ទៅទល់ពេលបើកការប្រកួតកីឡាអូឡាំពិក នៅក្រុងរុស្ស៊ី Sochi សល់១ឆ្នាំគត់
ទាក់ទងនឹងកាលបរិច្ឆេទនេះ នៅក្រុង Sochi ផ្ទាល់ លោកប្រធានាធិបតីរុស្ស៊ី ពូទីន និងលោកប្រធាន “គណៈកម្មាធិការអូឡាំពិកអន្តរជាតិ” Jacques Rogge បានរួមគ្នាយកម្រាមដៃ ចុច”ប៊ូតុងជានិមិត្តរូប” ដាក់ឲ្យដើរ ម៉ោងដែលរត់បន្ថយ១វិនាទីម្តងៗ ពេលដែលនៅសល់ ទៅទល់ថ្ងៃសម្ពោធ “ល្បែងកីឡាអូឡាំពិករដូវត្រជាក់លើកទី២២” នៅរុស្ស៊ី គឺថ្ងៃ៧កុម្ភៈឆ្នាំ២០១៤។
ចុះផ្សាយនៅថ្ងៃ៖
ស្តាប់ - ០៣:០២
ថ្លែងក្នុងពិធីដាក់ឲ្យដើរយ៉ាងឧឡារឹក នាឡិកាដែលចង្អុលម៉ោងនោះ លោក ពូទីន ប្រធានាធិបតីរុស្ស៊ី សង្កត់ធ្ងន់ថា ប្រទេសរុស្ស៊ីនឹងធ្វើសព្វបែបយ៉ាង ឲ្យបានសមនឹងការសម្រេចរបស់ “គណៈកម្មាធិការអូឡាំពិកអន្តរជាតិ” កាលពីខែកក្កដាឆ្នាំ២០០៧ ដែលបានប្រគល់ទំនុកទុកចិត្ត មកលើរុស្ស៊ី ឲ្យធ្វើជាម្ចាស់ផ្ទះទទួល “ល្បែងកីឡាអូឡាំពិករដូវត្រជាក់លើកទី២២” ហើយរុស្ស៊ី នឹងលើកកីឡាពិភពលោកនេះ ឲ្យឡើងដល់កម្រិតថ្មី មានគុណភាពកាន់តែខ្ពស់។
លោក Jacques Rogge ប្រធាន”គណៈកម្មាធិការអូឡាំពិកអន្តរជាតិ” ពីចំណែកខ្លួន សំដែងនូវជំនឿជឿជាក់ថា ការរៀបចំដោយរុស្ស៊ី ដើម្បីទទួលព្រឹត្តិការណ៍ដែលមានន័យពិភពលោកនេះ នឹងចប់បានទាន់ពេលវេលា យ៉ាងជោគជ័យ។
ពេញមួយថ្ងៃ៧កុម្ភៈម្សិលមិញ ការដាក់ឲ្យដើរនាឡិកាបែបនេះ បានក្លាយទៅជាពិធីបុណ្យ នៅតាមក្រុងរុស្ស៊ីធំៗ ចំនួន៨ទៀត តាំងពីចុងបូព៌ា រហូតដល់ប៉ែកខាងលិចនៃប្រទេស ក្នុងនោះ ប្រាកដណាស់ មានរដ្ឋធានីម៉ូស្គូ ជាដើម ជាទីដែលវាត្រូវបានដំឡើង នៅចំកណ្តាលក្រុងតែម្តង លើទីលាន នៅខាងឆ្វេងពីកំពែងវិមានក្រេមឡាំង។ នាឡិកា ដែលដាក់ឲ្យរាប់ពេលនៅសល់ ទៅទល់ថ្ងៃបើកកីឡាអូឡាំពិកនោះ គឺសុទ្ធតែជាម៉ាក Omega ដ៏ល្បីល្បាញ វាមានកំពស់៦ម៉ែត្រ បណ្តោយ៤ម៉ែត្រ៤តឹក ទទឹង ២ម៉ែត្រ២តឹក ទម្ងន់ ៧តោននិង៨០០គីឡូក្រាម។ វាអាចដើរទោះ ក្នុងធាតុអាកាសត្រជាក់ ចុះដល់៤០អង្សា ក្រោមសូន្យក៏ដោយ។
ការប្រកួតកីឡាអូឡាំពិករដូវត្រជាក់លើកទី២២ នឹងប្រព្រឹត្តទៅ ពីថ្ងៃទី៧ដល់ទី២៣ខែកុម្ភៈ ឆ្នាំ ២០១៤ នៅក្រុងSochi ឯមាត់សមុទ្រខ្មៅ ជាតំបន់ខាងជើងភ្នំកូកាស ជាទី ដែលមានសង់បានយ៉ាងច្រើនទៅហើយ កន្លែងសម្រាប់ប្រណាំងគ្នា ខាងលោតSki ខាងរំអិលចុះតាមជម្រាលខ្នងភ្នំ និង ខាងប្រកួតកីឡារដូវត្រជាក់ ច្រើនមុខទៀត។ ក្រុង Sochi ស្ថិតនៅចម្ងាយ ១.៦៨០គ.ម. ខាងត្បូងពីរដ្ឋធានីម៉ូស្គូ។
ដើម្បីសាងសង់ឡើង ជាកីឡាដ្ឋានចម្បងសម្រាប់ល្បែងនេះ ជាទីប្រកួតចំនួន១៣កន្លែងក្នុងភ្នំ ជាហេដ្ឋារចនាសម្ព័ន្ធ ផ្លូវរថភ្លើង ស្ពាន រូងឧម្មង្គឆ្លងកាត់ក្រោមភ្នំ ស្ថានីយអគ្គិសនីបន្ថែម បណ្តាញសណ្ឋាគារ ពង្រីកអាកាសយានដ្ឋាននៅទីនោះ រដ្ឋរុស្ស៊ីចំណាយសរុបទៅអស់ ៥០.០០០លាន ដុល្លារអាមេរិក ដែលស្មើនឹងប៉ុន្មានដងឯណោះ នៃទំហំ “ផលិតផលសរុបក្នុងប្រទេស” ហៅកាត់ថា GDP របស់កម្ពុជា។
នឹងចូលរួមប្រកួតខាងមុខកីឡារដូវត្រជាក់ នៅក្រុងរុស្ស៊ី Sochi ក្នុងខែកុម្ភៈ ឆ្នាំ២០១៤ គឺ កីឡាករ កីឡាការិនី ប្រមាណ ៦.០០០នាក់ មកពី ៨០ប្រទេស។
តាំងពីម្សិលមិញទៅហើយ រុស្ស៊ី ចាប់លក់សំបុត្រ សម្រាប់ចូលមើលការប្រកួតនោះ ដែលតម្លៃវា គឺ ពី១៧ដុល្លារ រហូតដល់ ១.៧០០ដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ