កូរ៉េខាងជើងទាមទារឲ្យប៉ាណាម៉ាដោះលែងនាវាដឹកអាវុធរបស់ខ្លួន
ចុះផ្សាយនៅថ្ងៃ៖
ស្តាប់ - ០៤:៣២
បញ្ហាចម្រូងចម្រាសនៅតែបន្តកើតមាន ជុំវិញការដែលប៉ាណាម៉ាចាប់កប៉ាល់របស់កូរ៉េខាងជើង ដែលគេឆែកឃើញមានដឹកគ្រឿងសព្វាវុធ។ គុយបាបានអះអាងថា អាវុធនៅលើកប៉ាល់កូរ៉េខាងជើងនេះ គឺជាអាវុធរបស់គុយបា។ កាលពីថ្ងៃពុធម្សិលមិញ កូរ៉េខាងជើងទាមទារឲ្យប៉ាណាម៉ាដោះលែងកប៉ាល់ និងអ្នកដើរកប៉ាល់របស់ខ្លួនវិញជាបន្ទាន់។ ក៏ប៉ុន្តែ អាជ្ញាធរប៉ាណាម៉ាមិនព្រម ដោយសង្ស័យថា ការដឹកនាំគ្រឿងសព្វាវុធនេះ គឺជាការរំលោភលើទណ្ឌកម្មរបស់អ.ស.ប។
សំណួរ-តើប៉ាណាម៉ាសំអាងលើសិទ្ធិអំណាចអ្វី ដែលអាចស្ទាក់ចាប់កប៉ាល់របស់កូរ៉េខាងជើងបែបនេះ?
អាជ្ញាធរប៉ាណាម៉ាមានសិទ្ធិអំណាច ក្នុងការស្ទាក់ចាប់ និងឆែកឆេរកប៉ាល់របស់កូរ៉េខាងជើងបាន ព្រោះនេះជាសិទ្ធិអំណាច ដែលទទួលបានពីសេចក្តីសម្រេចរបស់ក្រុមប្រឹក្សាសន្តិសុខអ.ស.ប.។ គឺសេចក្តីសម្រេចលេខ ១៧១៨ ចុះថ្ងៃទី១៤ ខែតុលា ឆ្នាំ២០០៦ នៅក្រោយពេលដែលកូរ៉េខាងជើងបានធ្វើការសាកល្បងអាវុធនុយក្លេអ៊រ។
សេចក្តីសម្រេចនេះមានចែងច្រើនចំណុច ក្នុងនោះ មានមួយចំណុចចែងថា ប្រទេសជាសមាជិកអ.ស.ប មានសិទ្ធិស្ទាក់ចាប់កប៉ាល់ដែលបើកចេញពីកូរ៉េខាងជើង ឬធ្វើដំណើរឆ្ពោះទៅកូរ៉េខាងជើង ដើម្បីឆែកឆេរមើលក្រែងមានដឹកគ្រឿងសព្វាវុធ ដែលហាមឃាត់ដោយអ.ស.ប។
សេចក្តីសម្រេចដដែលនេះក៏មានចែងផងដែរ អំពីការហាមឃាត់រាល់ការនាំចេញ និងនាំចូលទៅកូរ៉េខាងជើង នូវរាល់គ្រឿងសព្វាវុធធុនធ្ងន់ ដូចជា រថក្រោះ រថពាសដែក មីស៊ីល យន្តហោះចម្បាំង ព្រមទាំងគ្រឿងបន្លាស់ និងផ្នែកផ្សេងទៀត ដែលគណៈកម្មាធិការទណ្ឌកម្មរបស់ក្រុមប្រឹក្សាសន្តិសុខជាអ្នកកំណត់។
ដូច្នេះ អ្វីដែលប៉ាណាម៉ាធ្វើនៅពេលនេះ (ស្ទាក់ចាប់ និងឆែកឆេរកប៉ាល់កូរ៉េខាងជើង រួចហើយរាយការណ៍ទៅក្រុមប្រឹក្សាសន្តិសុខអ.ស.ប) គឺស្របទៅនឹងការចែងនៃសេចក្តីសម្រេចរបស់ក្រុមប្រឹក្សាសន្តិសុខ។
សំណួរ-ទាំងកូរ៉េខាងជើង និងទាំងគុយបាសុទ្ធតែបានអះអាងដូចគ្នាថា គ្រឿងសព្វាវុធនៅលើកប៉ាល់នេះ គឺជារបស់គុយបា ដែលបញ្ជូនទៅឲ្យកូរ៉េខាងជើងជួសជុល។ តើនេះអាចជាការរំលោភលើទណ្ឌកម្មរបស់អ.ស.បដែរឬទេ?
ការដឹកគ្រឿងសព្វាវុធនេះរំលោភលើទណ្ឌកម្មរបស់ក្រុមប្រឹក្សាសន្តិសុខដែរឬក៏អត់ ទាល់តែអ្នកជំនាញមកពីគណៈកម្មាធិការរបស់ក្រុមប្រឹក្សាសន្តិសុខ ដែលទទួលបន្ទុកអនុវត្តទណ្ឌកម្មលើកូរ៉េខាងជើងជាអ្នកត្រួតពិនិត្យមើលទើបអាចដឹងច្បាស់។ រដ្ឋាភិបាលប៉ាណាម៉ាបានស្នើសុំជាផ្លូវការរួចហើយ ឲ្យអ្នកជំនាញរបស់ក្រុមប្រឹក្សាសន្តិសុខមកពិនិត្យកប៉ាល់របស់កូរ៉េខាងជើង ហើយតាមគម្រោង អ្នកជំនាញរបស់អ.ស.ប នឹងមកដល់ប៉ាណាម៉ា នៅថ្ងៃទី៥ សីហាខាងមុខ។
ចំណុចសំខាន់ គឺគេនៅមិនទាន់អាចសន្និដ្ឋានឲ្យបានប្រាកដច្បាស់ថា តើគ្រឿងសព្វាវុធទាំងនេះ គឺពិតជាអាវុធចាស់ៗ ដែលគុយបាបញ្ជូនទៅឲ្យកូរ៉េខាងជើងជួសជុលពិតមែន ឬមួយក៏វាជាគ្រឿងសព្វាវុធ ឬគ្រឿងបន្លាស់សព្វាវុធ ដែលដឹកចេញពីគុយបា ឬដឹកចេញពីប្រទេសណាផ្សេង កាត់តាមគុយបា ដើម្បីលក់ឲ្យកូរ៉េខាងជើង?
សំណួរ-ក៏ប៉ុន្តែ បើតាមអ្នកជំនាញខាងគ្រឿងសព្វាវុធ ដែលបានឃើញរូបថតផ្សព្វផ្សាយដោយអាជ្ញាធរប៉ាណាម៉ា គេយល់ថា អាវុធដែលនៅលើកប៉ាល់របស់កូរ៉េខាងជើងនេះ គឺពិតជាអាវុធធុនចាស់ៗ ដែលផលិតតាំងពីសម័យសហភាពសូវៀតម៉្លេះ ហើយគេថា កូរ៉េខាងជើងដូចជាមិនត្រូវការទិញអាវុធចាស់ៗហួសសម័យបែបនេះទេ។
អ្នកជំនាញខាងគ្រឿងសព្វាវុធ ទាំងអ្នកជំនាញឯករាជ្យ និងអ្នកជំនាញរបស់កូរ៉េខាងត្បូង គេយល់ថា គ្រឿងសព្វាវុធទាំងអស់នេះ អាចជាអាវុធចាស់ៗ ដែលគុយបាបញ្ជូនទៅឲ្យកូរ៉េខាងជើងធ្វើការជួសជុល ដូចជាការអះអាងរបស់គុយបា និងកូរ៉េខាងជើងអ៊ីចឹងមែន ហើយស្ករ ស ដែលដឹកក្នុងកប៉ាល់ កប់ពីលើគ្រឿងសព្វាវុធនេះ អាចជាស្កររបស់គុយបា ឲ្យទៅកូរ៉េខាងជើង ដើម្បីធ្វើជាថ្លៃឈ្នួលជួសជុលគ្រឿងសព្វាវុធនេះ។
ក៏ប៉ុន្តែ យ៉ាងណាក៏ដោយ គេនៅមានសំណួរចោទសំខាន់មួយ គឺនៅត្រង់ថា ប្រសិនបើការដឹកគ្រឿងសព្វាវុធទាំងអស់នេះមិនមែនជារឿងខុសច្បាប់ និងមិនរំលោភទៅលើទណ្ឌកម្មរបស់ក្រុមប្រឹក្សាសន្តិសុខទេ ហេតុអ្វីបានជាកូរ៉េខាងជើងចាំបាច់លាក់បាំងធ្វើអ្វី? ហេតុអ្វីបានជាចាំបាច់យកគ្រឿងសព្វាវុធទៅកប់ពីក្រោមថង់ស្ករ ស ហើយដាក់ក្នុងឯកសារដឹកជញ្ជូនថាជាកប៉ាល់ដឹកស្ករ ស ដោយមិនរាយការណ៍ពីគ្រឿងសព្វាវុធនេះ? ម្យ៉ាងទៀត នៅពេលដែលអាជ្ញាធរប៉ាណាម៉ាឡើងទៅឆែកឆេរកប៉ាល់នេះ ក្រុមអ្នកដើរកប៉ាល់កូរ៉េខាងជើងបានព្យាយាមរារាំងមិនឲ្យឆែកឆេរ។
ហេតុដូច្នេះហើយបានជាមានមន្រ្តីការទូតអ.ស.បខ្លះគិតថា ការដឹកជញ្ជូនគ្រឿងសព្វាវុធ នៅលើកប៉ាល់របស់កូរ៉េខាងជើងនេះ ប្រហែលជាមានការរំលោភលើទណ្ឌកម្មរបស់ក្រុមប្រឹក្សាសន្តិសុខអ.ស.ប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ