្រ្វង់ស័រ ហូឡង់ទៅទស្សនកិច្ចក្នុងប្រទេសកាតា មុននឹងទៅចូលរួមជំនួបកំពូលក្នុងតំបន់
នៅថ្ងៃចន្ទ ទី៤ ឧសភានេះ លោកប្រធានាធិបតីបារំាងហ្រ្វង់ស័រ ហូឡង់បានអញ្ជើញទៅទស្សនកិច្ចក្នុងប្រទេសកាតាដែលលោកបានចូលរួមនៅក្នុងពិធីចុះហត្ថលេខាលើកិច្ចសន្យាលក់យន្តហោះចម្បំាងបារំាង Rafale ចំនួន ២៤គ្រឿងឲ្យប្រទេសកាតា។ បន្ទាប់មក លោកហូឡង់បន្តដំណើរទៅកាន់ប្រទេសអារ៉ាប៊ីសាអូឌីតដើម្បីចូលរួមនៅក្នុងជំនួបកំពូលនៃក្រុមប្រឹក្សាកិច្ចសហប្រតិបត្តិការឈូងសមុទ្រពែក្សនៅថ្ងៃអង្គារ ទី៥ ឧសភាស្អែក។ អ្វីជាការកត់សម្គាល់ លោកប្រមុខរដ្ឋបារំាង គឺជាថ្នាក់ដឹកនំាជាន់ខ្ពស់អឺរ៉ុបតែម្នាក់ដែលបានអញ្ជើញឲ្យចូលរួមនៅក្នុងជំនួបកំពូលនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
លោកប្រធានាធិបតីបារំាងហ្រ្វង់ស័រ ហូឡង់ត្រូវបានទទួលដោយប្រមុខរដ្ឋកាតា ព្រះចៅឆែកតាមីម បេនហាម៉ាដ អាល់ថានីនៅឯអាកាសយានដ្ឋានក្នុងទីក្រុងដូហា ប្រទេសកាតា។ បន្ទាប់ពីបានជួបសន្ទនាគ្នារយៈពេលខ្លីមក ប្រមុខរដ្ឋទំាងពីររូបក៏បានចូលរួមនៅក្នុងពិធីចុះហត្ថលេខាជាផ្លូវការលើកុងត្រាដែលប្រទេសកាតាបានកម្ម៉ង់ទិញយន្តហោះចម្បំាងបារំាង Rafale ចំនួន ២៤គ្រឿងមានទឹកប្រាក់សរុប ៦ ៣០០លានអឺរ៉ូ។ ពិធីចុះហត្ថលេខាលក់យន្តហោះចម្បំាងបារំាង Rafale ឲ្យប្រទេសកាតាពេលនេះ ជាសក្ខីកម្មថ្មីមួយទៀតដែលបញ្ជាក់ពីជោគជ័យនៃការលក់យន្តហោះចម្បំាងបារំាងទៅកាន់បរទេសជាបន្តបន្ទាប់។ គួររម្លឹកជូនថា ក្រៅពីប្រទេសកាតាពេលនេះ អេហ្ស៊ីប និងឥណ្ឌាក៏បានកម្ម៉ង់ទិញយន្តហោះចម្បំាង Rafale របស់បារំាងដែរក្នុងឆ្នំា ២០១៥ នេះ។
តាមពិតទៅ ដំណើរទៅកាន់ប្រទេសកាតារបស់លោកហូឡង់ថ្ងៃនេះមិនបានគ្រោងទុកជាមុនឡើយ គឺទើបតែលេចដំណឹងរឿងប្រទេសកាតាទិញយន្តហោះចម្បំាងបារំាង Rafale ទេដែលលោកហូឡង់បានប្តូរកម្មវិធីទៅកាតាដើម្បីចូលរួមនៅក្នុងពិធីចុះហត្ថលេខាជាផ្លូវការនៅថ្ងៃនេះ។ បន្ទាប់ពីកាតា លោកហូឡង់បន្តដំណើរទៅកាន់ប្រទេសអារ៉ាប៊ីសាអូឌីតដើម្បីចូលរួមនៅក្នុងជំនួបកំពូលនៃក្រុមប្រឹក្សាកិច្ចសហប្រតិបត្តិការឈូងសមុទ្រពែក្សដែលនឹងរៀបចំនៅក្នុងទីក្រុងរីយ៉ាដនាថ្ងៃអង្គារ ទី៥ ឧសភា។ វត្តមានរបស់លោកហូឡង់នៅក្នុងទឹកដីអារ៉ាប៊ីសាអូឌីតពេលនេះបានធ្វើឡើង ចំពេលដែលអារ៉ាប៊ីសាអូឌីតកំពុងដឹកនំាកម្លំាងសម្ព័ន្ធមិត្តវាយប្រហារលើពួកឧទ្ទាមហ៊ូទី្សក្នុងប្រទេសយ៉េម៉ែន។
ដូច្នេះស្ថានការណ៍នៅយេម៉ែន រួមទំាងសំណុំរឿងក្នុងតំបន់ជាច្រើនទៀត មានដូចជាបញ្ហានៅក្នុងប្រទេសស៊ីរី នៅអ៊ីរ៉ាក់ ព្រមទំាងបញ្ហានុយក្លេអ៊ែររបស់អ៊ីរ៉ង់នឹងក្លាយជាប្រធានបទសំខាន់ដែលថ្នាក់ដឹកនំានៃរាជានិយមក្នុងតំបន់ឈូងសមុទ្រពែក្សលើកយកទៅជជែក។ អ្វីជាការកត់សម្គាល់ លោកប្រមុខរដ្ឋបារំាង គឺជាថ្នាក់ដឹកនំាជាន់ខ្ពស់អឺរ៉ុបតែម្នាក់ដែលបានអញ្ជើញឲ្យចូលរួមនៅក្នុងជំនួបកំពូលនៃក្រុមប្រឹក្សាកិច្ចសហប្រតិបត្តិការឈូងសមុទ្រពែក្សរៀបចំក្នុងប្រទេសអារ៉ាប៊ីសាអូឌីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ