នាយករដ្ឋមន្ត្រី៖ ទំនប់វារីអគ្គិសនី អារ៉ែង មិនមានទេ ពីពេលនេះ ដល់ឆ្នាំ២០១៨
លោកនាយករដ្ឋមន្ត្រី ហ៊ុនសែន បានប្រកាសជាថ្មីនៅព្រឹកថ្ងៃ២៤កុម្ភៈថា រហូតដល់ពេលនេះ មិនទាន់មានសេចក្តីសំរេចណាមួយទេ លើគម្រោងសាងសង់ទំនប់វារីអគ្គិសនី តំបន់អារ៉ែង ក្នុងខេត្តកោះកុង គឺត្រូវសិក្សាឲ្យបានច្បាស់លាស់ជាមុនសិន។ ប៉ុន្តែ ទោះជាការសិក្សាច្បាស់ ឬមិនច្បាស់លាស់ក៏ដោយ តាមលោកនាយករដ្ឋមន្ត្រី ពីពេលនេះ ដល់ឆ្នាំ២០១៨ រដ្ឋាភិបាលមិនអនុញ្ញាតឲ្យសាងសង់ទំនប់វារីអគ្គិសនី អារ៉ែង ឡើយ។ រីឯក្រុមយុវជន បានប្រកាសបន្តសកម្មភាពការពារបរិស្ថាន និងព្រៃឈើ នៅតំបន់អារ៉ែង ទោះបីជាពេលនេះ មិនមានវត្តមាន អាឡិច។
ចុះផ្សាយនៅថ្ងៃ៖
ស្តាប់ - ០២:៣០
ជាសេចក្តីប្រកាស ក្នុងទិវាជាតិទីក្រុងស្អាត នាព្រឹកថ្ងៃទី២៤កុម្ភៈ ដោយលោកនាយករដ្ឋមន្ត្រី ហ៊ុនសែន បានគូសបញ្ជាក់ជាថ្មីថា គម្រោងសាងសង់ទំបន់វារីអគ្គិសនី អារ៉ែង ក្នុងខេត្តកោះកុង រហូតដល់ពេលនេះ មិនទាន់មានសេចក្តីសម្រេចណាមួយទេ គឺត្រូវសិក្សាជាមុនសិន។ ក្នុងនោះ លោកនាយករដ្ឋមន្ត្រី ក៏បានបញ្ជាក់ថា ទោះជាការសិក្សាច្បាស់ ឬមិនច្បាស់លាស់ក៏ដោយ តែចាប់ពីពេលនេះ ដល់ឆ្នាំ២០១៨ ក្នុងអាណត្តិទី៥នេះ រដ្ឋាភិបាលមិនអនុញ្ញាតឲ្យសាងសង់ទំនប់វារីអគ្គិសនី អារ៉ែង ឡើយ។
លោកនាយករដ្ឋមន្ត្រី ចង់ទុកឲ្យក្មេងជំនាន់ក្រោយ ជាអ្នកសម្រេចលើគម្រោងវារីអគ្គិសនីនោះ ដូចករណី ទីតាញ៉ូម នៅជីផាត ក្នុងខេត្តកោះកុង ដែលលោកអះអាងថា មានតម្លៃជាង ២០ពាន់លានដុល្លារ ប៉ុន្តែយកទីតាញ៉ូមនោះ ត្រូវកាប់ព្រៃឈើជាង ២ ម៉ឺនហិកតា។
លោកនាយករដ្ឋមន្ត្រី ហ៊ុន សែន បានបញ្ជាក់ថា “ហើយខ្ញុំសូមបញ្ជាក់ កុំនិយាយពីអារ៉ែងតទទៀត។ សិក្សាមើល ឲ្យវាច្បាស់មើល! ហើយខ្ញុំមានគោលគំនិតថា ទោះបីជាសិក្សាច្បាស់ ឬមិនច្បាស់យ៉ាងណាក៏ដោយ ពីនេះដល់ឆ្នាំ២០១៨ អត់មានទេ។ អត់មានឲ្យធើទេ។ ខ្ញុំគ្រាន់តែបញ្ជាក់ថា យើងបានគិតគូ ថ្លឹងថ្លែងរវាងផលប្រយោជន៍ខាងសេដ្ឋកិច្ច ជាមួយនឹងបញ្ហាបរិស្ថាន។
លោកនាយករដ្ឋមន្ត្រី ក៏បានរិះគន់មិនចេញឈ្មោះ តែសំដៅលើអាឡិច ក្នុងសកម្មភាពរបស់ជនជាតិអេស្ប៉ាញរូបនេះ ដែលការពារតំបន់អារ៉ែងកន្លងមក និងបានរារាំងមន្ត្រីអាជ្ញាធរ និងក្រុមហ៊ុនចិន មិនឲ្យចុះទៅសិក្សាស្រាវជ្រាវពីផលប៉ះពាល់នៅតំបន់អារ៉ែង។ លោកនាយករដ្ឋមន្ត្រី គូសបញ្ជាក់ថា គ្មានបរទេសណា ស្រលាញ់ខ្មែរ ជាងខ្មែរនោះទេ។ នៅពេលនេះ នៅពេលអាឡិច ចាកចេញពីកម្ពុជា គឺលោកហ៊ុនសែន ប្រកាសថា អារ៉ែង ត្រូវបានប្រជាជនកម្ពុជា ស្រលាញ់មួយប្រទេសឯណោះ។
នៅព្រឹកថ្ងៃទី២៤កុម្ភៈ ក្រុមយុវជន ក្នុងនាមបណ្តាញអង្គការចលនាមាតាធម្មជាតិ បានជួបប្រជុំ នៅរាជធានីភ្នំពេញ ហើយបានប្រកាសថា ពួកគេនៅតែបន្តសកម្មភាពក្នុងបេសកកម្មការពារតំបន់អារ៉ែង ក្នុងខេត្តកោះកុង បើទោះបីជាពេលនេះ មិនមានវត្តមានរបស់លោក អាឡិច ជនជាតិអេស្ប៉ាញ ក៏ដោយ។ ការប្រកាសនេះ បានធ្វើឡើង ខណៈដែលនៅអារ៉ែង មានតំណាងក្រុមហ៊ុនចិន ស៊ីនណូ ហាយដ្រូ ធ្វើដំណើរទៅកាន់ទីនោះ ដើម្បីសិក្សាស្រាវជ្រាវពីផលប៉ះពាល់។
យុវជន ម៉េង ហេង អ្នកសម្របសម្រួលបណ្តាញអង្គការចលនាមាតាធម្មជាតិ អះអាងថា ក្រុមយុវជន មិនហាមឃាត់ ឬជំទាស់ទៅនឹងគម្រោងសិក្សាស្រាវជ្រាវរបស់រដ្ឋាភិបាល និងក្រុមហ៊ុនចិននោះទេ តែការសិក្សាស្រាវជ្រាវនៅតំបន់អារ៉ែង ត្រូវមានតម្លាភាព ហើយផ្សព្វផ្សាយពីលទ្ធផល ដោយសហការជាមួយសហគមន៍នៅទីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ