ប៉ាណាម៉ាឃាត់នាវាកូរ៉េខាងជើងដែលមានដឹកសព្វាវុធ
ចុះផ្សាយនៅថ្ងៃ៖
អាជ្ញាធរនៃសាធារណរដ្ឋប៉ាណាម៉ាបានឃាត់កប៉ាល់ មួយគ្រឿង មានដោតទង់ជាតិកូរ៉េខាងជើង ដែលចង់ឆ្លងកាត់ព្រែកជីកប្រទេសប៉ាណាម៉ា កាលពីល្ងាចថ្ងៃចន្ទទី ១៥ កក្កដា។ បើតាមការប្រកាសរបស់លោកប្រធានាធិបតីប៉ាណាម៉ា គេបានរកឃើញគ្រឿងប្រដាប់ប្រដារសម្រាប់ផលិតមីស៊ីលនៅក្នុងកប៉ាល់របស់កូរ៉េខាងជើង។
អាជ្ញាធរប៉ាណាម៉ាមិនបានដឹងមុនថា កប៉ាល់កូរ៉េខាងជើងមានដឹកសព្វាវុធទេ។ ដំបូងឡើយ អាជ្ញាធរបានឃាត់កប៉ាល់ ដើម្បីឆែកមើល ព្រោះគេសង្ស័យថា មានដឹកថ្នាំញៀន។ ប៉ុន្តែ ដោយសារតែក្រុមជើងដើរកប៉ាល់កូរ៉េខាងជើង ដែលមានចំនួន៣៥នាក់ធ្វើការប្រឆាំង បះបោរដាច់ណាត់ មិនឲ្យចុះឆែកឆេរ ហើយមេបញ្ជាការកប៉ាល់នោះទៀត ក៏មានបំណងចង់ធ្វើអត្តឃាត អ៊ីចឹងគេក៏ចាប់សង្ស័យកាន់តែខ្លាំង ពីវត្ថុដែលផ្ទុកក្នុងកប៉ាល់។
នៅពេលគេចុះពិនិត្យគ្រប់កន្លែងក្នុងកប៉ាល់ គេឃើញស្កក្រហម ជាង២ម៉ឺនតោនដែលគេដាក់គរ បាំងកុងទឺណែ។ ហើយក្នុងកុងទឺណែ គេរកឃើញ មីស៊ីល និងគ្រឿងបំណែករបស់វាយ៉ាងច្រើន។ ប្រធានាធិបតីប៉ាណាម៉ាដែលបានបង្ហោះរូបថតគ្រាប់មីស៊ីលតាមបណ្តាញសង្គមTwetters បានមានប្រសាសន៍ថា អាជ្ញាធរប៉ាណាម៉ានឹងឃាត់កប៉ាល់កូរ៉េខាងជើងមួយរយៈសិន ទម្រាំដល់ពេលអ្នកជំនាញពីអង្គការសហប្រជាជាតិចុះមកពិនិត្យមើលថា តើសព្វាវុធក្នុងកប៉ាល់ជាប្រភេទអាវុធអ្វី។
នៅតាមកញ្ចក់ទូរទស្សន៍ម្សិលមិញ ប្រធានាធិបតី ប៉ាណាម៉ា បានប្រកាសហើយថា គេមិនអាចដឹកសព្វាវុធឆ្លងកាត់ព្រែកជីកប៉ាណាម៉ា ដោយគ្មានការសុំអនុញ្ញាតិនោះទេ។
សូមបញ្ជាក់បន្តិចដែរថា ក្នុងមួយឆ្នាំៗ មានកប៉ាល់ដឹកទំនិញ ជាង មួយម៉ឺនគ្រឿងឆ្លងកាត់ព្រែកជីកប៉ាណាម៉ា គឺតំណាងឲ្យពាណិជ្ជកម្មពិភពលោក៥ភាគរយ។ អាមេរិកដែលបានប្រគល់ព្រែកជីកទៅឲ្យប៉ាណាម៉ាគ្រប់គ្រងវិញនៅឆ្នាំ ១៩៩៩ មានសិទ្ធិសឹងតែផ្តាច់មុខក្នុងការប្រើព្រីកជីកោះ ចំណែកប៉ាណាម៉ា វិញ ចាប់តាំងពីបានសិទ្ធិគ្រប់គ្រងព្រែកជីក ប្រវែង ៨២គីឡូម៉ែត្រនោះវិញ ពឹងអាស្រ័យទាំងស្រុងលើព្រែកជីក ដែលជាប្រភពចំណូលជាតិ។
កប៉ាល់កូរ៉េខាងជើងចេញដំណើរពីប្រទេសគុយបា ត្រូវឆ្លងកាត់ព្រែកប៉ាណាម៉ា ដើម្បីឆ្លងពីមហាសមុទ្រអាត្លង់ទិក ទៅមហាសមុទ្រប៉ាស៊ីហ្វិកតំរង់កូរ៉េខាងជើងវិញ។
គុយបាដែលជាប្រទេសកុម្មុយនិស្តចុងក្រោយគេ នៅអាមេរិកឡាទីន បានរក្សាទំនាក់ទំនងជិតស្និទ្ធជាមួយកូរ៉េខាងជើង។ ប្រទេសកុម្មុយនិស្តទាំងពីរមានទំនាក់ទំនងល្អជាមួយគ្នាតាំងពីទសវត្សរ៍ ឆ្នាំ ១៩៦០ នៅក្រោយសង្រ្គាមត្រជាក់ត្រូវបញ្ចប់។ នៅក្នុងសម័យដឹកនាំរបស់លោកប្រធានាធិបតីគីម អ៊ីលស៊ុង ដែលនៅពេលនោះ កូរ៉េខាងជើងស្គាល់ភាពរុងរឿង ប្រធានាធិបតីកូរ៉េខាងជើង បានបញ្ជូនអ្នកបច្ចេកទេសរបស់ខ្លួន ទៅជួយរដ្ឋាភិបាលគុយបា ដែលត្រូវប្រទេសលោកខាងលិច ជាពិសេសអាមេរិក ដាក់ឲ្យនៅក្រៅរបង មិនរាប់រក។
ទំនាក់ទំនងស្អិតល្មួតរវាងប្រទេសកុម្មុយនិស្តទាំងពីរ ស្តែងឡើង ផងដែរ នៅក្នុងពេលលោកអគ្គមគ្គទេសក៍គីម ជុងអ៊ីល ទទួលមរណភាព។ កាលនៅះ រដ្ឋាភិបាលគុយបា ដោយមិនបានពន្យល់លម្អិតពីមូលហេតុ បានប្រកាសកាន់ទុក្ខជាតិ បីថ្ងៃសម្រាប់លោកគីម ជុងអ៊ីល។
គុយបា ប្រហែលជាត្រូវងាកត្រលប់ជួយសម្ព័ន្ធមិត្តរបស់ខ្លួនវិញ ព្រោះថា ទាំងផ្នែកសេដ្ឋកិច្ច និងនយោបាយ កូរ៉េខាងជើង ត្រូវធ្លាក់ចុះដុនដាប ចាប់តាំង ពីសហគមន៍អន្តរជាតិដាក់ទណ្ឌកម្ម។ របបកុម្មុយនិស្តបានបាញ់សាកល្បងមីស៊ីល ជាច្រើនលើក ជាច្រើន សា ដោយផ្គើននឹងការហាមរបស់ក្រុមប្រឹក្សាសន្តិសុខរបស់អង្គការសហប្រជាជាតិ។ ជារួមទៅ អង្គការសហប្រជាជាតិបានដាក់ទណ្ឌកម្មបន្ថេមលើកូរ៉េខាងជើង និងហាមមិនឲ្យមានការដឹកសព្វាវុធ លើកលែងតែអាវុធធុនតូច សំដៅចូលទៅកូរ៉េខាងជើង ឬចេញពីប្រទេសនេះ។
កូរ៉េខាងជើងពិតជាមានសមត្ថភាពផលិតមីស៊ីលបាញ់បានចម្ងាយឆ្ងាយមែនហើយ។ ដូចបាននិយាយខាងដើម កូរ៉េខាងជើង ទើបបាញ់ជោគជ័យក្នុងការបាញ់មីស៊ីល រយៈចម្ងាយឆ្ងាយ កាលពីខែកុម្ភៈកន្លងទៅ ដែលបានបង្កឲ្យមានការមិនពេញចិត្តពីសហគមន៍អន្តរជាតិ។ បើនិយាយពីមីស៊ីលបាញ់បានចម្ងាយមធ្យម គឺអាចបាញ់ដល់កូរ៉េខាងត្បូង ឬជប៉ុន កូរ៉េខាងជើងមានសមត្ថភាពចេះផលិតរួចហើយដែរ។
ប៉ុន្តែ បើនិយាយពីមីស៊ីលដែលអាចផ្ទុកក្បាលគ្រាប់នុយក្លេអ៊ែរ គេនៅសង្ស័យនៅឡើយ ថា កូរ៉េខាងជើងអាចមានសមត្ថភាពផលិតបាន ព្រោះថា ការផលិតមីស៊ីល ជាមួយក្បាលគ្រាប់នុយក្លេអ៊ែរ មានលក្ខណៈស្មុគស្មាញខ្លាំងណាស់។ អ៊ីចឹងហើយ បានគេសង្ស័យថា គ្រឿងដំឡើងមីស៊ីលដែលមានលក្ខណៈស្មុគស្មាញ ដែលគេចាប់បានក្នុងកប៉ាល់កូរ៉េខាងជើង ដឹកចេញពីគុយបា លើកនេះ អាចនឹងត្រូវយកទៅប្រើដើម្បីផលិតមីស៊ីលផ្ទុកក្បាលគ្រាប់នុយក្លេអ៊ែរ។
មួយវិញទៀត បើតាមការពន្លយព័ត៌មានពីសមាជិកតំណាងរាស្រ្តអាមេរិក កាលពីពេលថ្មីៗនេះ កូរ៉េខាងជើងកំពុងត្រៀមបាញ់មីស៊ីលដែលមានផ្ទុកក្បាលគ្រាប់នុយក្លេអ៊ែរ។ សមាជិកសភាអាមេរិកបានយោងទៅលើរបាយការណ៍របស់ទីភ្នាក់ងារស៊ើបការណ៍សម្ងាត់យោធា ដែលជាផ្នែកមួយរបស់ទីភ្នាក់ងារCIA។ ប៉ុន្តែ ទាំងរដ្ឋាភិបាលទីក្រុងវ៉ាស៊ីនតោន និងសេអ៊ូលបានបដិសេធព័ត៌មាននេះ និងនៅតែបញ្ជាក់ពីសមត្ថភាពមានកម្រិតរបស់ទីក្រុងព្យុងយ៉ាងដើម្បីផលិតអាវុធដ៏ទំនើបមួយនេះ។
ពីពេលនេះ ដល់ចុងខែកក្កដា គេនឹងបានមើលដឹងពីសមត្ថភាពពិតប្រាកដរបស់ទីក្រុងព្យុងយ៉ាង ក្នុងការផលិតគ្រាប់មីស៊ីល ព្រោះថា ទីក្រុងព្យុងយ៉ាងកំពុងត្រៀមខ្លួនប្រារព្ធខួប៦០ឆ្នាំនៃការបញ្ចប់សង្រ្គាមកូរ៉េ ដែលត្រូវធ្វើនៅថ្ងៃទី ២៧កក្កដាខាងមុខ។ បើតាមរូបភាពថតបានពីផ្កាយរណប ទាហាន១ម៉ឺននាក់កំពុងហ្វឹកហ្វឺនរៀងរាល់ថ្ងៃ ដើម្បីដើរក្នុងព្យុហយាត្រា ចំណែកមីស៊ីលបាញ់រយៈចម្ងាយជិត និងមធ្យម ត្រូវគេដំឡើងរួចហើយ ដាក់លើតួម៉ាស៊ីនបាញ់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ