លោកពូទីន និងលោក ប៉ូរ៉ូឆេនកូជួបគ្នាជាថ្មី បន្ទាប់ពីជំនួបនៅក្រុងមិនស្ក៏ កាលពី២ខែមុន
ចុះផ្សាយនៅថ្ងៃ៖
ស្តាប់ - ០៤:៥៦
សាច់រឿងនៃជំនួបលើកនេះ ដែលប្រព្រឹត្តទៅ នៅក្រៅបរិវេណ នៃជំនួបកំពូល អាស៊ី-អឺរ៉ុប ASEM លើកទី១០ នៅក្រុងមីឡង់ ប្រទេសអ៊ីតាលី តាមបំណងធំបំផុតរបស់ លោកប៉ូរ៉ូឆេនកូ ដែលថ្លែង ព្រឹកថ្ងៃសុក្រទី ១៧ តុលា ទៅពួកអ្នកកាសែត គឺថា ជាលទ្ធផលនៃកិច្ចព្រមព្រៀង ចុះនៅក្រុងមិនស្ក៏ កាលពីថ្ងៃទី ៥កញ្ញា ស្តីអំពីបទឈប់បាញ់ គឺចង់ឲ្យមាន” សន្តិភាព និងស្ថិរភាព” នៅអ៊ុយក្រែន។ រីឯ ប្រធានបទ ទី២ ដែល សហភាពអឺរ៉ុប ក៏រង់ចាំចង់ឃើញលទ្ធផល នោះគឺ បញ្ហាបង្ហូរឧស្ម័ន រុស្ស៊ី កាត់តាមដែនដីអ៊ុយក្រែន កុំឲ្យអាក់ខានសោះឡើយ ទៅផ្គត់ផ្គង់ដល់តម្រូវការ របស់អឺរ៉ុប ជាពិសេស នៅរដូវធ្លាក់ទឹកកកខាងមុខ ដែលតាមព្យាករណ៍ឧតុនិយម គឺនឹងត្រជាក់ខ្លាំងខុសពីធម្មតា។ បញ្ហានេះ ចោទឡើង ដោយមកពីអ៊ុយក្រែន ដែលគ្មានលុយទិញឧស្ម័នរុស្ស៊ី ហើយ ដើម្បីបំពេញដល់តម្រូវការខ្លួន គឺអាចលួច បូមយកឧស្ម័នរុស្ស៊ី ចេញពីបំពង់ដែលលូនកាត់ តាម ដែនដីអុយក្រែន ទុកសម្រាប់អឺរ៉ុបសោះ។ ដូច្នេះ អាចធ្វើឲ្យអឺរ៉ុបខ្វះឧស្ម័នសម្រាប់ប្រើជា កំដៅ ឲ្យបានគ្រប់គ្រាន់ នឹងសេចក្តីត្រូវការរបស់ខ្លួន។ ក្នុងន័យនេះ លោកប្រធានាធិបតីរុស្ស៊ី ពូទីន ម្សិលមិញ ពេលគាត់ធ្វើទស្សនកិច្ច នៅក្រុងបែលក្រាដ បានព្រមានទៅហើយថា រុស្ស៊ីនឹងកាត់ បន្ថយការបង្ហូរឧស្ម័ននេះ ក្នុងបរិមាណស្មើនឹង បរិមាណដែលអាចលួចបូមយកជាយថាហេតុ ដោយអ៊ុយក្រែន។ ករណីលួចបូមយកបែបនេះ ធ្លាប់កើតមានរួចហើយ កាលពីដើមឆ្នាំ២០០៩ ពេលដែលអ៊ុយក្រែនត្រូវជំនះលើអាកាសធាតុត្រជាក់ខ្លាំង។