នុយក្លេអ៊ែរអ៊ីរ៉ង់៖អាមេរិកចង់សម្រេចឲ្យបានកិច្ចព្រមព្រៀងស្ថាពរមួយដូចកាលកំណត់
សំណុំរឿងនុយក្លេអ៊ែររបស់ប្រទេសអ៊ីរ៉ង់ត្រូវបានអាមេរិក អ៊ីរ៉ង់ និងសហភាពអឺរ៉ុបលើកយកទៅជជែកជាថ្មី នៅក្នុងទីក្រុងវីយែន ប្រទេសអូទ្រីស នាថ្ងៃពុធ ទី១៥ តុលា។ កិច្ចប្រជុំដែលចូលរួមដោយលោកប្រមុខការទូតអាមេរិកចន ឃ៊ែរី លោកប្រមុខការទូតអ៊ីរ៉ង់ម៉ូហាម៉ាត ហ្សាវ៉ា ហ្សារីស និងលោកស្រីប្រមុខការទូតអឺរ៉ុបកាទ្រីន អាស្តុន។ កិច្ចប្រជុំនេះត្រូវបានផ្តួចផ្តើមឡើងដោយភាគីអាមេរិក និងក្នុងគោលដៅស្វែងរកឲ្យបាននូវកិច្ចព្រមព្រៀងស្ថានពរមួយដូចកាលកំណត់ ពោលមុនថ្ងៃទី២៤ វិច្ឆិកា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
តាមកាលវិភាគដែលបានគ្រោងទុក ចាប់ពីថ្ងៃនេះទៅដល់ថ្ងៃទី ២៤ វិច្ឆិកាខាងមុខ ក្រុមប្រទេស ៥បូក១ និងប្រទេសអ៊ីរ៉ង់ត្រូវរកឲ្យបាននូវកិច្ចព្រមព្រៀងចុងក្រោយមួយស្តីពីសំណុំរឿងនុយក្លេអ៊ែរអ៊ីរ៉ង់។ ជាកិច្ចព្រមព្រៀងប្រវត្តិសាស្រ្តមួយដែលធានាពីកម្មវិធីនុយក្លេអ៊ែរស៊ីវិលរបស់អ៊ីរ៉ង់ និងដែលបញ្ជាក់ថា អ៊ីរ៉ង់ពិតជាយកនុយក្លេអ៊ែរទៅប្រើនៅក្នុងវិស័យស៊ីវិលមែន។ តាមរយៈកិច្ចព្រមព្រៀងប្រវត្តិសាស្រ្តនេះ សហគមន៍អន្តរជាតិនឹងត្រូវលើកទណ្ឌកម្មសេដ្ឋកិច្ចទំាងអស់ចេញពីប្រទេសអ៊ីរ៉ង់។ ទន្ទឹមគ្នានេះ កិច្ចព្រមព្រៀងចុងក្រោយមួយនេះក៏នឹងបិទបញ្ចប់ទំាងស្រុងនូវភាពចម្រូងចម្រាសគ្នារវាងសហគមន៍អន្តរជាតិ និងអ៊ីរ៉ង់ជុំវិញបញ្ហានុយក្លេអ៊ែរដែលបានបំពុលតំាងពី ១២ឆ្នំាមកហើយដែរ។
តែនាពេលថ្មីៗនេះ ថ្នាក់ដឹកនំាជាន់ខ្ពស់អ៊ីរ៉ង់បានទាមទារឲ្យមានការពន្យារពេលបន្ថែមទៀតដើម្បីឲ្យភាគីពាក់ព័ន្ធនីមួយៗអាចបន្តជជែកគ្នាក្នុងគោលដៅកាត់បន្ថយចំណុចខ្វែងគំនិតគ្នាដែលនៅសេសសល់។ តែថ្នាក់ដឹកនំាជាន់ខ្ពស់អាមេរិកម្នាក់បានថ្លែងថា អ្វីដែលគ្រប់គ្នាចង់បាននៅពេលនេះមិនមែនកិច្ចព្រមព្រៀងសុំពន្យារពេលទេ តែកិច្ចព្រមព្រៀងផ្តាច់ព្រ័តមួយស្តីពីរឿងនុយក្លេអ៊ែរអ៊ីរ៉ង់ឲ្យបានមុនថ្ងៃទី២៤ វិច្ឆិកា។ ប្រភពអាមេរិកំាងដដែលបានបញ្ជាក់ថា ភាពមិនចុះសម្រុងគ្នាត្រូវបានកាត់បន្ថយយ៉ាងច្រើន។ ក្រុមអ្នកឯកទេសបានលើកឡើងថា បើនិយាយជាលក្ខណៈបច្ចេកទេស គឺគ្មានអ្វីចោទទៀតទេ តែចំណោតខ្លំាងលើការសម្រេចចិត្តនយោបាយ។
យ៉ាងណាក៏ដោយ លោកប្រមុខការទូតអាមេរិកចន ឃ៊ែរីបានបញ្ជាក់មុននឹងលោកចាកចេញពីទីក្រុងប៉ារីស ប្រទេសបារំាងថា កិច្ចព្រមព្រៀងស្ថាពរមួយនឹងរកឃើញដូចកាលកំណត់ និងបដិសេធមិននិយាយពីការពន្យារពេលទេ។ តែលោកប្រមុខការទូតអ៊ីរ៉ង់បានទទួលស្គាល់ថា កិច្ចចរចាត្រូវការពេលវេលាច្រើនដើម្បីអាចសម្រេចបាននូវកិច្ចព្រមព្រៀងមួយដែលទទួលយកបានទំាងអស់គ្នា។ ចំណែកលោកប្រមុខការទូតរស្ស៊ីវិញបានអះអាងថា គេគួរតែឈប់និយាយពីថ្ងៃទី២៤ វិច្ឆិកា ព្រោះវាមិនមែនជាថ្ងៃសក្ការៈនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ