ប៉ាឡេស្ទីនច្រានចោលផែនការចរចាសន្តិភាពស្នើឡើងដោយលោកចន ឃែរី
ចុះផ្សាយនៅថ្ងៃ៖
នៅទីបំផុតទៅ ថ្នាក់ដឹកនាំប៉ាឡេស្ទីនបានច្រានចោលផែនការសន្តិភាព ដែលសម្របសម្រួលដោយលោកចន ឃែរី រដ្ឋមន្រ្តីការបរទេសអាមេរិក។ លោកឃែរី ដែលកំពុងស្ថិតនៅក្នុងប្រទេសហ្សកដានី កំពុងស្វះស្វែងព្យាយាមបញ្ចុះបញ្ចូលរដ្ឋាភិបាលប៉ាឡេស្ទីនបន្ថែមទៀត ដើម្បីឲ្យបើកការចរចាសន្តិភាព រវាងអ៊ីស្រាអែល និងប៉ាឡេស្ទីន។
សំណួរ-តើផែនការសន្តិភាព ដែលសម្របសម្រួលដោយលោកចន ឃែរី នៅពេលនេះ មានខ្លឹមសារយ៉ាងម៉េចខ្លះ?
ផែនការសន្តិភាព ដែលលោកចន ឃែរី កំពុងតែព្យាយាមសម្របសម្រួលឲ្យប៉ាឡេស្ទីន និងអ៊ីស្រាអែលយកធ្វើជាគោល ដើម្បីបើកការចរចា នៅពេលនេះ មិនមែនជាផែនការថ្មីទេ ប៉ុន្តែ ជាផែនការចាស់តាំងពីឆ្នាំ២០០២ម៉្លេះ។ វាក៏មិនមែនជាផែនការ ដែលស្នើឡើងដោយសហរដ្ឋអាមេរិកនោះដែរ ប៉ុន្តែ វាកើតចេញពីគំនិតផ្តួចផ្តើមរបស់អារ៉ាប៊ីសាអ៊ូឌីត ហើយដែលមានការគាំទ្រពីសម្ព័ន្ធអារ៉ាប់។
នៅក្នុងផែនការសន្តិភាពនេះ បើនិយាយដោយសង្ខេប ប្រទេសអារ៉ាប់ទាំងអស់សន្យាថា៖
- នឹងទទួលស្គាល់រដ្ឋអ៊ីស្រាអែលយ៉ាងពេញលេញ
- នឹងចុះកិច្ចព្រមព្រៀងសន្តិភាព ដើម្បីបញ្ចប់សង្រ្គាមជាស្ថាពរជាមួយអ៊ីស្រាអែល
- នឹងបង្កើតទំនាក់ទំនងការទូតជាធម្មតាជាមួយអ៊ីស្រាអែលឡើងវិញ
- នឹងធ្វើយ៉ាងណារក្សាសន្តិសុខដល់អ៊ីស្រាអែល ជាពិសេស គ្រប់ប្រទេសអារ៉ាប់ទាំងអស់នឹងមិនគាំទ្រ ឬមិនផ្តល់ទីជម្រកឲ្យក្រុមប្រដាប់អាវុធប៉ាឡេស្ទីនណាមួយ ដែលបង្កអសន្តិសុខនៅអ៊ីស្រាអែលទេ។
ជាថ្នូរមកវិញ គេទាមទារ ៣ចំណុចពីអ៊ីស្រាអែល៖
- ទីមួយ អ៊ីស្រាអែលត្រូវតែដកថយចេញពីដែនដី ដែលអ៊ីស្រាអែលដណ្តើមកាន់កាប់ នៅក្នុងអំឡុងសង្រ្គាមជាមួយប្រទេសអារ៉ាប់ (សង្រ្គាម៦ថ្ងៃ) កាលពីឆ្នាំ១៩៦៧។
- ទីពីរ អ៊ីស្រាអែលត្រូវតែអនុញ្ញាតឲ្យជនជាតិប៉ាឡេស្ទីន ដែលភៀសខ្លួនដោយសារសង្រ្គាម រវាងអ៊ីស្រាអែល និងអារ៉ាប់ អាចវិលត្រឡប់ទៅស្រុកកំណើតរបស់ខ្លួនវិញ ទៅតាមសេចក្តីសម្រេចរបស់ក្រុមប្រឹក្សាសន្តិសុខ (សេចក្តីសម្រេចលេខ ១៩៤) កាលពីឆ្នាំ១៩៤៨។
- ទីបី អ៊ីស្រាអែលត្រូវតែទទួលស្គាល់យ៉ាងពេញលេញ នូវរដ្ឋប៉ាឡេស្ទីនឯករាជ្យមួយ ដោយយកខ្សែបន្ទាត់ព្រំដែន ដែលមានមុនសង្រ្គាមឆ្នាំ១៩៦៧ ហើយដែលមានក្រុងយេរូសាឡឹមខាងកើត ជារដ្ឋធានី។
ថ្មីៗនេះ សម្ព័ន្ធអារ៉ាប់បានបន្ទន់ជំហរបន្ថែមទៀត ទាក់ទងនឹងខ្សែបន្ទាត់ព្រំដែនមុនឆ្នាំ១៩៦៧។ គេមិនទាមទារថា ចាំបាច់ត្រូវតែយកតាមខ្សែបន្ទាត់ព្រំដែននេះទាំងស្រុងទេ គឺគ្រាន់តែយកវាមកធ្វើជាគោលការណ៍ ហើយបើសិនជាមានជនជាតិអ៊ីស្រាអែលដែលបានតាំងទីលំនៅ ចូលទៅហួសខ្សែបន្ទាត់ព្រំដែននេះរួចហើយ ដើម្បីចៀសវាងកុំឲ្យមានការបណ្តេញប្រជាជនអ៊ីស្រាអែលចេញ គេនឹងសុខចិត្តឲ្យមានការដោះដូរដីគ្នា។
សំណួរ-បើផែនការនេះជាគំនិតផ្តួចផ្តើមរបស់ប្រទេសអារ៉ាប់ ហើយគាំទ្រដោយសម្ព័ន្ធអារ៉ាប់។ តើហេតុអ្វីបានជាប៉ាឡេស្ទីនបែរជាច្រានចោលបែបនេះទៅវិញ?
មេដឹកនាំប៉ាឡេស្ទីនមិនបានច្រានចោលសំណើរបស់លោកចន ឃែរី ទាំងស្រុងទេ ប៉ុន្តែ គេទាមទារឲ្យមានការកែប្រែចំណុចខ្លះ ជាពិសេស គឺទាមទារឲ្យមានការប្រកាសធានាច្បាស់លាស់ថា ការចរចាបង្កើតរដ្ឋប៉ាឡេស្ទីននេះត្រូវតែធ្វើឡើងដោយយកខ្សែបន្ទាត់ព្រំដែនមុនឆ្នាំ១៩៦៧ធ្វើជាគោល ហើយក្នុងអំឡុងពេលចរចានេះ អ៊ីស្រាអែលមិនត្រូវបន្តសាងសង់លំនៅដ្ឋានចូលហួសពីខ្សែបន្ទាត់ព្រំដែននេះ។
សម្រាប់មេដឹកនាំប៉ាឡេស្ទីន ចំណុចពីរនេះ គឺជាចំណុចសំខាន់ដែលមិនអាចខ្វះបាន ហើយទាមទារថា ប្រសិនបើមានការឯកភាពគ្នាបើកកិច្ចចរចាហើយ នៅពេលដែលប្រកាសបើកកិច្ចចរចា នៅក្នុងសេចក្តីប្រកាសនេះ ត្រូវតែមានចែងច្បាស់ៗ អំពីចំណុចទាំងពីរនេះ។
ដោយសារតែមានការទាមទារបែបនេះហើយ បានជាលោកចន ឃែរី មិនទាន់ចេញពីហ្សកដានី មកអាមេរិកវិញ នៅថ្ងៃនេះ ដើម្បីជួបចរចាជាមួយតំណាងប៉ាឡេស្ទីនជាថ្មីទៀត។ បើគិតទៅ ចាប់តាំងពីឡើងកាន់តំណែងជារដ្ឋមន្រ្តីការបរទេសជំនួសលោកស្រីហ៊ីឡារី គ្លីនតុន លោកចន ឃែរី បានធ្វើដំណើរទៅដើមបូព៌ា ៥លើករួចហើយ។ លើកនេះ គឺជាលើកទី៦ ហើយបើតាមគម្រោង លោកចន ឃែរី ចង់បញ្ចប់ដំណើរទស្សនកិច្ចលើកនេះ ជាមួយនឹងសេចក្តីប្រកាសមួយថា អ៊ីស្រាអែល និងប៉ាឡេស្ទីន ព្រមព្រៀងគ្នាវិលត្រឡប់មករកតុចរចាឡើងវិញ។
សំណួរ-ពីខាងភាគីអ៊ីស្រាអែលវិញ តើអ៊ីស្រាអែលមានជំហរយ៉ាងម៉េចដែរ ចំពោះសំណើរបស់លោកចន ឃែរី ឲ្យបើកកិច្ចចរចាជាមួយប៉ាឡេស្ទីនឡើងវិញនេះ?
កាលពីម្សិលមិញ មន្រ្តីអ៊ីស្រាអែលម្នាក់ដែលសុំមិនបញ្ចេញឈ្មោះ បានប្រាប់ទីភ្នាក់ងារព័ត៌មានរ៉យទ័រថា អ៊ីស្រាអែលទទួលយកសំណើរបស់លោកចន ឃែរី ក្នុងការបើកការចរចាលើផែនការសន្តិភាព ដែលផ្អែកលើខ្សែបន្ទាត់ព្រំដែនមុនឆ្នាំ១៩៦៧ និងសុខចិត្តទទួលយកគោលការណ៍នៃការដោះដូរដីគ្នាជាមួយប៉ាឡេស្ទីន។ ក៏ប៉ុន្តែ ក្រោយមក អ្នកនាំពាក្យរបស់នាយករដ្ឋមន្រ្តីអ៊ីស្រាអែល បានចេញមុខមកបដិសេធព័ត៌មាននេះវិញ។
រហូតមកទល់ពេលនេះ យើងឃើញថា អ៊ីស្រាអែលនៅតែប្រកាន់ជំហរដដែលដូចពីមុន គឺចង់ឲ្យមានការចរចាឡើងវិញជាមួយប៉ាឡេស្ទីន ក៏ប៉ុន្តែ ការចរចានេះត្រូវតែបើកធ្វើដោយមិនត្រូវដាក់លក្ខខណ្ឌអ្វីជាមុនទេ។ និយាយជារួមអ៊ីស្រាអែលនៅតែបដិសេធមិនព្រមផ្អាកការសាងសង់លំនៅដ្ឋានជនជាតិជ្វីហ្វ នៅក្នុងទឹកដីរបស់ប៉ាឡេស្ទីន។
ជាក់ស្តែង យើងឃើញថា កាលពីថ្ងៃពុធ នៅពេលដែលលោកចន ឃែរី កំពុងតែព្យាយាមបញ្ចុះបញ្ចូលឲ្យប៉ាឡេស្ទីនត្រឡប់មកតុចរចាវិញ ស្រាប់តែរដ្ឋាភិបាលអ៊ីស្រាអែលសម្រេចសាងសង់លំនៅដ្ឋានចំនួន ៧០០កន្លែងបន្ថែមទៀត នៅ Cisjordanie ដែលជាទឹកដីរបស់ប៉ាឡេស្ទីន បើគិតតាមខ្សែបន្ទាត់ព្រំដែនមុនឆ្នាំ១៩៦៧។
ការបន្តសាងសង់លំនៅដ្ឋានក្នុងទឹកដីប៉ាឡេស្ទីននេះ បើនិយាយតាមច្បាប់អន្តរជាតិ គឺជារឿងខុសច្បាប់។ សហគមន៍អន្តរជាតិជាទូទៅ ទាំងសហភាពអឺរ៉ុប និងទាំងរដ្ឋាភិបាលរបស់លោកអូបាម៉ា សុទ្ធតែបានទាមទារឲ្យអ៊ីស្រាអែលផ្អាកការសាងសង់លំនៅដ្ឋាននេះ។ ក៏ប៉ុន្តែ រដ្ឋាភិបាលរបស់លោកបេនយ៉ាមីន នេតាន់យ៉ាហ៊ូ មិនព្រមស្តាប់តាម។ នេះហើយ ដែលជាឧបសគ្គធំបំផុត ក្នុងការចរចាសន្តិភាព រវាងអ៊ីស្រាអែល និងប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ