រុស្ស៊ីបដិសេធថាមិនបានរំលោភដែនអាកាសអ៊ុយក្រែនទេ
ប្រឈមនឹងការចោទប្រកាន់របស់មន្ទីរប៉ង់តាហ្កូន ថាយន្តហោះរុស្ស៊ីច្រើនគ្រឿងបានចូលលុករំលោភក្នុងដែនអាកាសអ៊ុយក្រែន នៅថ្ងៃសៅរ៍នេះ រុស្ស៊ីបានបដិសេធថា មិនបានរំលោភដែនអាកាសអ៊ុយក្រែនទេ។ រុស្ស៊ីបានសុំអោយមានការដោះលែងអ្នកសង្កេតការណ៍អង្គការសន្តិសុខនិង សហប្រតិបត្តិការអឺរ៉ុប OSCE ១៣រូប ដែលសកម្មជនផ្តាច់ទឹកដីនិយមនៅក្រុងស្លាវីយ៉ង់ចាប់ខ្លួន កាលពីថ្ងៃសុក្រកន្លងទៅ។ ក្រុមអ្នកចរចាអង្គការ OSCE បានធ្វើដំណើរទៅក្រុងស្លាវីយ៉ង់ដើម្បីសម្រេចអោយមាន ការដោះលែងអ្នកសង្កេតការណ៍ខ្លួននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
នៅថ្ងៃសៅរ៍នេះ ក្រសួងការពារជាតិរុស្ស៊ីបានឆ្លើយតបទៅនឹងមន្ទីរប៉ង់តាហ្កូនថា រុស្ស៊ី មិនបានរំលោភចូលដែនអាកាសអ៊ុយក្រែន ដូចដែលអាមេរិកបានចោទប្រកាន់នោះទេ។ យោងតាមក្រសួងការពារជាតិរុស្ស៊ី ផ្នែកត្រួតពិនិត្យរុស្ស៊ីមិនបានពិនិត្យឃើញមានការរំលោភដែនអាកាសក្នុងប្រទេសជិតខាងរុស្ស៊ីនោះទេ។ មន្ទីរប៉ង់តាហ្កូនបានប្រាប់កាលពីថ្ងៃសុក្រថា យន្តហោះរុស្ស៊ីជាច្រើនគ្រឿងបានលុកចូលក្នុងដែនអាកាសអ៊ុយក្រែន ជាច្រើនដង ក្នុងរយៈពេល២៤ម៉ោងចុងក្រោយនេះ។ ប៉ុន្តែ មិនបានប្រាប់ថា តើយន្តហោះទាំងនោះចូលទៅទីណា រឺពេលណាពិតប្រាកដនោះទេ។ នាយករដ្ឋមន្ត្រីអ៊ុយក្រែន លោកអាតសេនី ឡាតសេនីញុក ក៏បានចោទថា យន្តហោះយោធារុស្ស៊ីបានរំលោភដែនអាកាសអ៊ុយក្រែនផងដែរ។
អាមេរិក សហភាពអឺរ៉ុប និងរុស្ស៊ីតែងចោទគ្នាទៅវិញទៅមក ថាបង្កអោយមានភាពតានតឹងនៅអ៊ុយក្រែន។ នៅថ្ងៃចន្ទ២៨មេសានេះ ប្រទេសសហភាពអឺរ៉ុបទាំង២៨នឹងពិភាក្សាគ្នា នៅក្រុងព្រុចសែល ពីទណ្ឌកម្មថ្មីៗដែលត្រូវដាក់ប្រឆាំងរុស្ស៊ី ចំពោះទង្វើរុស្ស៊ីនៅអ៊ុយក្រែន។
នៅថ្ងៃសៅរ៍នេះ រុស្ស៊ីបានសុំអោយមានការដោះលែងអ្នកសង្កេតការណ៍អង្គការសន្តិសុខនិងសហប្រតិបត្តិការអឺរ៉ុប១៣រូប ដែលសកម្មជនផ្តាច់ទឹកដីនិយមនៅក្រុងស្លាវីយ៉ង់ ភាគខាងកើត បានចាប់ទៅកាលពីថ្ងៃសុក្រ។ ក្នុងចំណោមអ្នកសង្កេតការណ៍ទាំងនេះ មានជនជាតិអាល្លឺម៉ង់ ស៊ុយអែត ប៉ូឡូញ ណាណឺម៉ាក និងឆែក រួមទាំងជនជាតិអ៊ុយក្រែនផងដែរ។ សកម្មជនផ្តាច់ទឹកដីនិយមបានចោទពួកគេថា ជាចារកិច្ចរបស់អង្គការអូតង់។ ដើម្បីដោះលែងពួកគេ សកម្មជនផ្តាច់ទឹកដីនិយមទាមទារអោយមានការដោះលែងសកម្មជនខ្លួន ដែលអាជ្ញាធរក្រុងគៀវចាប់ដាក់ពន្ធនាគារផងដែរ។
នៅតំបន់ដូណេតភាគខាងកើតអ៊ុយក្រែនវិញ មេដឹកនាំតំបន់ គឺលោក ដឺនី ពូឈីលីន បានប្រាប់ថា ការបោះឆ្នោតប្រជាមតិស្តីពីការប្រកាសឯករាជ្យភាពតំបន់ដូណេត នឹងប្រព្រឹត្តទៅនៅថ្ងៃ១១ឧសភាខាងមុខនេះហើយ។ ក្រោយប្រជាមតិនេះ នឹងមានការបោះឆ្នោតដើម្បីសម្រេចថា តើអ្នកណាត្រូវគ្រប់គ្រងតំបន់ដូណេត នៅពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ