ក្រុងគៀវព្រមានម៉ូស្គូកុំឲ្យជ្រៀតជ្រែក ក្នុងរឿង អ៊ុយក្រែនចង់ចូលជាសមាជិកអូតង់
មូលហេតុ មកពីក្នុងសម្ភាសន៍ទៅប្រព័ន្ធផ្សព្វផ្សាយអង់គ្លេស BBC អ្នកនាំពាក្យ វិមានក្រេមឡាំង ថ្លែងថា រុស្ស៊ីត្រូវការឲ្យមានការសន្យាធានាពីខាងអូតង់ថា នឹងពុំទទួល អ៊ុយក្រែន ចូលជាសមាជិក បក្សសម្ព័ន្ធនេះឡើយ។ ការទាមទារបែបនេះ របស់រុស្ស៊ី បានញ៉ាំង ឲ្យក្រសួងការបរទេសអ៊ុយក្រែន បញ្ចេញប្រតិកម្មដោយច្រឡោត។
ចុះផ្សាយនៅថ្ងៃ៖
ស្តាប់ - ០២:០៨
ក្នុងបទសម្ភាសន៍ទៅប្រព័ន្ធផ្សព្វផ្សាយអង់គ្លេស BBC អ្នកនាំពាក្យផ្លូវការរបស់វិមានក្រមឡាំង លោក ឌ្មីទ្រី ពេស្កូវ ថ្លែងថា រហូតមកទល់ឥឡូវ គ្មាននរណាម្នាក់ បានផ្តល់មក រុស្ស៊ី នូវពាក្យសន្យាធានាឲ្យបាន ១០០% ឡើយថា អ៊ុយក្រែននឹងពុំត្រូវទទួលឲ្យចូល ជា សមាជិកបក្សសម្ព័ន្ធ អូតង់។ ម៉្លោះហើយបានជាស្ថានការណ៍បែបនេះ ញ៉ាំងក្រុងម៉ូស្គូ ឲ្យ ព្រួយបារម្ភជានិច្ច លុះទាល់តែបង្ខំ ភាគីរុស្ស៊ី ឲ្យចាត់វិធានការបង្ការខ្លួនជាមុន។
ព្រមជាមួយនេះ មន្ត្រីជាន់ខ្ពស់រូបនេះ តំណាងឲ្យវិមានក្រេមឡាំង ចោទបស្ចិមលោក ថា កំពុងតែ “ឡោមព័ទ្ធ“ ប្រទេសរុស្ស៊ីតែម្តង។
ចំណែក លោករដ្ឋមន្ត្រីការបរទេសរុស្ស៊ី ស៊ែររហ្គៃ ឡាវ្រ៉ូវ ថ្លែងក្នុងសភាឌូម៉ា លើកឡើងថា ការដែលអ៊ុយក្រែនពុំព្រមបោះបង់លក្ខន្តិកៈខ្លួន ជា រដ្ឋស្ថិតនៅក្រៅ ប្លុកយោធា គឺមាន ន័យថា អ៊ុយក្រែនប្រកាន់យកបន្ទាត់ឆ្ពោះទៅ ដោះស្រាយវិបត្តិ តាមផ្លូវប្រើកម្លាំងអាវុធ។
ប្រតិកម្មពីខាងក្រុងគៀវ គឺរំលេចឲ្យឃើញដោយ សេចក្តីថ្លែងការណ៍របស់ក្រសួងការបរទេស អ៊ុយក្រែនដែលថា ៖ អ៊ុយក្រែនជារដ្ឋឯករាជ្យ អធិបតេយ្យ ហើយមានតែប្រជាជនអ៊ុយក្រែន ប៉ុណ្ណោះ ដែល មានសិទ្ធិសម្រេច តើប្រទេសខ្លួន ត្រូវដើរតាមមាគ៌ាណាៗ ត្រូវចូ ឬមិនចូល ក្នុងបក្សសម្ព័ន្ធនេះឬនោះ? អ៊ុយក្រែនឥតត្រូវការដំបូន្មាន ពីខាងនរណាឡើយ កុំថា ដល់ទៅ សម្ពាធមកលើខ្លួន ក្នុងបញ្ហាបែបនេះ សម្ពាធដែលអ៊ុយក្រែន ច្រានចោល ជាដាច់ខាត។
ក្រុងគៀវចង់ទទួលពីម៉ូស្គូ នូវការធានាឲ្យបាន ១០០% ថា រុស្ស៊ី មិនលូកដៃជ្រៀតជ្រែកចូល កិច្ចការផ្ទៃក្នុងអ៊ុយក្រែន មិនបញ្ជូនកងទ័ពខ្លួន ចូលដែនដីអ៊ុយក្រែន មិនភ្ជាប់យកទឹកដី អ៊ុយក្រែន ទៅជាទឹកដីឧបសម្ព័ន្ធរបស់រុស្ស៊ីឡើយ។ ប៉ុន្តែ មកទល់ឥឡូវ រុស្ស៊ីមិនព្រមផ្តល់ ការធានាបែបនេះដល់អ៊ុយក្រែនឡើយ។ ឬមួយ ម៉ូស្គូធ្វើខ្វាក់ មិនព្រមឃើញទឹកចិត្តក្តៅក្រហាយ នៅក្នុងលោកទាំងមូល ចំពោះទង្វើរុស្ស៊ី ទល់នឹង អ៊ុយក្រែន។
រីឯ សេតវិមានក្រុងវ៉ាស៊ីនតោន ទើបថ្លែងថា ការសម្រេចចិត្តរបស់អ៊ុយក្រែន ថា អាចចូលជា សមាជិក អូតង់ ត្រូវតែអនុម័ត គឺ ដោយអាជ្ញាធរអ៊ុយក្រែន និង ដោយ ថ្នាក់ដឹកនាំអូតង់តែម្តង ដោយគ្មានការលូកដៃពីក្រៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ