អ៊ីស្រាអែល ប៉ាឡេស្ទីន ៖ ក្រុមប្រឹក្សាសន្តិសុខអ.ស.ប. ទាមទារការឈប់បាញ់បន្ទាន់និងគ្មានលក្ខខណ្ឌ
ចុះផ្សាយនៅថ្ងៃ៖
ស្តាប់ - ០៦:១៨
គំនាបអន្តរជាតិ មានកាន់តែធ្ងន់ដាក់លើ ចលនាហាម៉ាស និងអ៊ីស្រាអែល ... ក្រុមប្រឹក្សាសន្តិសុខអង្គការអង្គការសហប្រជាជាតិ បានបើកជំនួបប្រជុំបន្ទាន់ នៅយប់មិញ ទាមទារឱ្យភាគីបក្សដិបក្សហាម៉ាស និងអ៊ីស្រាអែល គោរពច្បាប់មនុស្សធម៌ ឈប់បាញ់ជាបន្ទាន់ និងដោយគ្មានលក្ខខណ្ឌ។ នៅផ្ទាល់កន្លែង តាំងពីព្រហាមថ្ងៃចន្ទនេះ ដែលជាថ្ងៃបិទបញ្ចប់ការតមអាហារ រ៉ាម៉ាដង់របស់សាសនាអ៊ីស្លាម ភាពស្ងប់ស្ងាត់ហាក់កំពុងសណ្ឋិតលើតំបន់ហ្កាហ្សា។
ក្រុមប្រឹក្សាសន្តិសុខអង្គការសហប្រជាជាតិ ដែលបានជួបប្រជុំគ្នាជាបន្ទាន់នៅយប់មិញ នាទីក្រុងទីញូវយ៉ក បានសម្រេចអនុម័តចេញនូវសេចក្តីថ្លែងការណ៍រួម ទាមទារ ឱ្យអ៊ីស្រាអែល និងហាម៉ាស ឈប់បាញ់ ជាបន្ទាន់ និងដោយគ្មានលក្ខខណ្ឌ នៅតំបន់ហ្កាហ្សា។ អត្ថបទថ្លែងការណ៍ ដែលតាក់តែងឡើងដោយប្រទេសហ្ស័កដានី ប្រទេសជាសមាជិកសម្ព័ន្ធអារ៉ាបតែមួយគត់ ក្នុងក្រុមប្រឹក្សាសន្តិសុខអង្គការសហប្រជាជាតិ បានស្នើសុំឱ្យអ៊ីស្រាអែល និងហាម៉ាស ធ្វើយ៉ាងណារក្សាបទឈប់បាញ់ឱ្យបានពេញមួយថ្ងៃចន្ទ និងបន្តបន្ទាប់ទៅមុខទៀត ដោយឈរលើគោលការណ៍មនុស្សធម៌។
គោរពច្បាប់មនុស្សធម៌អន្តរជាតិ
អង្គការសហប្រជាជាតិ ចង់ឱ្យភាគីទាំងពីរ គោរពយ៉ាងពេញទំហឹងសិទ្ធិមនុស្សធម៌ អន្តរជាតិ និងជាពិសេសការការពារជីវិតជនស៊ីវិល។ សម្រាប់ក្រុមប្រឹក្សា ផ្តល់ជំនួយមនុស្សធម៌ គឺការចាំបាច់ដែលត្រូវធ្វើដោយគ្មានបង្អង់ និងអញ្ជើញភាគីបក្សដិបក្សឱ្យចូលតុចរចា ដើម្បីស្វែងរកបទឈប់បាញ់ជានិរន្តន៍បានយូរអង្វែងមួយ។
ប៉ុន្តែ ជាថ្មីម្តងទៀត តំណាងប៉ាឡេស្ទីន ប្រចាំអង្គការសហប្រជាជាតិ បានសម្តែងការសោកស្តាយ ចំពោះការសម្រេច របស់ក្រុមប្រឹក្សាសន្តិសុខ ដែលបានត្រឹមចេញសេចក្តីថ្លែងការណ៍ មិនមែនជាសេចក្តីសម្រេចចិត្តអង្គការសហប្រជាជាតិ និងគ្មានឮសោះការអំពាវនាវឱ្យអ៊ីស្រាអែល លើកការបិទខ្ទប់តំបន់ហ្កាហ្សា តាំងពីឆ្នាំ២០០៦។ ចំណែកខាងអ៊ីស្រាអែលវិញ តាមរយៈតំណាងការទូតប្រចាំអង្គការសហប្រជាជាតិ យល់ថា សេចក្តីថ្លែងការណ៍របស់ក្រុមប្រឹក្សា គ្មានចែងចំឈ្មោះចលនាហាម៉ាស ការបាញ់រ៉ុកកែត និងសិទ្ធិការពារខ្លួនរបស់អ៊ីស្រាអែល។
លោក អូបាម៉ា និយាយតាមទូរស័ព្ទដោយផ្ទាល់ ជួបនិយាយជាមួយនឹងនាយករដ្ឋមន្ត្រីអ៊ីស្រាអ៊ែល លោក ប៊ិនយ៉ាមីន នេតាន់យ៉ាហ៊ូ
តាំងពីវិបត្តិអ៊ីស្រាអែល ប៉ាឡេស្ទីនបានផ្ទុះឡើងជាថ្មី អ៊ីស្រាអែលបើកយុទ្ធនាការវាយសម្រុកលើតំបន់ហ្កាហ្សាមក គេឃើញតែរដ្ឋមន្ត្រីក្រសួងការបរទេស លោក ចន ឃែរី ទេ ជាអ្នកដើរតួចេញមុខចេញមាត់ ចុះផ្ទាល់ដល់កន្លែង និងដឹកនាំការចរចាផ្សេងៗ ពីអេហ្ស៊ីបដល់ ប៉ារីស ។ល។ និង។ល។ ប៉ុន្តែរាល់កិច្ចខំប្រឹងប្រែងទាំងអម្បាលម៉ាន សុទ្ធតែទទួលបរាជ័យ ៖ ហាម៉ាស និងអ៊ីស្រាអែល ជួបគ្នាចរចា តែនិយាយស្តាប់គ្នាមិនបាន គ្មានលទ្ធផល មិនអាចរកឃើញសោះកិច្ចព្រមព្រៀងឈប់បាញ់។
ហេតុដូច្នេះហើយ បានជាលោកប្រធានាធិបតី បានសម្រេចចិត្ត លើកទូរស័ព្ទ ហៅ និងនិយាយដោយផ្ទាល់មាត់ជាមួយនាយករដ្ឋមន្ត្រីអ៊ីស្រាអែល លោក ប៊ិនយ៉ាមីន នេតាន់យ៉ាហូតែម្តង ដោយសង្ឃឹមថាយុទ្ធសាស្ត្រថ្មីនេះ អាចមានប្រសិទ្ធភាពជាង។ លោក អូបាម៉ា បានប្រើសម្តី និងការគំរាមចំលើអ៊ីស្រាអែល ដោយពន្យល់ថា ដាក់ឱ្យដំណើរការបទឈប់បាញ់មនុស្សធម៌ភ្លាម និងដោយគ្មានលក្ខខណ្ឌ ជាយុទ្ធសាស្ត្រតែត្រូវតែទទួលយក។ ប៉ុន្តែអ៊ីស្រាអែល ដែលធ្លាប់ជាសម្ព័ន្ធមិត្ត ធ្លាប់គោរពអាមេរិក ហាក់ដូចជាហឹងត្រចៀក មិនស្តាប់ មិនទទួលយកអ្វីដែលប្រធានាធិបតីអាមេរិកបានស្នើ ដោយសំអាងថាអ៊ីស្រាអែលធ្វើគ្រប់យ៉ាងដើម្បីការពារអាយុជីវិតពលរដ្ឋអ៊ីស្រាអែល។
ភាពស្ងប់ស្ងាត់ ដែលមិនអាចទុកចិត្តបាន
ក្រោយជំនួបជាមួយប្រធានាធិបតីអាមេរិកតាមទូរស័ព្ទ និងកាលពីប៉ុន្មានម៉ោងមុន តំណាងរដ្ឋាភិបាលអ៊ីស្រាអែល បានប្រកាស ថា មើលមិនឃើញប្រយោជន៍ទទួលបានពីបទឈប់បាញ់ថ្មីឡើយ ក្នុងជម្លោះជាមួយសកម្មជនប្រដាប់អាវុធនៅតំបន់ហ្កាហ្សា ! ជាភាសាបដិសេធនឹងសំណើឈប់បាញ់របស់អាមេរិក បើទោះបីកាលពីថ្ងៃអាទិត្យម្សិលមិញ គឺខាងភាគីអ៊ីស្រាអែល ជាអ្នកសុំមុនឱ្យបន្តការឈប់បាញ់បន្ថែម២៤ម៉ោង ទៀត តែខាងហាម៉ាសច្រានចោល។ ពីរបីម៉ោងក្រោយ ខាងហាម៉ាស ងាកមកស្នើឈប់បាញ់ម្តង ប៉ុន្តែវាដូចជាហួសពេលបន្តិច អ៊ីស្រាអែលប្តូរចិត្ត ច្រានចោលវិញសំណើរបស់ប៉ាឡេស្ទីន ព្រោះពួកហាម៉ាស បាញ់គ្រាប់រ៉ុកឥតឈប់ គ្រាន់តែផុតម៉ោងសន្យាឈប់បាញ់ភ្លាម។
ប៉ុន្តែបើតាមប្រភពយោធាអ៊ីស្រាអែល អ៊ីស្រាអែល សុំមិនបញ្ចេញឈ្មោះ អ៊ីស្រាអែលទំនងជានឹងគោរពបទឈប់បាញ់ ហើយជាបទឈប់បាញ់ដែលគ្មានបញ្ជាក់រយៈពេល ពោលគឺជាការឈប់បាញ់ដោយគ្មានកាលកំណត់ ប៉ុន្តែកងកម្លាំងអ៊ីស្រាអែលនៅបន្តប្រតិបត្តិការប្រឆាំងនឹងរូងក្រោមដី ដែលពួកហាម៉ាសប្រើសម្រាប់វាយប្រហារអ៊ីស្រាអែល និងសម្រាប់លាក់អាវុធយុទ្ធភណ្ឌ។
ចំណែកនៅខាងហាម៉ាសវិញ ជាការពិត គេពុំឃើញមានការបាញ់គ្រាប់រ៉ុកកែត តាំងពីយប់មិញមក និយាយឱ្យចំតាំងពីពេលចូលដល់ថ្ងៃចុងក្រោយនៃពិធីបុណ្យបួសតមអាហារ រ៉ាម៉ាដង់របស់បណ្តាជនហ្កាហ្សា អ្នកកាន់សាសនាអ៊ីស្លាម។ សង្ឃឹមថា ការឈប់បាញ់នេះអាចនឹងបន្តបានយូរ ! ប៉ុន្តែគេមិនទាន់អាចរីករាយនឹងភាពស្ងប់ស្ងាត់ ដែលអូសបន្លាយពេលជាច្រើនមកហើយបានទេ គ្មានអ្វីជាទៀងទាត់ឡើយ ព្រោះអ៊ីស្រាអែល និងហាម៉ាស មិនទាន់រកឃើញកិច្ចព្រមព្រៀងរួមគ្នា ឈប់បាញ់នៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ