បោះឆ្នោតប្រធានាធិបតីម៉ាលី៖ បេក្ខជនសំខាន់ពីរ ប្រាប់ថាខ្លួនមានប្រៀបលើគេ
ការបោះឆ្នោតប្រធានាធិបតីជុំទីមួយ នៅប្រទេសម៉ាលី នៅថ្ងៃអាទិត្យកន្លងមក នៅមិនទាន់ផ្តល់លទ្ធផលជាផ្លូវការនៅឡើយទេ។ លទ្ធផលនឹងប្រកាសអោយដឹង នៅថ្ងៃសុក្រទី២សីហា យ៉ាងយូរ។ ប៉ុន្តែ យោងតាមលទ្ធផលមិនផ្លូវការផ្តល់ដោយសារព័ត៌មានឯកជននានា បេក្ខជន អ៊ីប្រាហ៊ីម ប៊ូបាកា កីតា អតីតនាយករដ្ឋមន្ត្រីម៉ាលី ប្រហែលជាអាចឈ្នះដោយសម្លេងភាគច្រើនដាច់ខាត នៅជុំទីមួយនេះ។ ទោះយ៉ាងនេះក្តី បេក្ខជន ស៊ូម៉ៃឡា ស៊ីសសេ ដែលជាបេក្ខជនមានប្រជាប្រិយភាពដែរនោះ ក៏បានប្រកាសថា លោកជាអ្នកឈ្នះក្នុងជុំទីមួយផងដែរ ហើយបន្ថែមថា នឹងមានការបោះឆ្នោតនៅជុំទីពីរទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
បើគ្មានបេក្ខជនណាទទួលសម្លេងភាគច្រើនដាច់ខាតនោះទេ ការបោះឆ្នោតជុំទីពីរនឹងប្រព្រឹត្តទៅ នៅថ្ងៃ១១សីហា។ យោងតាមព័ត៌មានមិនផ្លូវការផ្តល់ដោយសារព័ត៌មានឯកជនផ្សេងៗ អតីតនាយករដ្ឋមន្ត្រី អ៊ីប្រាហ៊ីម ប៊ូបាកា កីតា អាចទទួលជោគជ័យក្នុងការបោះឆ្នោតជុំទីមួយ ជាមួយសម្លេងភាគច្រើនដាច់ខាត។ លោកកីតាផ្ទាល់ ក៏បានប្រាប់ដែរថា យោងតាមព័ត៌មានពីក្រុមលោក គឺលោកជាអ្នកឈ្នះ ហើយប្រហែលជាគ្មានការបោះឆ្នោតនៅជុំទីពីរនោះទេ។
ដោយឡែក គូប្រជែងរបស់លោក កីតា គឺបេក្ខជន ស៊ូម៉ៃឡា ស៊ីសសេ អតីតរដ្ឋមន្ត្រីក្រសួងហិរញ្ញវត្ថុ និងជាអតីតប្រធានសហភាពសេដ្ឋកិច្ចនិងរូបិយវត្ថុអាហ្វ្រិកខាងលិច បានបដិសេធព័ត៌មានផ្តល់ដោយសារព័ត៌មានឯកជន ដោយលើកឡើងថា នឹងមានការបោះឆ្នោតនៅជុំទីពីរ។ កាលពីថ្ងៃចន្ទម្សិលមិញ បេក្ខជនបីរូបទៀតដែលស្ថិតក្នុងរណសិរ្សប្រឆាំងនឹងការបះបោរក្រុមនយោបាយប្រដាប់អាវុធ គឺរណសិរ្សតែមួយជាមួយលោកស៊ីសសេដែរនោះ ក៏បានលើកឡើងថា ការបោះឆ្នោតជុំទីពីរគឺចៀសមិនរួចនោះទេ។ ពួកគេបន្ថែមថា ការិយាល័យបោះឆ្នោតបិទទ្វារមិនដល់ពីរម៉ោងផង សារព័ត៌មាននានាប្រញាប់បង្ហាញលទ្ធផលយ៉ាងតក់ក្រហល់ ហើយមិនដឹងថាតើលទ្ធផលនោះបានពីណាទៀតសោត។ បេក្ខជន ស៊ូម៉ៃឡា ស៊ីសសេ សង្ស័យថា ការបោះឆ្នោតនៅថ្ងៃអាទិត្យមានភាពមិនប្រក្រតី។
ទោះយ៉ាងនេះក្តី កាលពីថ្ងៃអាទិត្យកន្លងមក ប្រជាជនម៉ាលីប្រហែល៦លាន៩សែននាក់ បាននាំគ្នាទៅបោះឆ្នោតរើសប្រធានាធិបតី។ តួលេខនេះត្រូវនឹង៥០ភាគរយ គឺមានលើសលុប គឺលើសពីការបោះឆ្នោតកន្លងមក ដែលមានមិនលើសពី៣៨ភាគរយផង។
ជាងនេះទៀត ការបោះឆ្នោតបានប្រព្រឹត្តទៅក្នុងភាពស្ងប់ស្ងាត់ គ្មានការប៉ះទង្គិច រឺហិង្សាកើតឡើងឡើយ។ ប្រទេសបារាំងដែលបានធ្វើអន្តរាគមន៍ដោយជោគជ័យ រំដោះប្រទេសម៉ាលី អោយផុតពីក្រុមឧទ្ទាមនោះ បានសំដែងការអបអរចំពោះដំណើរការបោះឆ្នោតនេះ។ សហរដ្ឋអាមេរិកវិញបានជំរុញអោយគ្រប់បេក្ខជននយោបាយទាំងអស់ទទួលស្គាល់លទ្ធផលបោះឆ្នោតផ្លូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ