សហគមន៍អន្តរជាតិកំពុងរួមគ្នាដើម្បីជួយរំដោះចំណាប់ខ្មំាងកូនសិស្សនៅនីហ្សេរីយ៉ា
នៅក្នុងប្រទេសនីហ្សេរីយ៉ា អស់រយៈពេលជាច្រើនសប្តាហ៍កន្លងមកហើយដែលចំណាប់ខ្មំាងសិស្សសាលាស្រីទំាងជាង ២០០នាក់កំពុងបន្តស្ថិតក្នុងកណ្តាប់ដៃរបស់ពួកអ៊ីស្លាមនិយមជ្រុលបូកូ ហារ៉ាម។ ពួកនេះបានគំរាមលក់ ព្រមទំាងចាប់បង្ខំឲ្យចំណាប់ខ្មំាងទំាងអស់រៀបការទៀតផង។ គឺនៅក្នុងស្ថានការណ៍ដ៏បន្ទាន់នេះហើយដែលសហគមន៍អន្តរជាតិបាន និងកំពុងរួមសហការណ៍គ្នាជួយរដ្ឋាភិបាលប្រទេសនីហ្សេរីយ៉ាដើម្បីដោះលែងសិស្សសាលាទំាងនោះ។
ចុះផ្សាយនៅថ្ងៃ៖
ស្តាប់ - ០១:៥៣
កម្មវត្ថុសំខាន់ដំបូង គឺស្វែងរកឲ្យឃើញនូវទីតំាងដែលពួកឧទ្ទាមបូកូ ហារ៉ាមកំពុងលាក់ទុកចំណាប់ខ្មំាងសិស្សសាលាស្រីៗដែលមានអាយុពី ១៥ ទៅ ១៨ឆ្នំាទំាងជាង ២០០នាក់។ ពេលវេលាកាន់តែខិតទៅមុខ ក្តីព្រួយបារម្ភក៏កាន់មានខ្លំាងឡើង ពិសេសបន្ទាប់ពីចលនាឧទ្ទាមមួយនេះបានប្រកាសឲ្យដឹងនាពេលថ្មីៗនេះថា ពួកគេនឹងយកសិស្សសាលាស្រីៗទំាងនោះទៅលក់ ព្រមទំាងចាប់បង្ខំឲ្យរៀបការទៀតផង។ គឺជាស្ថានការណ៍មួយដែលមិនអាចធ្វើឲ្យសហគមន៍អន្តរជាតិបន្តឈរឱបដៃមើលបានទៀតទេ។ តំាងពីដើមសប្តាហ៍នេះមក សហគមន៍អន្តរជាតិ មានអង្គការសហប្រជាជាតិ អង់គ្លេស បារំាង ចិន និងសហរដ្ឋអាមេរិកបានស្នើជំនួយរបស់ខ្លួនចំពោះរដ្ឋាភិបាលប្រទេសនីហ្សេរីយ៉ាក្នុងការប្រឆំាងនឹងចលនាបូកូ ហារ៉ាម ពិសេសរំដោះចំណាប់ខ្មំាងសិស្សសាលាស្រីៗទំាងជាង ២០០នាក់នោះ។
អ្វីដែលក្រុមប្រទេសផ្តល់ជំនួយត្រូវព្យាយាមចៀសវាងនោះ គឺការស្នើជំនួយ និងប្រតិបត្តិការដូចគ្នា។ តែជាលក្ខណៈទូទៅ ជំនួយរបស់សហគមន៍អន្តរជាតិបានផ្តោតសំខាន់លើការស៊ើបរកព័ត៌មានជុំវិញទីតំាងដែលពួកបូកូ ហារ៉ាមកំពុងលាក់ចំណាប់ខ្មំាង។ សម្រាប់សហរដ្ឋអាមេរិក ទីក្រុងវ៉ាស៊ីនតោនបានបញ្ជូនកម្លំាងទាហានរបស់ខ្លួនទៅកាន់ប្រទេសនីហ្សេរីយ៉ាផ្ទាល់ដើម្បីស្វែងរកទីតំាង និងបើកប្រតិបត្តិការចូលរួមដោះលែងចំណាប់ខ្មំាងតែម្តង។ លោកប្រធានាធិបតីអាមេរិកអូបាម៉ាបានទម្លាយឲ្យដឹងថា ការចាប់សិស្សសាលាស្រីៗធ្វើជាចំណាប់ខ្មំាងពេលនេះនឹងមិនអាចឲ្យពិភពលោកឈរនៅស្ងៀមបានទេ។
សម្រាប់ជំនួយរបស់ប្រទេសបារំាង និងចិនវិញ គេនៅមិនទាន់អាចដឹងលំអិតបានទេ។ តែលោកប្រធានាធិបតីបារំាងហ្រ្វង់ស័រ ហូឡង់បានប្រកាសឲ្យដឹងពីការបញ្ជូនក្រុមជំនួយមួយក្រុមនាពេលឆាប់ៗខាងមុខ។ នៅឯអង្គការសហប្រជាជាតិឯណោះ UN បានបង្ហាញចេញនូវផែនការសម្រាប់ការពារសន្តិសុខ និងសុវត្ថិភាពនៅតាមសាលារៀន ព្រមទំាងការពារជនស៊ីវិលនៅក្នុងប្រទេសនីហ្សេរីយ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ