កីឡាអូឡាំពិករដូវត្រជាក់នៅ Sochi ប្រទេសរុស្ស៊ី ៖ ល្បែងភ្នាល់ របស់លោក ពូទីន
ចុះផ្សាយនៅថ្ងៃ៖
ស្តាប់ - ០៤:៣៣
នៅថ្ងៃសុក្រទី ៧ កុម្ភៈរហូតដល់ថ្ងៃទី ២៣កុម្ភៈ មានប្រព្រឹត្តទៅការប្រកួតកីឡាអូពិករដូវត្រជាក់នៅក្រុងSochi ប្រទេសរុស្ស៊ី។ លោកប្រធានាធិបតីរុស្ស៊ី ពូទីន បានយកការប្រកួតកីឡានេះ មកធ្វើជាតំណាងដ៏សំខាន់នៃការវិលត្រលប់របស់រុស្ស៊ី នៅលើឆាកអន្តរជាតិ និងប្រតិបត្តិការដ៏ឧត្តុង្គឧត្តមសម្រាប់រូបភាពបុគ្គលផ្ទាល់ ប៉ុន្តែនេះជាល្បែងភ្នាល់ដ៏គ្រោះថា្នក់មួយសម្រាប់លោកប្រធានាធិបតីរុស្ស៊ី។
លោក វ្លាដេមៀ ពូទីន កាន់អំណាចនៅរុស្ស៊ីតាំងពី ១៤ឆ្នាំមក បានប្រើគ្រប់មធ្យោបាយ គ្រប់ឥទ្ធិពលនិងប្រាជ្ញាស្មារតី កាលពីឆ្នាំ២០០៧ ដើម្បីបានក្លាយជាម្ចាស់ផ្ទះរៀបចំកម្មវិធីកីឡាអូឡាំពិកនេះ។ កីឡាដែលនឹងត្រូវចាប់បើកកម្មវិធីនៅថ្ងៃសុក្រទី ៧កុម្ភៈ នៅទីក្រុងSochi ក្រុងមាត់សមុទ្ទខ្មៅនិងនៅតំបន់ភ្នំ Caucase ជាព្រឹត្តិការណ៍អន្តរជាតិដ៏ធំ របស់រុស្ស៊ី គិតចាប់តាំងពីរបបសភាពសូវៀតរលំរលាយនៅឆ្នាំ១៩៩១។
គឺរូបលោកប្រធានាធិបតីផ្ទាល់តែម្តង ជាអ្នកជ្រើសរើសភាពយន្ត មកចាក់ផ្សាយក្នុងឱកាសបើកកម្មវិធី។ បុរសខ្លាំងរុស្ស៊ីម្នាក់នេះ បានថែមទាំងសន្យាថា នឹងធ្វើឱ្យពិភពលោកឱ្យភ្ញាក់ផ្អើលកោតសរសើរអំពីសមត្ថភាព និងលទ្ធភាពរបស់រុស្ស៊ី ក្នុងការរៀបចំពិធីបុណ្យកីឡាថា្នក់ពិភពលោក ដោយបានស្ថាបនាសាងសង់ហេដ្ឋារចនាសម្ព័ន្ធ និងដោយត្រូវទទួលភ្ញៀវមកគ្រប់ជ្រុងនៃភពផែនដី។
លោកពូទីន បានយកព្រឹត្តិការណ៍កីឡានេះមកធ្វើជាអាទិភាពយុទ្ធសាស្ត្រមួយ ព្រោះបន្ទាប់ពីកីឡាអូឡាំពិករដូវត្រជាក់ហើយ ក្រុងSochiដដែលនេះនឹងត្រូវទទួលរៀបចំការប្រកួតកីឡាប្រណាំងឡានFormular Oneទៀតនៅចុងឆ្នាំ និងការប្រកួតកីឡាបាល់ទាត់ពិភពលោកនៅឆ្នាំ២០១៨។
ទទួលរៀបចំកីឡាអូឡាំពិកនៅរុស្ស៊ីនេះ ក៏ត្រូវបានអ្នកវិភាគនយោបាយស្និទ្ធនឹងក្រុងក្រេមឡាំងយល់ថាជា គម្រោងបុគ្គលដែលលោកពូទីន ចង់ចារឈ្មោះឱ្យជាប់ក្នុងប្រវត្តិសាស្ត្ររុស្ស៊ី និងមានសរសេរពីលោកក្នុងទំព័រប្រវត្តិសាស្ត្រ។
កាលពីឆ្នាំ២០០៧ ប្រជាប្រិយភាពលោកពូទីន បានឡើងខ្ពស់ដល់ជិត ៨០% កំណើនសេដ្ឋកិច្ចក៏ស្ទុះលឿនថ្លេវ ក្នុងកំរិត ៧-៨% ហើយគណបក្សប្រឆាំងក្នុងប្រទេសរុស្ស៊ីក៏គ្មាន។ ប៉ុន្តែពេលនេះ ស្ថានការណ៍ប្តូរផ្លាស់ ...
ថ្ងៃនេះ គេពិបាកជឿណាស់ថារុស្ស៊ីកំពុងដើរក្នុងផ្លូវល្អនោះ ?! ជាមួយនឹងកំណើនសេដ្ឋកិច្ចអូសជើង កើនតែប្រមាណ១% តម្លៃរូបិយបណ្ណ ដាំក្បាលចុះបើប្រៀបនឹងប្រាក់ដុល្លារឬប្រាក់អឺរ៉ូ បង្ក្រាបឥតស្វាងចលនាប្រឆាំង អង្គការក្រៅរដ្ឋាភិបាលបរិហារឥតឈប់ការរំលោភសិទ្ធិមនុស្ស។
កម្មវិធីកីឡាកាន់ខិតមកដល់ លោកពូទីនកាន់តែរន្ថាន់ ! ការរិះគន់មានកាន់តែច្រើនឡើងៗ លើចំណាយដ៏មហិមាមិនធ្លាប់មានក្នុងប្រវត្តិកីឡាអូឡាំពិក និងអំពើរលួយពុកក្នុងការចាត់ចែងប្រើប្រាស់កញ្ចប់ថវិកា ប្រមាណ៥០ពាន់លានដុល្លារ ដើម្បីកែប្រែតំបន់ព្រៃភ្នំកូកាស គ្មានការអភិវឌ្ឍន៍ ចម្ងាយប្រមាណតែពីរបីរយគីឡូម៉ែត្រពីសាធារណរដ្ឋកូកាសអស្ថិរភាព ទៅជាតំបន់កីឡាកំរិតពិភពលោក។
ទោះបីជាមានវិធានការសុវត្ថិភាពយ៉ាងសម្បើមក្រៃ ក៏ការគំរាមកំហែងភេរវកម្មពីសំណាក់ពួកអ៊ីស្លាមជ្រុលនិយមកូកាស ក្នុងពេលកំពុងប្រកួតកីឡានៅមាន គ្រប់ប្រទេសដែលមានកីឡាករចូលរួមសុទ្ធតែមានការព្រួយបារម្ភនឹងបញ្ហាសុវត្ថិភាពទាំងអស់។ លើសពីនេះទៅទៀត ច្បាប់ប្រឆាំងនឹងក្រុមអ្នកស្រលាញ់ភេទដូចគ្នា បានបង្កឱ្យមានការរិះគន់យ៉ាងខ្លាំង។ ការរិះគន់ និងបាតុកម្មរបស់ក្រុមអ្នកស្រលាញ់ភេទដូចគ្នា មានកាន់តែច្រើន នៅពេលការប្រកួតកីឡាជិតចាប់ផ្តើម។
ដូច្នេះ សម្រាប់ក្រសៃភ្នែកអ្នកវិភាគឯករាជ្យ កីឡាអូឡាំពិកនេះគឺជាវិញ្ញាសាមួយដែលលោកពូទីនត្រូវជម្នះឱ្យបាន ហើយពេលនេះលោកពូទីនទំនងជាកំពុងមានអារម្មណ៍រន្ថាន់ ប្រៀបដូចជានិស្សិតហៀបចូលបន្ទប់ប្រលង។ ដូច្នោះបើប្រសិនបើមានអ្វីកើតឡើងតែបន្តិច ពិតជាប្រលងធ្លាក់មិនខាន។
កីឡាអូឡាំពិកនឹងបង្ហាញថារុស្ស៊ី ក៏ដូចជាប្រទេសដទៃទៀតដែរ ប៉ុន្តែសំណាងជួបបរាជ័យដូចជាមានច្រើនជាងការប្រមូលផល ព្រោះស្ថានភាពជាក់ស្តែងប្តូរផ្លាស់ រុស្ស៊ីពេលរៀបចំកីឡា ខុសពីរុស្ស៊ីកាលជាប្រទេសបេក្ខជន ក្នុងឆ្នាំ២០០៧។ រុស្ស៊ី និងលោកពូទីនពេលនោះ ខុសពីពេលនេះ។ គ្មាននរណាអនុគ្រោះឱ្យបានទៀតទេ គេរង់ចាំតែចាប់កំហុសប៉ុណ្ណោះ ជាពិសេសនៅចំពោះមុនការរំលោភសិទ្ធិមនុស្ស អំពើពុករលួយ និងរលកនៃការស្អប់ខ្ពើមអ្នកស្រលាញ់ភេទដូចគ្នា។ល។ និង។ល។
ក៏ប៉ុន្តែកីឡានៅតែជាកីឡា ! កីឡាអូឡាំពិក Sochi នឹងមិនប្តូររូបភាពរុស្ស៊ីក្នុងពិភពលោកឡើយ ! ការតាមដានការប្រកួតនៅតែសកម្ម ព្រោះជាផ្ទាំងទស្សនីយភាពដ៏គួរឱ្យចង់គយគន់ និងប្រកបដោយជំនក់ចិត្តសម្រាប់អ្នកសេ្នហាកីឡា ដូចកំពុងមើលសង្គ្រាមប្រយុទ្ធគ្នារវាងប្រទេសនិងប្រទេស ក្នុងស្តាត តែជាសង្គ្រាមដែលគ្មានប៉ះពាល់ដល់ព្រំដែនគំនិត និងមិនប្តូរដែនដីនៃការចងចាំ។ ជាក់ស្តែង កីឡាអូឡាំពិក កាលនៅសារ៉ាយេវោ មិនបានបញ្ចប់សង្គ្រាមស៊ីវិលក្នុងប្រទេសនោះទេ ហើយនៅអាថែន ក៏មិនបានបញ្ចៀសក្រិកឱ្យផុតពីវិបត្តិសេដ្ឋកិច្ចដើរថយក្រោយ នៅប៉េកាំងក៏ដូចគ្នា គឺមិនបានធ្វើឱ្យទីបេបានសេរីភាព និងគាស់វិបត្តិធានអាន់មៀនឱ្យរស់ឡើងវិញដែរ។ អ្វីដែលគេអាចសង្ឃឹមបាន គឺព្រឹត្តិការណ៍ពិភពលោកនេះ អាចចម្លង បញ្ជូនទៅឱ្យរបបដឹកនាំផ្តាច់ការនូវមេរោគ និងរសជាតិនៃការទទួលស្គាល់ពីសំណាក់អន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ