រុស្ស៊ីបញ្ជូនយន្តហោះចំបាំងជួយកងទ័ពអ៊ីរ៉ាក់ បង្អួតអាមេរិក
ចុះផ្សាយនៅថ្ងៃ៖
ស្តាប់ - ០៥:០៦
នៅចុងសប្តាហ៍កន្លងទៅ រុស្ស៊ីបានបញ្ជូនយន្តហោះចំបាំង៥គ្រឿង ទៅអ៊ីរ៉ាក់ ដើម្បីជួយកងទ័ពអ៊ីរ៉ាក់ ប្រយុទ្ធវាយបកក្រុមឧទ្ទាមជីហាតជ្រុលនិយម។ រដ្ឋាភិបាលលោកម៉ាលិគី ក៏បានប្រកាសថា អ៊ីរ៉ាក់នឹងទិញយន្តហោះជាង១២គ្រឿងទៀត ក្នុងតម្លៃ៣៦៨លានអឺរ៉ូ ពីរុស្ស៊ីផងដែរ។ តាមរយៈការលេចមុខ ក្នុងសំណុំរឿងអ៊ីរ៉ាក់ ក្រុងម៉ូស្គូកំពុងបង្ហាញ និងបន្តុះបង្អាប់អាមេរិកថា នយោបាយការបរទេសអាមេរិកជួយអ៊ីរ៉ាក់កន្លងមក មិនអាចសម្រេចការធំដុំអ្វីបាន ក្រៅតែពីបំផ្លាញអ៊ីរ៉ាក់ទេ។ ក្រុមជីហាតជ្រុលនិយម បានឡើងឥទ្ធិពល រហូតប្រកាសបង្កើតរបបដឹកនាំអ៊ីស្លាម នៅថ្ងៃចន្ទម្សិលមិញទៀតផង។
ថ្មីៗនេះ រដ្ឋាភិបាលក្រុងម៉ូស្គូទើបបានប្រកាសថា រុស្ស៊ីមិនអោបដៃមើលអ៊ីរ៉ាក់ដែលកំពុងរងគ្រោះដោយការគំរាមកំហែងរបស់ក្រុមជីហាតជ្រុលនិយមនោះទេ។ ក្រោយប្រកាសភ្លាមៗ រុស្ស៊ីក៏បញ្ជូនយន្តហោះចំបាំងប្រភេទស៊ូខយ-២៥ ចំនួន៥គ្រឿង ទៅជួយកងទ័ពអ៊ីរ៉ាក់ភ្លាមតែម្តង។ នយោបាយការបរទេសសន្យាភ្លាម ជួយភ្លាមរបស់រុស្ស៊ី នៅអ៊ីរ៉ាក់ កំពុងវាយបំបាក់មុខអាមេរិក ជាថ្មីទៀត ក្នុងសំណុំរឿងអន្តរជាតិ យ៉ាងជាក់ស្តែង។
ប្រាកដណាស់ ពិភពលោកតែងកត់សម្គាល់វត្តមានអាមេរិក ក្នុងការចេញមុខដោះស្រាយវិបត្តិអន្តរជាតិធ្ងន់ធ្ងរ ដូចជានៅអ៊ុយក្រែន រឺនៅស៊ីរីជាដើម។ តែវិបត្តិអ៊ុយក្រែន និងស៊ីរី នៅតែមិនទាន់រកច្រកចេញនៅឡើយទេ។ គេឃើញមានតែមនុស្សស្លាប់ របួស រឺក៏ជនភៀសខ្លួន ដែលមានការកើនឡើងរាល់ថ្ងៃប៉ុណ្ណោះ។ ពិសេសនៅអ៊ីរ៉ាក់ពេលនេះតែម្តង។ ក្នុងថ្ងៃចាប់ផ្តើមបុណ្យសាសនាអ៊ីស្លាមរ៉ាម៉ាដង់ភ្លាម ក្រុមជីហាតជ្រុលនិយមរដ្ឋអ៊ីស្លាមអ៊ីរ៉ាក់ បានប្រកាសបង្កើតរបបដឹកនាំអ៊ីស្លាម នៅតាមតំបន់ដែលខ្លួនដណ្តើមបាននៅស៊ីរី និងអ៊ីរ៉ាក់ ធ្វើអោយគ្រប់បណ្តាប្រទេសក្នុងពិភពលោក កំពុងភ័យបះរោម។ ប្រាកដណាស់ របបដឹកនាំអ៊ីស្លាមនេះ អាចទាក់ទាញយុទ្ធជនអ៊ីស្លាមពីគ្រប់ទិសទី ក្នុងពិភពលោកអោយចូលមកជួយក្រុមជីហាតមួយនេះ ការពាររដ្ឋ ការពាររបបដឹកនាំអ៊ីស្លាមថ្មីនេះ។
តែបើយើងត្រលប់ទៅមើលប៉ុន្មានខែមុននេះ មុនពេលក្រុមជីហាតសម្រេចជោគជ័យវាយលុកនៅអ៊ីរ៉ាក់ ប្រទេសលោកខាងលិច និងអាមេរិកហាក់រំភើយកន្តើយ។ គ្រប់គ្នាគិតតែនាំគ្នាវាយប្រហារពាក្យសំដីលើរុស្ស៊ី ក្នុងសំណុំរឿងអន្តរជាតិផ្សេងៗ បែបយ៉ាងស៊ីរី រឺក៏អ៊ុយក្រែន។ តែតាំងពីថ្ងៃ៩មិថុនាមក ពេលឃើញក្រុមជីហាតជ្រុលនិយមស៊ុននីត សម្រេចជោគជ័យលឿនដូចផ្លេកបន្ទោរ អាមេរិកនិងអឺរ៉ុបបែរជាបន្ទោសរដ្ឋាភិបាលនិកាយស្ហ៊ីអ៊ីតរបស់លោកម៉ាលិគី ថាមិនចេះរួបរួមនិកាយក្នុងស្រុក ទើបបានជាអតីតទាហាននិកាយស៊ុននីតរបស់លោកសាដាំ ហ៊ូសេន បាននាំគ្នារត់ទៅចុះចូលជាមួយក្រុមជីហាតជ្រុលនិយមយ៉ាងដូច្នោះ។
រុស្ស៊ីមិនដូចអាមេរិកទេ រុស្ស៊ីបានបង្ហាញជំហរច្បាស់ តាំងពីដើមរៀងមក រុស្ស៊ីមិនបានគាំទ្រអន្តរាគមន៍យោធាកំទេចរបបផ្តាច់ការលោកសាដាំ ហ៊ូសេន កាលពីឆ្នាំ២០០៣ទេ ហើយពេលអ៊ីរ៉ាក់កំពុងរងគ្រោះបែបនេះ រុស្ស៊ីក៏ចេញមុខភ្លាមៗបញ្ជូនយន្តហោះចំបាំងជួយកងទ័ពអ៊ីរ៉ាក់ដែរ ជាជាងធ្វើតាមអាមេរិក និងប្រទេសផ្សេងៗ ដែលនៅបង្អែបង្អង់បន្ទោសរដ្ឋាភិបាលអ៊ីរ៉ាក់ ថាមិនចេះរួបរួមជាតិ។ តាមរយៈការបញ្ជូនយន្តហោះចំបាំង៥គ្រឿងជួយអ៊ីរ៉ាក់ និងកិច្ចសន្យាលក់យន្តហោះច្រើនគ្រឿងផ្សេងទៀត ក្រុងម៉ូស្គូកំពុងបន្ទោសអាមេរិកថា នយោបាយសង្គ្រាមរបស់អាមេរិកនៅអ៊ីរ៉ាក់កន្លងមក បានបន្សល់ផលវិបាកធ្ងន់ធ្ងរ មិនត្រឹមតែបំផ្លាញអ៊ីរ៉ាក់តែមួយប្រទេសប៉ុណ្ណោះទេ តែកំពុងធ្វើអោយក្រុមជីហាតជ្រុលនិយម ឡើងអំណាចនិងឥទ្ធិពលពេញទី ក្នុងតំបន់ គំរាមស្ថិរភាពតំបន់អារ៉ាប់ និងគំរាមសន្តិសុខពិភពលោកទាំងមូលតែម្តង។
ប្រាកដណាស់ អ៊ីរ៉ាក់ធ្លាក់ដុនដាប គឺដោយសាររដ្ឋាភិបាលនិកាយស្ហ៊ីអ៊ីត ដែលអាមេរិកជ្រោមជ្រែងនោះ បែកបាក់គ្នា រើសអើងអ្នកកាន់និកាយស៊ុននីត។ អាមេរិកអាចបន្ទោសអ៊ីរ៉ាក់លើចំណុចនេះបានមែន តែអាមេរិកមិនត្រូវភ្លេចថា ពេលអាមេរិកកាន់កាប់បូរណភាពនៅអ៊ីរ៉ាក់រាប់ឆ្នាំ ការដែលអាមេរិកគាស់រំលើងកងទ័ពនិកាយស៊ុននីត របស់លោកសាដាំ ហ៊ូសេន និងដាក់ចេញរដ្ឋាភិបាលនិកាយស្ហ៊ីអ៊ីត នេះហើយ ជាបញ្ហាធ្វើអោយកងទ័ពលោកសាដាំ ហ៊ូសេន បាក់ទឹកចិត្តចុះចូលជាមួយក្រុមជីហាតជ្រុលយម។
ក្រុងម៉ូស្គូ ធ្លាប់ចំអកអន្តរគមន៍យោធាអាមេរិកនៅអ៊ីរ៉ាក់ ថាអាមេរិកគ្មានភស្តុតាងជាក់ស្តែងថា អ៊ីរ៉ាក់មានអាវុធប្រល័យលោក នយោបាយអាមេរិកជួយអ៊ីរ៉ាក់នោះមិនបានធ្វើអោយចប់ចុងចប់ដើមទេ។ ពេលនេះ ក្រុងម៉ូស្គូចេញមុខជួយកងទ័ពអ៊ីរ៉ាក់ សបង្ហាញថា នយោបាយការបរទេសរុស្ស៊ី គឺជានយោបាយក្លាហាន ជួយប្រជាជនអ៊ីរ៉ាក់ ដែលកំពុងរងគ្រោះដោយសារនយោបាយសង្គ្រាមរបស់អាមេរិក កាលពីឆ្នាំ២០០៣មិនមែននយោបាយញញើតញញើមដូចលោកអូបាម៉ាពេលនេះទេ។ គេលឺតែអាមេរិកអួតថា ជួយអ៊ីរ៉ាក់ចេញផុតពីរបបផ្តាច់ការលោកសាដាំ ហ៊ូសេន។ តែពេលអ៊ីរ៉ាក់កំពុងធ្លាក់ក្នុងភាពដុនដាបប្រឈមការគំរាមរបស់ក្រុមជីហាតពេលនេះ អាមេរិកបែរជាញញើតបញ្ជូនទ័ពទៅអ៊ីរ៉ាក់ ញញើតប្រើយន្តហោះដ្រូនបាញ់កំចាត់ក្រុមជ្រុលនិយមជីហាត ពោលគឺញញើតជួយអ៊ីរ៉ាក់អោយពេញដៃពេញជើងណាស់។
កន្លងមក អាមេរិកនិងប្រទេសដៃគូអឺរ៉ុប បានត្រឹមតែបន្ទោសរុស្ស៊ីក្នុងសំណុំរឿងអន្តរជាតិបែបយ៉ាង អ៊ុយក្រែន រឺក៏ស៊ីរីប៉ុណ្ណោះ។ ពេលរុស្ស៊ីគាំទ្រប្រធានាធិបតីអាសាដ កំចាត់ក្រុមឧទ្ទាមផ្សេងៗនៅស៊ីរីនោះ អាមេរិកនិងអឺរ៉ុប បែរជានាំគ្នាគាំទ្រក្រុមឧទ្ទាមនៅស៊ីរី ដើរបញ្ច្រាសពីរុស្ស៊ីទៅវិញ។ ផ្ទុយទៅវិញ ក្រុមឧទ្ទាមជ្រុលនិយមស៊ុននីត ដែលវាយលុកអ៊ីរ៉ាក់ពេលនេះ គឺជាក្រុមដែលធ្លាប់ជួយក្រុមប្រឆាំងនិងក្រុមឧទ្ទាមនៅស៊ីរី កំចាត់កងទ័ពលោកអាសាដនោះឯង។ ដូច្នេះ គេអាចនិយាយបានថា នយោបាយអន្តរជាតិអាមេរិកតាំងពីជំនាន់ប្រធានាធិបតីនិយមសង្គ្រាមបែបលោកប៊ូស រហូតដល់ជំនាន់ប្រធានាធិបតី និយមសន្តិភាពបែបលោកអូបាម៉ា សព្វថ្ងៃ គឺជានយោបាយធ្លាក់ទឹកពេញទី ប្រៀបនឹងនយោបាយរុស្ស៊ី ដែលរឹងមាំ ប្រឆាំងដាច់ខាតនឹងចលនាបះបោរក្រុមឧទ្ទាម និងក្រុមប្រឆាំង ទាំងនៅស៊ីរី ទាំងនៅអ៊ុយក្រែននោះ។
ឥឡូវនេះ មើលឃើញក្រុមជីហាតបង្កើតរដ្ឋដឹកនាំអ៊ីស្លាមនៅតាមព្រំដែនអ៊ីរ៉ាក់ និងស៊ីរី ពេលនេះ ចង់មិនចង់ គ្រប់គ្នាពិសេសអាមេរិក ប្រហែលនឹកស្តាយក្រោយហើយ ដែលមិនបានសហការគ្នាជួយអ៊ីរ៉ាក់ ក្រោយអាមេរិកដកទ័ពអស់ពីអ៊ីរ៉ាក់នៅចុងឆ្នាំ២០១១ ស្តាយដោយមិនបានគាំទ្ររុស្ស៊ី និងប្រធានាធិបតីស៊ីរី កំចាត់ក្រុមឧទ្ទាមនៅស៊ីរីតាំងពីដំបូងទី។ ហេតុនេះហើយ បានជាក្រុមជីហាតបានងាកក្បាលពីស៊ីរី មកវាយយកដែនដីអ៊ីរ៉ាក់ បានស្រួល រហូតសម្រេចផែនការបង្កើតរបបអ៊ីស្លាមបាននៅពេលនេះ។ គេអាចថា ក្រុងម៉ូស្គូចេញមុខជួយកងទ័ពអ៊ីរ៉ាក់ពេលនេះ ក៏ដើម្បីបង្ហាញអាមេរិកនិងសហគមន៍ អន្តរជាតិថា នយោបាយការបរទេសរុស្ស៊ី នៅគ្រប់ទិសទី មិនថា នៅស៊ីរី អ៊ុយក្រែន រឺអ៊ីរ៉ាក់ទេ គឺជានយោបាយដើរតាមគន្លងធម៌ត្រឹមត្រូវ នយោបាយយកការបាន ដើម្បីសង្គ្រោះប្រជាជនស្លូតត្រង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ