ចាប់ពីថ្ងៃទី១កក្កដាមានច្បាប់ថ្មីៗជាច្រើនចូលជាធរមាននៅរុស្ស៊ី
ច្បាប់ទាំងនេះ ចែងអំពីការពង្រីកផ្ទៃដីរដ្ឋធានីម៉ូស្គូសឹង២ដងកន្លះ ការដំឡើងប្រាក់ពិន័យរាប់សិបដងចំពោះការរំលោភលើបទបញ្ញត្តិចរាចរណ៍ចំពោះការប្រកបរបររត់តាក់ស៊ី ដោយគ្មានអាជ្ញាប័ណ្ណក៏ដូចជាចែងអំពីការបន្ថយចំនួនរថយន្តដែលមានសិទ្ធិប្រើភ្លើងភ្លឹបភ្លែតលើដំបូល ការដំឡើងថ្លៃទឹក ថ្លៃភ្លើង ថ្លៃឧស្ម័ន ថ្លៃពន្ធបន្ថែមលើបារី និង សុរា។ល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
ជាបឋម ចាប់ពីថ្ងៃទី១កក្កដាម្សិលមិញមក ផ្ទៃដីរដ្ឋធានីម៉ូស្គូ កើនឡើងសឹង២ដងកន្លះ ដោយវាតតាមទិសទៅ និរតី គឺពី១.០៧០ រហូតដល់ ២.៥១០ គ.ម.២ ហេតុដែលខាងផ្ទៃក្រឡា គឺ លើកក្រុងម៉ូស្គូ ពីចំណាត់ថ្នាក់ទី៣១ រវាងក្រុង Bagdad ប្រទេសអ៊ីរ៉ាក់ និងក្រុង Hongkong ឲ្យ ឡើងជាប់បាន លេខ៦ក្នុងលោក នៅចន្លោះក្រុង Alexandrie អេហ្ស៊ីប និងក្រុង Ankara តួកគី។
ខាងចំនួនបណ្តាជន ដែលតាមតួលេខដើមឆ្នាំ២០១២ គឺមាន១០លាន៤សែននាក់ ក្រោយពី ពង្រីកទៅ ឡើងដល់ ១០លាន៧សែននាក់ បាននិងបន្តស្ថិតនៅក្នុងចំណោម ១០ក្រុងនាំមុខគេក្នុងលោក។
ចំពោះការរំលោភលើបទបញ្ញត្តិចរាចរណ៍ ប្រាក់ពិន័យ នឹងកើនឡើងក្នុងទំហំ ពី៣ទៅ១៥ដង អាស្រ័យនឹង ប្រភេទរំលោភ ហើយនៅរដ្ឋធានីម៉ូស្គូ និងអតីតរាជធានី ក្រុងSaint-Petersbourg គឺនឹងកើនឡើង ក្នុងទំហំ ពី១០ ទៅ ៣០ដង។ ឧទាហរណ៍ ការចតរថយន្តនៅត្រង់កន្លែងដែល ទុកសម្រាប់ ឡានBusក្រុង ឫនៅចម្ងាយខ្លីជាង១៥ម៉ែត្រ ពីទីនោះ តម្រូវឲ្យបង់ពិន័យ ១.០០០រូប្ល គឺ១០ដងលើសពីមុន។ ករណីក្រុងម៉ូស្គូ និង ក្រុង Saint-Petersbourg គឺត្រូវបង់ដល់៣.០០០រូប្ល។
ចាប់ពីថ្ងៃទី១កក្កដាដែរ ចំពោះការប្រកបរបរ រត់តាក់ស៊ីដោយគ្មានអាជ្ញាប័ណ្ណកាលណាតម្រួត ចរាចរណ៍ស្ទាក់ជាប់គឺត្រូវបង់១លើកៗ ក្នុងទឹកប្រាក់៥.០០០រូប្ល។ ជាការកត់សម្គាល់គឺចាប់ពីថ្ងៃ២៥កក្កដាឆ្នាំមុនមក ដែលមានចេញអាជ្ញាប័ណ្ណចំនួន ១ម៉ឺន៧.០០០ ដល់អ្នកបើកតាក់ស៊ី។ មិនតែប៉ុណ្ណោះ អាជ្ញាប័ណ្ណចំនួន ១ម៉ឺន៥.០០០ ក៏មានចេញឲ្យអ្នកបើកតាក់ស៊ីនៃតំបន់ជុំវិញម៉ូស្គូហើយអាជ្ញាប័ណ្ណនេះ ក៏បើកផ្លូវឲ្យគេ ចូលមករកស៊ី ក្នុងរដ្ឋធានីផ្ទាល់តែម្តង។
ទោះយ៉ាងណាក្តី ក៏អាជ្ញាធរម៉ូស្គូ ប្រមាណថា នៅមានតាក់ស៊ី ៤ម៉ឺនទៀតដែល បន្តឆ្លៀតរកស៊ី ទាំងល្មើសច្បាប់។
ស្របនឹងក្រឹត្យប្រធានាធិបតីចេញ ១ខែកន្លះមុន គឺចាប់ពីឥឡូវទៅដែលចំនួនរថយន្តពួកមន្ត្រី មានសិទ្ធិប្រើសញ្ញាភ្លើងភ្លឹបភ្លែតលើដំបូល ដើម្បីបើកវ៉ាគេស្រេចតែចិត្ត ត្រូវបន្ថយសឹង ២ដង គឺពី ៩៦៥គ្រឿង ចុះដល់ ៥៦៩គ្រឿង នៅទូទាំងប្រទេស។
ចាប់ពីថ្ងៃទី១កក្កដាមក សម្រាប់ឆមាសទី២ឆ្នាំ២០១២នេះ ថ្លៃទឹក ថ្លៃកម្តៅថ្លៃភ្លើងអគ្គិសនី ថ្លៃឧស្ម័ន កើនឡើងជាមធ្យមនៅទូទាំងប្រទេសរុស្ស៊ី គឺ១២,៤%។ ចំណែកនៅរដ្ឋធានីម៉ូស្គូ គឺកើនឡើង១៥%។ ទាំងថ្លៃពន្ធមិនចំពោះ ហូតពីបារី និង សុរា ដែលសុទ្ធតែជាគ្រឿងនាំឲ្យ ខូច ដល់សុខភាពប្រជាជន បានកើនឡើង២០% ទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ