ម៉ូស្គូនិងវ៉ាស៊ីនតោននឹងពិភាក្សាឡើងវិញលើសំណុំរឿង”ខែលមីស៊ីលប្រឆាំងមីស៊ីល”
ដំណឹងនេះ ទើបប្រកាសដោយមន្ទីរបញ្ចកោណអាមេរិកបន្ទាប់ពីលោករដ្ឋមន្ត្រីការពារជាតិរុស្ស៊ី Serguei Shoigu បានទូរស័ព្ទទៅសមភាគីអាមេរិកាំងលោក Chuck Hagel សំដែងពីបំណងបន្តការពិភាក្សានេះ ហើយក៏បានទទួលការឯកភាពពីខាងភាគីអាមេរិកាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
ដោយសំដែងការយល់ព្រមបន្តកិច្ចចរចា ទាក់ទងនឹងសាច់រឿងដែលមាន លោក Chuck Hagel រដ្ឋមន្ត្រីការពារជាតិអាមេរិកាំង លើកឡើងថា បំណងរបស់សមភាគីរុស្ស៊ី គឺមានន័យជាការរួមចំណែកសំខាន់ក្នុងទំនាក់ទំនងអាមេរិក-រុស្ស៊ី។
តាមការលំអិតឲ្យដឹងនៃអ្នកនាំពាក្យរបស់ក្រសួងការពារជាតិអាមេរិក លោក George Little ការពិភាក្សានោះ ត្រូវបន្តទៅគឺក្នុងជាន់ថ្នាក់អនុរដ្ឋមន្ត្រីក្រសួងទាំងពីរ។
ការសន្ទនាគ្នាតាមទូរស័ព្ទរវាងរដ្ឋមន្ត្រីការពារជាតិរុស្ស៊ីនិងអាមេរិក បានប្រព្រឹត្តទៅ នៅចំពេលដែលមន្ទីរបញ្ចកោណបានប្រកាសធ្វើការកែខៃទៅលើកម្មវិធីខាងដំឡើង “ខែលមីស៊ីលប្រឆាំងមីស៊ីល” របស់បក្សសម្ព័ន្ធ OTAN ដែលនាំមុខដោយស.រ.អា.ផ្ទាល់ ខែលដែលថាទុកសម្រាប់ប្រឈមនឹងការគម្រាមកំហែងពីខាងកាំជ្រួចមីស៊ីលរបស់អ៊ីរ៉ង់ ប៉ុន្តែ ដែលត្រូវម៉ូស្គូចាត់ទុកជាគ្រោះថ្នាក់ដល់សន្តិសុខជាតិរុស្ស៊ីទេតើ ពីព្រោះតាមមតិម៉ូស្គូខែលនោះឯងមុខជា នឹងបន្សោយសក្តានុពលអាវុធបរមាណូរបស់រុស្ស៊ីតែម្ដង។
គម្រោងកែខៃនោះ ត្រូវពួកអ្នកសង្កេតការណ៍នៅក្រុងវ៉ាស៊ីនតោន នាំគ្នាបកស្រាយថាជា ការឈោងដៃមករកក្រុងម៉ូស្គូ ប៉ុន្តែ តាមការថ្លែងឲ្យដឹងនៃ លោកអនុរដ្ឋមន្ត្រីការបរទេសរុស្ស៊ី Serguei Riabkov ការសម្រេចចិត្តអាមេរិកនោះមិនមែនជាការធ្វើសម្បទានអ្វីណាសោះឡើយ ចំពោះរុស្ស៊ី។
គួរនិយាយថា តាមរយៈសុន្ទរកថាខ្លួន ថ្លែងកាលពីខែកុម្ភៈស្តីអំពី សភាពការណ៍ប្រទេសជាតិ លោកប្រធានាធិបតីអាមេរិក បារ៉ាក់ អូបាម៉ា បានប្រកាសពីបំណង ចង់ចរចាជាមួយរុស្ស៊ី ឆ្ពោះទៅកាត់បន្ថយតទៅទៀត ឃ្លាំងអាវុធនុយក្លេអ៊ែរមហាអំណាចទាំងពីរ ក្រោយពីចុងឆ្នាំ២០១០ បានចូលជាធរមានទៅហើយ “សន្ធិសញ្ញាស្តីអំពីការកាត់បន្ថយសព្វាវុធយុទ្ធសាស្ត្រនុយក្លេអ៊ែរ រុស្ស៊ី-អាមេរិក” ហៅកាត់ថា START-3 សន្ធិសញ្ញាដែលបានទទួលការចុះហត្ថលេខានៅក្រុង Prague កាលពីថ្ងៃទី៨ មេសា ឆ្នាំ២០១០ ដោយ លោកប្រធានាធិបតីអាមេរិក អូបាម៉ាផ្ទាល់និងសមភាគីរុស្ស៊ីរបស់គាត់កាលណោះ គឺលោកប្រធានាធិបតី មេដវេដេវ។ ហើយតាំងពីពេលនោះមក គ្មានការពិភាក្សាអ្វីណាទៀតឡើយ អំពី ការរំសាយសព្វាវុធនុយក្លេអ៊ែរ រវាងអតីតគូប្រជែងទាំងពីរនៃសម័យសង្គ្រាមត្រជាក់។
ជាការកត់សម្គាល់ ពេលសន្ទនានឹងគ្នាតាមទូរសព្ទនោះ រដ្ឋមន្ត្រីការពារជាតិរុស្ស៊ី លោក Serguei Shoiguនិងសមភាគីអាមេរិក លោក Chuck Hagel ក៏បានផ្លាស់ប្តូរទស្សនៈ ជុំវិញស្ថានការណ៍នៅប្រទេស អាហ្វហ្កានិស្ថានកូរ៉េខាងជើង អ៊ីរ៉ង់និង ស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ