បញ្ហាសុខភាពរបស់លោកអៀងសារីត្រូវបានតុលាការបើកសវនាការនៅថ្ងៃព្រហស្បតិ៍នេះ
នៅថ្ងៃព្រហស្បតិ៍ទី៨វិច្ឆិកានេះ អង្គជំនុំជម្រះសាលាដំបូងរបស់តុលាការខ្មែរក្រហម បានបើកសវនាការដើម្បីស្តាប់សក្ខីកម្មរបស់សាក្សីជំនាញវេជ្ជសាស្ត្រដែលបានពិនិត្យនិងវាយតម្លៃលើស្ថានភាពសុខភាពរបស់លោក អៀង សារីក្នុងអំឡុងពេលដែលគាត់កំពុងទទួលការសម្រាកព្យាបាលនៅក្នុងមន្ទីរពេទ្យមិត្តភាពកម្ពុជា-សូវៀត។
ចុះផ្សាយនៅថ្ងៃ៖
អ្នកជំនាញវេជ្ជសាស្ត្រដែលបានធ្វើរបាយការណ៍សុខភាពរបស់លោកអៀង សារីនិងដែលបានចូលមកឆ្លើយសំណួររបស់ចៅក្រមនិងភាគីទាំងអស់នៅក្នុងសវនាការ គឺលោកសាស្ត្រាចារ្យ ចន ខេមប៊ែល មកពីប្រទេសញូវហ្សេលែន។ នៅក្នុងអំឡុងសវនាការសាធារណៈ នៅព្រឹកមិញ លោកសាស្ត្រាចារ្យ ចន ខេមប៊ែល បានជម្រាបជូនតុលាការថា លោក អៀង សារី មិនមានបញ្ហាខាងបញ្ញាស្មារតីទេ ក៏ប៉ុន្តែគាត់មានជំងឺប្រចាំកាយជាច្រើន។
លោកសាស្ត្រាចារ្យ ក៏បានផ្តល់អនុសាសន៍ថា ជនជាប់ចោទ អៀង សារី អាចចូលរួមសវនាការពីចម្ងាយ តាមរយៈបន្ទប់ដែលមានបំពាក់ដោយឧបករណ៍សោតទស្សន៍ដែលស្ថិតនៅជាន់ខាងក្រោមនៃសាលសវនាការ។ ដោយសារវ័យ ៨៧ ឆ្នាំ អៀង សារី មានស្ថានភាពសុខភាពចុះខ្សោយខ្លាំងមួយរយៈពេលចុងក្រោយនេះ ហើយគាត់ត្រូវបានបញ្ជូនទៅមន្ទីរពេទ្យមិត្តភាពកម្ពុជា-សូវៀត នៅថ្ងៃទី៧ ខែកញ្ញា ឆ្នាំ២០១២ និងទទួលការព្យាបាលជាពិសេសពីវេជ្ជបណ្ឌិតនៅទីនោះ។ លោក អៀង សារី ត្រូវបានបញ្ជូនពីមន្ទីរពេទ្យ មកកាន់ អ.វ.ត.ក. វិញ នៅថ្ងៃទី៧ ខែវិច្ឆិកា ឆ្នាំ២០១២។
សូមរំឭកថា នៅថ្ងៃទី៥ ខែវិច្ឆិកា ឆ្នាំ២០១២ អង្គជំនុំជម្រះសាលាដំបូង នៃអ.វ.ត.ក បានចាត់តាំងអ្នកជំនាញវេជ្ជសាស្ត្រផ្នែកមនុស្សចាស់ លោក ចន ខេមប៊ែល ដើម្បីធ្វើកោសល្យវិច័យជាថ្មីម្តងទៀត ព្រមទាំងធ្វើរបាយការណ៍លើស្ថានភាពវិវត្តន៍ចុងក្រោយ នៃសុខភាពរបស់លោក អៀង សារី ជូនតុលាការ។
យ៉ាងណាក៏ដោយ សេចក្តីសំរេចលើបញ្ហាសុខភាពរបស់លោក អៀង សារី ថាតើអតីតរដ្ឋមន្ត្រីការបរទេសខ្មែរក្រហមរូបនេះ អាចមកចូលរួមសវនាការដោយផ្ទាល់ នៃការកាត់ទោសរូបលោក ក្នុងសំណុំរឿង០០២ ជាមួយលោក នួនជា និងលោក ខៀវ សំផន ឬក៏ត្រូវតាមដានសវនាការពីចម្ងាយនោះ គឺអង្គជំនុំជម្រះ នឹងចេញសេចក្តីសម្រេចនៅពេលក្រោយ។
សូមរម្លឹកថា ថ្មីៗនេះ តុលាការខ្មែរក្រហម ទើបបានសម្រេចដោះលែងលោកស្រី អៀង ធីរិទ្ធ ភរិយារបស់លោក អៀង សារី ដោយសារតែលោកស្រី ត្រូវបានគ្រូពេទ្យរកឃើញថា មានជំងឺសសៃប្រាសាទ វង្វេងវង្វាន់ធ្ងន់ធ្ងរមិនអាចនាំយកមកកាត់ទោសបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ