តើប្រព័ន្ធខែលមីស៊ីលប្រឆាំងមីស៊ីលរបស់អាមេរិកនៅអឺរ៉ុបបានមកដល់ត្រឹមណាហើយ?
នៅថ្ងៃអាទិត្យចុងសប្តាហ៍នេះ អង្គការអាត្លង់ទិកអូតង់ នឹងបើកកិច្ចប្រជុំកំពូល នៅទីក្រុងChicago។ នៅថ្ងៃចន្ទទី ១៤ ឧសភា គឺនៅតែប៉ុន្មានថ្ងៃ មុន បើកកិច្ចប្រជុំកំពូល ប្រធានអូតង់ គឺលោកAnders Fogh Rasmussen បានអំពាវនាវ ជំរុញឲ្យប្រទេសលោកខាងលិច ដែលជាសម្ព័ន្ធមិត្តរបស់អូតង់ប្រញាប់រួសរាន់សាងសង់ ដើម្បីដាក់ឲ្យដំណើរការប្រព័ន្ធខែលមីស៊ីលប្រឆាំងមីស៊ីល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៥៩
បើតាមលោកRasmussen ប្រធានអង្គការអូតង់ រហូតមកដល់ពេលនេះ អូតង់បានដំឡើង ប្រព័ន្ធបញ្ជា និងត្រួតពិនិត្យ ដែលតភ្ជាប់ទៅនឹងប្រព័ន្ធផ្កាយរណបរបស់អាមេរិក រួចរាល់ហើយ។ ប្រទេសហូឡង់បារាំង និងអាល្លឺម៉ង់ ដែលជាសមាជិករបស់អូតង់បានផ្តល់ជំនួយ ផ្នែកបច្ចេកទេស និងទិន្នន័យ ដែលអាចឲ្យគេចាប់លឺសញ្ញា និងបាញ់ស្ទាក់គ្រាប់មីស៊ីលដែលហោះសំដៅអឺរ៉ុប។ តួកគី ប៉ូឡូញ រ៉ូមានី និងអេស្ប៉ាញវិញបានសន្យា យល់ព្រមឲ្យអាមេរិក ដែលជាសមាជិកសំខាន់ របស់អង្គការអូតង់ ដំឡើងមីស៊ីលប្រឆាំងមីស៊ីលក្នុងទឹកដីរបស់ពួកគេ។ អាមេរិកវិញគ្រោងនឹងដំឡើងមីស៊ីលដែលខ្លួនទើបអនុវត្តបាញ់សាកល្បងបានសម្រេច កាលពីសប្តាហ៍មុន នៅក្នុងទឹកដីរ៉ូមានី។ និយាយឲ្យចំ គឺប្រព័ន្ធខែលមីស៊ីល ប្រឆាំងមីស៊ីលនឹងត្រូវអាមេរិកដំឡើងឲ្យចប់រួចរាល់ក្នុងប្រទេសរ៉ូម៉ានី ឲ្យបានមុនឆ្នាំ ២០១៥។
Rasmussen និយាយថា បើសមាជិកអឺរ៉ុប និងសម្ព័ន្ធមិត្តរបស់អូតង់ពន្លឿនការងាររបស់ខ្លួននោះ ប្រព័ន្ធខែលមីស៊ីលប្រឆាំងមីស៊ីល ជាបណ្តោះអាសន្ន នឹងលេចរូបរាងឡើង ក្នុងពេលឆាប់ៗ នៅអឺរ៉ុប ហើយប្រព័ន្ធនេះនឹងជួយការពារទឹកដី និងប្រជាជនអឺរ៉ុបទាំងមូលឲ្យរួចផុតពីការគំរាមកំហែងរបស់អាវុធនុយក្លេអ៊ែរ។
ប៉ុន្តែ គម្រោងបង្កើតប្រព័ន្ធខែលមីស៊ីលប្រឆាំងមីស៊ីលនៅទឹកដីអឺរ៉ុបបានធ្វើឲ្យរុស្ស៊ីប្រឆាំងខ្លាំង។ ខែលមីស៊ីលដែលអាមេរិកនឹងដំឡើង នោះ គឺស្ថិតនៅក្នុងទឹកដីប៉ូឡូញ រូម៉ានី ជាដើម ដែលស្ថិតមកជាប់កៀកនឹងទឹកដីរុស្ស៊ីខ្លាំងពេក។ កាលពីដើមខែនេះ នៅក្នុងសន្និសីទស្តីពីប្រព័ន្ធខែលមីស៊ីលរៀបចំក្នុងទីក្រុងម៉ូស្គូ រុស្ស៊ីបានបង្ហាញថា ខែលមីស៊ីលរបស់អាមេរិកនៅទឹកដីអឺរ៉ុប នឹងអាចមានសមត្ថភាពទាំក់ស្កាត់ចាប់ ហើយបំផ្លាញចោលមីស៊ីលរបស់រុស្ស៊ី គឺក្នុងករណីដែលអាមេរិកចង់វាយប្រហារមកលើរុស្ស៊ី។ ឬអាចនិយាយម្យ៉ាងទៀតថា ដោយសារខែលមីស៊ីលរបស់អាមេរិក នៅអឺរ៉ុប រុស្ស៊ីនឹងមិនងាយបានសម្រេចក្នុងការវាយប្រហារទៅលើអាមេរិកដែរ ព្រោះថា ថា គ្រាប់មីស៊ីលរបស់រុស្ស៊ីនឹងត្រូវបាញ់ស្ទាក់ទុកជាមុន ដោយខែលមីស៊ីលរបស់អាមេរិក ដែលមាននៅទឹកដីប៉ូឡូញ ឬក៏រូម៉ានីជាដើម។
អតីតប្រធានាធិបតីរុស្ស៊ី លោកមេដវេឌេវ ធ្លាប់បានគំរាមហើយថា នឹងបាញ់កម្ទេចប្រព័ន្ធខែលមីស៊ីល នៅក្នុងទឹកដីអឺរ៉ុប ដែលរុស្ស៊ីវាយតម្លៃថា អាចគ្រោះថ្នាក់សម្រាប់រុស្ស៊ី ប្រសិនបើគ្មានការព្រមព្រៀងណាមួយរវាងរុស្ស៊ី និងសម្ព័ន្ធមិត្តអូតង់។
បើតាមអនុរដ្ឋមន្រ្តីការពារជាតិរុស្ស៊ីវិញ ប្រព័ន្ធការពាររបស់រុស្ស៊ីមានគ្រប់គ្រាន់ និងត្រៀមរួចហើយ ដើម្បីបាញ់បំផ្លាញខែលមីស៊ីល របស់អាមេរិកប្រសិនបើចាំបាច់។ រុស្ស៊ីគ្រោងផងដែរនឹងដំឡើងមីស៊ីលទំនើបបំផុតនៅទីក្រុងKaliningrad ដែលជាទីក្រុងមួយ របស់រុស្ស៊ី ដែលស្ថិតនៅចន្លោះប្រទេសប៉ូឡូញ និងប្រទេសលីទុយអានី៕
ប៉ុន្តែ អូតង់ និងអាមេរិកវិញ បានបញ្ជាក់ថា ប្រព័ន្ធខែលមីស៊ីល នៅអឺរ៉ុប គឺដើម្បីការពារអឺរ៉ុបពីការវាយប្រហារនុយក្លេអ៊ែរពីអ៊ីរ៉ង់ និងកូរ៉េខាងជើង ប៉ុន្តែ គ្មានយុទ្ធសាស្រ្តណាដើម្បីវាយប្រហារលើរុស្ស៊ីនោះទេ។
រុស្ស៊ីវិញនៅមិនទាន់ទុកចិត្ត និងនៅតែសង្ស័យថា ប្រព័ន្ធខែលមីស៊ីលប្រឆាំងមីស៊ីល នៅទឹកដីអឺរ៉ុប គំរាមដល់សន្តិសុខជាតិរបស់ខ្លួន។ ដើម្បីបញ្ចុះបញ្ចូលរុស្ស៊ី អូតង់ និងអាមេរិក ក៏បានអញ្ជើញរុស្ស៊ីឲ្យចូលរួម ក្នុងផែនការបង្កើតប្រព័ន្ធខែលមីស៊ីលប្រឆាំងមីស៊ីលនៅអឺរ៉ុប។ រុស្ស៊ីយល់ព្រមចូលរួម ប៉ុន្តែ រុស្ស៊ីនៅទាមទារឲ្យអាមេរិកធ្វើកិច្ចព្រមព្រៀងជាលាយលក្ខអក្សរ ដែលបញ្ជាក់តាមផ្លូវច្បាប់ថា ប្រព័ន្ធខែលមីស៊ីលនោះនឹងមិនមែនធ្វើឡើងដើម្បី វាយប្រហាររុស្ស៊ីទេ។ អាមេរិកធ្លាប់បាននិយាយថា ខ្លួនយល់ព្រមតាមការទាមទាររបស់រុស្ស៊ី។ ប៉ុន្តែ រហូតមកដល់ពេលនេះ អាមេរិកនៅមិនទាន់បានធ្វើលិខិតបញ្ជាក់ទៅឲ្យរុស្ស៊ី នៅឡើយទេ។
រុស្ស៊ី បានបង្ហាញរួចហើយពីគំនិតទុទ្ទិដ្ឋិនិយមថា កិច្ចប្រជុំកំពូលនៅទីក្រុងChicago នឹងមិនផ្តល់លទ្ធផលអ្វីស្តីពីប្រព័ន្ធខែលមីស៊ីលទេ ព្រោះថា បើតាមរុស្ស៊ី រហូតមកដល់ពេលនេះ កិច្ចសន្យា ដែលរុស្ស៊ីទាមទារ នោះអាមេរិក មិនទាន់ធ្វើនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ