ជំនួបជាប្រវត្តិសាស្ត្រនៅ បុរីវ៉ាទីកង់ រវាង ប្រមុខដឹកនាំប៉ាឡេស្ទីន និង អ៊ីស្រាអែល
សម្តេចសង្ឃកាតូលិក ហ្រ្វង់ស័រ បាន បំពេញនូវអាកប្បកិរិយាជាប្រវត្តិសាស្រ្តមួយ ដោយបានកោះអញ្ជើញប្រធានរដ្ឋអំណាចប៉ាឡេស្ទីន លោក ម៉ាហមូដ អាបាស និងលោកប្រធានាធិបតីអ៊ីស្រាអែល លោក ស៊ីម៉ុន ប៉េរ៉េស៍ ឲ្យមកជួបជុំគ្នានៅបុរីវ៉ាទីកង់ កាលពីថ្ងៃអាទិត្យ ដើម្បីធ្វើការបន់ស្រន់ បួងសួងសុំសន្តិភាព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
បន្ថែមពីលើប្រជាប្រិយភាពដែលកាន់តែកើនឡើងរបស់ព្រះអង្គ សម្តេចប៉ាប ហ្រ្វង់ស័រ បានបង្កើនការភ្ញាក់ផ្អើល និងក្តីកោតសរសើរយ៉ាងខ្លាំងពីសាធារណមតិទូទៅ ចំពោះទង្វើដែលព្រះអង្គធ្វើនាពេលនេះ។ ដោយយល់យ៉ាងច្បាស់អំពីស្ថានភាពវិបត្តិរវាង អ៊ីស្រាអែល និង ប៉ាឡេស្ទីន ព្រះអង្គគ្មានគោលបំណងណាមួយ មកធ្វើជាអាជ្ញាកណ្តាលឲ្យភាគីទាំងពីរនោះទេ។ បុរីវ៉ាទីកង់ បានអះអាងថា ពិធីនេះ គ្រាន់តែជាពិធីបន់ស្រន់ដើម្បីសុំសន្តិភាព មិនមែនជាពិធីបួងសួងរវាងសាសនាទាំងបីនោះទេ។ មន្ត្រីសង្ឃកាតូលិកមួយអង្គបាននិយាយថា នេះមិនមែនជាការបន់ស្រន់រួមគ្នានោះទេ តែគ្រប់គ្នាគ្រាន់តែមកជួបជុំគ្នានៅកន្លែងតែមួយ ដើម្បីធ្វើការបួងសួង។
ប្រមុខដឹកនាំទាំងពីរប្រទេសនឹង ត្រូវបានទទួលជួបដោយសម្តេចប៉ាប ជាលក្ខណៈឯកជនរៀងៗខ្លួនជាមុនសិន មុននឹងឈានទៅដល់កម្មវិធីបន់ស្រន់។ បើតាមការគ្រោងទុក តំណាងថ្នាក់ដឹកនាំ និងសាសនាទាំងបី ត្រូវធ្វើការបន់ស្រន់ម្នាក់ម្តង ពោលគឺដំបូង សាសនាជ្វីហ្វ បន្ទាប់មកសាសនាកាតូលិក និងចុងក្រោយបង្អស់គឺសាសនាអ៊ីស្លាម។ តាមការផ្តល់ពត៌មាន កម្មវិធីនេះ ត្រូវបានរៀបចំឡើង ដោយប្រយ័ត្តប្រយែងបំផុត ដើម្បីធានានូវអព្យាក្រិត្យភាព រវាងគ្រប់ភាគីចូលរួមទាំងអស់។ ទាំងទីកន្លែង ទាំងរបៀបវារៈនៃកម្មវិធីត្រូវបានគេ ជ្រើសរើសយ៉ាងម៉ត់ចត់បំផុត ចៀសវាងការប៉ះទង្គិចដោយប្រការណាមួយទៅលើសាសនារបស់ភាគីចូលរួមម្នាក់ៗ។
នេះជាលើកទីមួយហើយដែលថ្នាក់ដឹកនាំអ៊ីស្រាអែល និង ប៉ាឡេស្ទីន បានមកជួបគ្នាលើទឹកដីបុរីវ៉ាទីកង់។ គួររំលឹកផងដែរថា កាលពីឆ្នាំ២០០០ ក៏មានពិធីប្រហាក់ប្រហែលគ្នានេះមួយដែរ ប៉ុន្តែកាលនោះ ក្រុមសាសនាអ៊ីស្លាម និង ជ្វីហ្វធ្វើការបន់ស្រន់នៅកន្លែងពីរផ្សេងគ្នា។ នៅក្នុងទំព័រ Tweeter របស់ព្រះអង្គ សម្តេចប៉ាបបានសរសេរថា៖ ការបន់ស្រន់មានឥទ្ធិពលលើគ្រប់អ្វីៗទាំងអស់ ដូច្នេះ យើងគួរតែយកការបន់ស្រន់នេះ បួងសួងសូមឲ្យមានសន្តិភាពនៅគ្រប់តំបន់ទាំងអស់ ក្នុងពិភពលោកទាំងមូល។
តំបន់មជ្ឈិមបូព៌ាបានត្រូវយាយីដោយសង្គ្រាមប្រកាន់សាសនាជាយួរណាស់មកហើយ។ កន្លងមកការដោះស្រាយតាមនយោបាយការទូតមិនដែលទទួលបានផលវិជ្ជមានជាប់លាប់នោះទេ។ ទោះជាយ៉ាងណា គ្មាននរណាម្នាក់ជឿថា សន្តិភាពពិតប្រាកដនឹងមានភ្លាមនៅថ្ងៃស្អៃកនៅតំបន់មជ្ឈិមបូព៌ានោះទេ ប៉ុន្តែការបន់ស្រន់សុំសន្តិភាពនេះ ជានិមិត្តរូបមួយ ដើម្បីឲ្យភាគីទាំងអស់ សម្តែងនូវសមាណចិត្តរបស់ខ្លួន ដែលប្រាថ្នាចង់បានសុខសន្តិភាពតាមបែបជំនឿសាសនារៀងៗខ្លួន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ