ក្លឹបអ្នកកាសែតកម្ពុជា បើកវេទិកាតុមូលប្រមូលមតិអ្នកកាសែត ចំពោះការបង្កើតច្បាប់ស្ដីពីសិទ្ធិទទួលបានព័ត៌មាន
អ្នកកាសែតខ្មែរជាង៥០នាក់ មកពីស្ថាប័នសារព័ត៌មានជាច្រើន បានជួបប្រជុំគ្នានៅព្រឹកថ្ងៃចន្ទ ទី៣០ធ្នូនេះ នៅក្នុងវេទិកាតុមូល ស្ដីពីអនុសាសន៍អ្នកសារព័ត៌មាន ចំពោះការបង្កើតច្បាប់ស្ដីពីសិទ្ធិទទួលបានព័ត៌មាន។ នៅក្នុងការជជែកពិភាក្សាពេញមួយព្រឹកនេះ អ្នកកាសែតបានលើកឡើងពីបទពិសោធ ការប្រឈម និងជាពិសេស អនុសាសន៍ដែលនឹងត្រូវយកទៅពិភាក្សានៅក្នុងវេទិកានិពន្ធនាយក នៅពេលរសៀលនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
វេទិកាតុមូលដើម្បីប្រមូលអនុសាសន៍របស់អ្នកកាសែត ចំពោះការបង្កើតច្បាប់ទទួលបានព័ត៌មាន ត្រូវបានបើកធ្វើនៅព្រឹកថ្ងៃចន្ទ ទី៣០ធ្នូនេះ នៅឯសណ្ឋាគារ កាំបូឌីយ៉ាណា។ ជាវេទិកា ដែលរៀបចំដោយក្លឹបអ្នកកាសែតកម្ពុជា ក្នុងបំណងធ្វើយ៉ាងណា ឲ្យច្បាប់ស្ដីពីសិទ្ធិទទួលព័ត៌មាន ឆ្លើយតបនឹងសេចក្តីត្រូវការរបស់អ្នកកាសែត នៅក្នុងការបំពេញការងារប្រកបដោយប្រសិទ្ធភាព។
ក្នុងវេទិកាជជែកពិភាក្សាពេញមួយព្រឹក វាគ្មិនជានិពន្ធនាយកមកពីស្ថាប័នសារព័ត៌មានផ្សេងៗ បានលើកឡើងពីការអនុវត្តច្បាប់ស្ដីពីសិទ្ធិទទួលបានព័ត៌មាននៅប្រទេសនានា ដូចជា បារាំង ជប៉ុន និងអាមេរិក ជាដើម។ ជាការលើកឡើង ដើម្បីជាទុនដល់អ្នកកាសែតនានា ស្វែងយល់ មុននឹងឈានទៅពិភាក្សាអំពីសិទ្ធិទទួលបានព័ត៌មាននៅកម្ពុជា។
ជាលទ្ធផល អ្នកកាសែត បានលើកជាអនុសាសន៍ថា ក្រសួងព័ត៌មាន ដែលទទួលបន្ទុកតាក់តែងសេចក្ដីព្រាងច្បាប់ស្ដីពីសិទ្ធិទទួលបានព័ត៌មាន គួរតែរៀបចំជាសិក្ខាសាលាថ្នាក់ជាតិជាសាធារណៈ ដើម្បីប្រមូលមតិយោបល់ផ្សេងៗ ទាំងមុន និងក្រោយការបង្កើតសេចក្ដីព្រាងច្បាប់។ ហើយសេចក្ដីព្រាងច្បាប់នោះទៀតសោត គួរតែត្រូវបានតាក់តែងដោយអ្នកជំនាញច្បាប់ ដែលមានបទពិសោធនៅក្នុងវិស័យសង្គម និងព័ត៌មាន។
ដោយចំពោះច្បាប់ស្ដីពីសិទ្ធិទទួលបានព័ត៌មាន អ្នកកាសែតបានជំរុញឲ្យមានបទបញ្ញត្តិ ចាប់បង្ខំឲ្យក្រសួងស្ថាប័នរដ្ឋនីមួយៗ រៀបចំឲ្យមានអ្នកនាំពាក្យ។ ហើយអ្នកនាំពាក្យនោះទៀតសោត ត្រូវតែជាបុគ្គលដែលយល់ដឹងពីកិច្ចការរបស់ក្រសួង។ ក្នុងករណីដែលអ្នកនាំពាក្យនោះ មិនផ្ដល់ព័ត៌មានដែលអ្នកកាសែតគួរតែដឹង ច្បាប់ត្រូវតែដាក់ពិន័យឲ្យបានធ្ងន់ធ្ងរ។
នៅមានអនុសាសន៍ជាច្រើនផ្សេងទៀត ដែលត្រូវបានអ្នកកាសែតលើកឡើងផងដែរ ក្នុងនោះរួមមាន ការកំណត់និយមន័យពាក្យដែលប្រើប្រាស់ឲ្យបានច្បាស់លាស់ ការរើសអើងស្ថាប័នព័ត៌មាន ការបង្កើតគណៈកម្មការឯករាជ្យត្រួតពិនិត្យការអនុវត្តច្បាប់ស្ដីពីសិទ្ធិទទួលបានព័ត៌មាន និងការធ្វើបច្ចុប្បន្នភាពព័ត៌មានដោយសង្ខេបរវាងរាជរដ្ឋាភិបាល និងអ្នកកាសែតជាដើម។
បទពិសោធ ការប្រឈម និងជាពិសេស អនុសាសន៍ទាំងអស់ដែលត្រូវបានលើកឡើង ត្រូវយកទៅពិភាក្សានៅក្នុងវេទិកានិពន្ធនាយក នៅពេលរសៀល មុននឹងដាក់ជូនទៅក្រសួងព័ត៌មាន ដែលជាស្ថាប័នទទួលបន្ទុកតាក់តែងសេចក្ដីព្រាងច្បាប់ស្ដីសិទ្ធិទទួលបានព័ត៌មាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ