កងទ័ពអ៊ុយក្រែន បានថ្លែងអំពីការឈប់បាញ់នៅខេត្តបះបោរ ដូណេត និង លូហ្កាន់
គឺថ្ងៃអង្គារទី៩ធ្នូនេះ ដែលស្របនឹងសេចក្តីថ្លែងការណ៍ធ្វើកាលពីសប្តាហ៏មុន ដោយលោកប្រធានាធិបតី ប៉េត្រូ ប៉ូរ៉ូឆេនកូ នៅតាមដែនដីខេត្តបះបោរទាំងពីរនេះ ប៉ែកខាងកើត អ៊ុយក្រែន ក្រោមឈ្មោះរួមថា ដុនបាស់ ដែលមានទំនោរមកខាងរុស្ស៊ី ត្រូវចាប់ផ្តើមគោរពតាម បទឈប់បាញ់។ ចំណែកកាលបរិច្ឆេទបើកធ្វើកិច្ចចរចាឡើងវិញនៅក្រុងមិនស្ក៏ រដ្ឋធានី បេឡារុស គឺថ្ងៃសុក្រទី១២ធ្នូ។
ចុះផ្សាយនៅថ្ងៃ៖
ស្តាប់ - ០២:០៤
គឺតំណាងនៃទីបញ្ជាការកងទ័ពអ៊ុយក្រែនដែលបានប្រកាសអំពីការឈប់បាញ់ ថ្ងៃនេះ ប៉ុន្តែទាំងគូសបញ្ជាក់ថា ប្រសិនបើមានការវាយប្រហារពីខាងពួកឧទ្ទាម នោះគេនឹងបាញ់ ឆ្លើយ តបវិញដោយឥតបង្អែរបង្អង់ឡើយ។
ចំណែកសេនាធិការដ្ឋានកងកម្លាំងពួកឧទ្ទាម ព្រឹកថ្ងៃ៩ធ្នូនេះ សង្កេតឃើញ មានភាពស្ងប់ស្ងាត់សណ្ឋិតនៅតាមខ្សែប្រឈមមុខដាក់គ្នារវាងអង្គភាពទ័ពអ៊ុយក្រែននិង ពួកក្រុមសេនាជន។
ជាការរំលឹក ការឈប់បាញ់ថ្ងៃ៩ធ្នូនេះ ដែលប្រកាសដោយ លោកប្រធានាធិបតីអ៊ុយក្រែន ប៉ូរ៉ូឆេនកូ បានត្រូវបញ្ជាក់ដោយលោក Pourghine ជាប្រធានរដ្ឋសភា សាធារណរដ្ឋ ស្វ័យប្រកាសដូណេតហៅកាត់ថា DNR និងដោយលោក Plotnitski ជាប្រមុខ សាធារណរដ្ឋ ស្វ័យប្រកាសលូហ្កាន់ ហៅកាត់ថា LNR។
កិច្ចព្រមព្រៀងចុះនៅក្រុងមិនស្ក៏ កាលពីថ្ងៃ ទី៥កញ្ញានិងថ្ងៃ១៩កញ្ញា ស្តីអំពីបទឈប់បាញ់ និងដែលចែងឲ្យម្ខាងៗ ដកសព្វាវុធធុនធូន់រៀងៗខ្លួន ចេញពីខ្សែប៉ះទង្គិចគ្នា ទៅចម្ងាយ ១៥ គ.ម. ដើម្បីបង្កើតឡើងជា តំបន់ទ្រនាប់ ទទឹង៣០គ.ម. តាមសក្ខីកម្មនៃក្រុមអ្នកត្រួតពិនិត្យ របស់ “អង្គការដើម្បីសន្តិសុខនិងសហប្រតិបត្តិការនៅទ្វីបអឺរ៉ុប” OSCE គឺត្រូវបានរំលោភ ជាច្រើនដង ដោយសងខាងតែម្តង។
សាច់រឿងមួយនៃកិច្ចចរចាថ្ងៃ១២ធ្នូខាងមុខ នៅក្រុងមិនស្ក៏ រដ្ឋធានីបេឡារុស គឺអំពីការបន្ត ប្តូរឈ្លើយសឹកទៅវិញទៅមកតាមរូបមន្ត“ទាំងអស់ទល់នឹងទាំងអស់” ។ នឹងចូលរួមក្នុង កិច្ចចរចានេះ ក្រោមឈ្មោះថា ក្រុមទំនាក់ទំនង គឺ តំណាងរបស់អាជ្ញាធរអ៊ុយក្រែន តំណាង របស់រុស្ស៊ីតំណាងរបស់អង្គការOSCE ព្រមទាំងតំណាងភាគីបះបោរនៅអ៊ុយក្រែន។
តាមទិន្នន័យ អ.ស.ប. ក្នុង៨ខែកន្លងទៅ នៃជម្លោះប្រដាប់អាវុធនៅតំបន់ខាងកើតអ៊ុយក្រែន មានបណ្តាជន ធ្លាក់ខ្លួនស្លាប់អស់ជាង ៤.៣០០នាក់ របួស ប្រមាណ ១០.០០០នាក់។ គិតមក ទល់ចុងខែវិច្ឆិកា ដោយមកពីភ្លើងសង្គ្រាម មានអ្នកស្រុកតំបន់នេះ ជាង១លាននាក់ បាន បោះបង់លំនៅខ្លួនហើយក្លាយជាជនភៀសខ្លួនពីក្នុងនោះ តាមតួលេខស្ថាប័នអន្តោប្រវេសន៍ រុស្ស៊ី មាន ២សែន២ម៉ឺន៥ពាន់នាក់បានសុំជម្រកជ្រកកោននៅរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ