ជូនពរនិងរិះគន់លាយឡំគ្នាជុំវិញការប្រារព្ធពិធីបុណ្យចូលឆ្នាំចិន
លោកនាយករដ្ឋមន្រ្តី ហ៊ុន សែន និងលោកសម រង្ស៊ី ប្រធានគណបក្សប្រឆាំងជូនពរប្រជាពលរដ្ឋខ្មែរជាប់សែស្រឡាយចិននៅប្រទេសកម្ពុជាក្នុងពិធីបុណ្យចូលឆ្នាំចិនឆ្នាំនេះប៉ុន្តែព្រមពេលជាមួយគ្នា លោក រ៉ុង ឈុន ប្រធានសមាគមគ្រូបង្រៀនឯករាជ្យកម្ពុជាបានអំពាវដល់សិស្សានុសិស្សនិងមន្ត្រីអោយបន្តធ្វើការធម្មតា។ ការអំពាវនាវនេះបានធ្វើឡើងបន្ទាប់ពីគេសង្កេតឃើញថា មន្ត្រីរាជការកាលពីឆ្នាំកន្លងមកមិនទៅធ្វើការរីឯកូនសិស្សមិនទៅសាលារៀនទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
មួយថ្ងៃមុនពិធីបុណ្យចូលឆ្នាំចិនចូលមកដល់ លោកនាយករដ្ឋមន្រ្តី ហ៊ុន សែន បានផ្ញើសារជូនពរទៅកាន់ប្រជាពលរដ្ឋខ្មែរជាប់សែស្រឡាយចិននៅក្នុងប្រទេសកម្ពុជា។ ប្រទេសកម្ពុជា មានបងប្អូនខ្មែរជាប់សែស្រឡាយចិនប្រមាណជាពី៧០ទៅ៨០ម៉ឺននាក់។
នៅក្នុងសាររបស់ខ្លួន ប្រមុខរាជរដ្ឋាភិបាលលោក ហ៊ុន សែន បានសរសេរថា ព្រះរាជាណាចក្រកម្ពុជាគឺជាគេហដ្ឋានដ៏កក់ក្តៅនៃប្រជារាស្ត្រទាំងអស់ក្នុងនោះមានបងប្អូនខ្មែរជាប់សែស្រឡាយចិនផងដែរ។
លោកនាយករដ្ឋមន្រ្តីបានបន្តបញ្ជាក់ក្នុងសាររបស់លោកថា ប្រជាជនខ្មែរនិងប្រជាជនខ្មែរជាប់សែស្រឡាយចិនបានរួមសុខ រួមទុក្ខនិងបានរួមសហការអភិវឌ្ឍន៍ប្រទេសជាមួយគ្នាអស់រយៈពេល៣២ឆ្នាំមកហើយរហូតមកដល់ពេលនេះ។ លោក ហ៊ុន សែន បានបន្តក្នុងសាររបស់លោកថា រូបគាត់និងភរិយាសូមចូលរួមសប្បាយរីករាយជាមួយបងប្អូនកាត់ចិនទាំងអស់និងជូនពរអោយពួកគេទទួលបានសេរីជ័យមង្គលនៅក្នុងបុណ្យចូលឆ្នាំថ្មីឆ្នាំនេះ។
ងាកមកលោក សម រង្ស៊ី ប្រធានគណបក្សប្រឆាំងសមរង្ស៊ីវិញ លោក ក៏បានឆ្លៀតយកឱកាសបុណ្យចូលឆ្នាំចិនឆ្នាំនេះជូនពរសារនយោបាយដល់បងប្អូនខ្មែរសែស្រឡាយចិនដែរ។ ក្នុងសាររបស់លោក លោក សម រង្ស៊ី បាននិយាយថា ជនជាតិខ្មែរជាប់សែស្រឡាយចិនជាផ្នែកមួយដ៏សំខាន់នៃប្រជាជាតិខ្មែរ។ ពួកគេបានចូលរួមចំណែកយ៉ាងសកម្មក្នុងការធ្វើអោយប្រទេសកម្ពុជាមានភាពរុងរឿងនិងសម្បូណ៌សប្បាយ។
ប្រធានគណបក្សប្រឆាំងរូបនេះបានបន្តទៀតថា សហគមន៍ខ្មែរជាប់សែស្រឡាយចិនមានតួនាទីសំខាន់ណាស់ក្នុងការពង្រឹងចំណងមិត្តភាពរវាងប្រទេសកម្ពុជានិងសាធារណរដ្ឋប្រជាមានិតចិន។ ប្រទេសចិនគឺជាសម្ព័ន្ធមិត្តយូរអង្វែងរបស់ប្រទេសកម្ពុជា។
លោក សម រង្ស៊ី ដែលបានបញ្ជាក់ថា ជីតាលួតរបស់លោកជាជនជាតិចិនមកពីប្រទេសចិនកាលពី១០០ឆ្នាំមុននោះ បានអំពាវនាវជំរុញអោយរដ្ឋាភិបាលកម្ពុជាបច្ចុប្បន្នត្រូវតែគាំទ្រគោលជំហររបស់ប្រទេសចិនប្រជាមានិតក្នុងជម្លោះប្រជុំកោះ Paracel ស្ថិតក្នុងដែនសមុទ្រចិនខាងត្បូង។
សាររបស់លោក នាយករដ្ឋមន្ត្រី ហ៊ុន សែន និងសាររបស់លោក សម រង្ស៊ី ប្រធានគណបក្សប្រឆាំងនៅឆ្នាំនេះគឺជាសារផ្លូវការដ៏កម្រមួយដែលគេពុំសូវបានឃើញទេកាលពីពេលមុន។ សារទាំងពីរនេះត្រូវបានគេមើលឃើញថា គឺបានធ្វើឡើងចំពេលដែលតួនាទីរបស់ប្រទេសចិនមានសារៈសំខាន់កាន់តែខ្លាំងឡើងទាំងនៅក្នុងប្រទេសកម្ពុជានិងនៅក្នុងពិភពលោកទាំងមូល។ ប៉ុន្តែ បើទោះបីជាយ៉ាងណាក៏ដោយក៏លោក រ៉ុង ឈុន ប្រធានសមាគមគ្រូបង្រៀនឯករាជ្យកម្ពុជាបានអំពាវដល់សិស្សានុសិស្សនិងមន្ត្រីរាជការទាំងអស់អោយបន្តធ្វើការជាធម្មតាពីព្រោះពិធីបុណ្យចូលឆ្នាំចិននេះមិនមែនជាពិធីរបស់ខ្មែរទេ។
ការអំពាវនាវនេះបានធ្វើឡើងបន្ទាប់ពីគេសង្កេតឃើញថា មន្ត្រីរាជការនិងកូនសិស្សភាគច្រើនកាលពីឆ្នាំកន្លងមកមិនទៅធ្វើការនិងមិនទៅសាលារៀនទេនៅក្នុងពិធីបុណ្យចូលឆ្នាំចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ