សហភាពអឺរ៉ុប៖ សង្គមស៊ីវិលគឺជាទ្រព្យអភិបាលកិច្ចរបស់រដ្ឋាភិបាល
សមាគមការពារសិទ្ធិមនុស្សអាដហុក បានរៀបចំសិក្ខាសាលា២ថ្ងៃមួយស្តីពីសិទ្ធិមនុស្សនិងលទ្ធិប្រជាធិបតេយ្យ។ សិក្ខាសាលាដែលគាំទ្រដោយសហភាពអឺរ៉ុបកំពុងផ្តោតទៅលើស្ថានភាពនៃដំណើរការបោះឆ្នោត ការគោរពសិទ្ធិមនុស្សនៅកម្ពុជាសេរីភាពនៃការបញ្ចេញមតិ និងសិទ្ធិនៃការធ្វើសកម្មភាពរបស់អង្គការសង្គមស៊ីវិល។ ប្រធានប្រតិភូនៃសហភាពអឺរ៉ុបប្រចាំកម្ពុជាលោក Jean-François CAUTAIN ថ្លែងផ្តល់សារៈសំខាន់ដល់វត្តមានរបស់សង្គមស៊ីវិលនៅកម្ពុជាដែលត្រូវចាត់ទុកថា ជាជើងម្ខាងរបស់កម្ពុជាដើម្បីទប់ខ្លួនកម្ពុជាអោយនឹង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
នៅក្នុងចំណោមធាតុផ្សំជាច្រើននៃបញ្ហាសិទ្ធិមនុស្ស និងលទ្ធិប្រជាធិបតេយ្យនៅកម្ពុជា ប្រធានប្រតិភូនៃសហភាពអឺរ៉ុបលោក Jean-François CAUTAIN បានផ្តោតអារម្មណ៍ចំពោះការផ្តល់តម្លៃដល់ការងាររបស់សង្គមស៊ីវិល។ ការកត់សម្គាល់របស់តំណាងសហភាពអឺរ៉ុបនៅកម្ពុជាធ្វើឡើងនៅក្នុងសិក្ខាសាលា២ថ្ងៃដែលរៀបចំដោយសមាគមការពារសិទ្ធិមនុស្សអាដហុកនៅថ្ងៃចន្ទនេះ។
សម្រាប់លោក Jean-François CAUTAIN កម្ពុជាត្រូវឈរលើមូលដ្ឋានពីរដែលជាជើងដ៏រឹងមាំរបស់ខ្លួន នោះគឺជើងម្ខាងជារដ្ឋាភិបាល និងជើងម្ខាងទៀតជាសង្គមស៊ីវិល។ អាចជាសារមួយផ្ញើទៅរដ្ឋាភិបាល ប្រធានប្រតិភូសហភាពអឺរ៉ុបប្រចាំកម្ពុជាបានថ្លែងថា “ជាទស្សនៈរបស់យើងខ្ញុំ សង្គមស៊ីវិលប្រកបដោយភាពរស់រវើកនៅកម្ពុជា គឺជាទ្រព្យអភិបាលកិច្ចដ៏មានតម្លៃមួយរបស់កម្ពុជា ហើយកម្ពុជានឹងត្រូវបានកោតសរសើរចំពោះការមានទ្រព្យដ៏មានតម្លៃនេះ។
តំណាងសហភាពអឺរ៉ុបកំពុងថ្លែងអំពីសារៈសំខាន់នៃសង្គមស៊ីវិល ឬអង្គការក្រៅរដ្ឋាភិបាល នៅពេលដែលរដ្ឋាភិបាលកម្ពុជាកំពុងតាក់តែងសេចក្តីព្រាងច្បាប់ស្តីពីអង្គការក្រៅរដ្ឋាភិបាលដ៏ចម្រូងចម្រាស។
អ្នកនាំពាក្យអង្គភាពព័ត៌មាននិងប្រតិកម្មរហ័សនៃទីស្តីការគណៈរដ្ឋមន្ត្រីលោកទិត សុធាបានអត្ថាធិប្បាយ សេចក្តីថ្លែងការណ៍របស់តំណាងសហភាពអឺរ៉ុបប្រចាំកម្ពុជាធ្វើឡើង នៅក្រោយពេលដែលរដ្ឋាភិបាលបានបើកចំហនិងផ្តល់សិទ្ធិសេរីភាពអោយអង្គការក្រៅរដ្ឋាភិបាលប្រមាណ៣០០០អង្គការកំពុងធ្វើសកម្មភាពការងាររបស់ខ្លួននៅកម្ពុជារួចហើយ។
គួរបញ្ជាក់ថា ក្នុងរយៈពេល២ខែទៀត នឹងមានកិច្ចប្រជុំទ្វេភាគីរវាងសហភាពអឺរ៉ុប និងរដ្ឋាភិបាល។ លទ្ធផលនៃសិក្ខាសាលា២ថ្ងៃនេះ នឹងត្រូវប្រមូល ហើយបង្ហាញអោយភាគីរដ្ឋាភិបាលបានឃើញនៅក្នុងកិច្ចប្រជុំទ្វេភាគីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ