ការដង្ហែរក្បួនថ្ងៃ ១ ឧសភានៅតែមានការហាមឃាត់
ក្រុមអ្នកសហជីព និងអង្គការសង្គមស៊ីវិលដែលមាននិន្នាការសង្គមផ្ទុយពីរដ្ឋាភិបាលនឹងតាំងចិត្តដើរក្បួននៅក្នុងឱកាសទិវាពលកម្មអន្តរជាតិលើកទី១២៧ដែលនឹងប្រព្រឹត្តិទៅនៅថ្ងៃទី១ ឧសភាខាងមុខ។ ផ្ទុយទៅវិញ សហជីពកម្មករគាំទ្ររដ្ឋាភិបាលបានប្រារព្ធពិធីនេះនៅនឹងកន្លែង។ ទោះជាយ៉ាងនេះក្តី អាជ្ញាធរបានទាត់ចោលការសុំដង្ហែរក្បួនដោយបារម្ភពីការទាក់ទងនឹងរឿងនយោបាយ។
ចុះផ្សាយនៅថ្ងៃ៖
ស្តាប់ - ០២:៤១
ក្រុមអ្នកសហជីព និងអង្គការសង្គមស៊ីវិលបានអះអាងថា ពួកគេនៅតែព្យាយាមរៀបចំដង្ហែរក្បួននៅតាមដងវិថីនានាក្នុងរាជធានីភ្នំពេញ ចំថ្ងៃទី ០១ ឧសភា ដែលជាទិវាពលកម្មអន្តរជាតិ បើទោះណាជាមានការមិនឯកភាពពីអាជ្ញាធររាជធានីភ្នំពេញក៏ដោយ។ លោកអាត់ ធន់ ប្រធានសហភាពការងារកម្ពុជាបានថ្លែងថា ព្រឹត្តិការណ៍ថ្ងៃ ១ ឧសភា គឺជាប្រធានបទពិភពលោកដែលចាំបាច់ត្រូវតែមានការគោរព និងគាំទ្រដល់ទិវានេះ ដើម្បីបង្ហាញពីសេរីភាព និងសិទ្ធិការងាររបស់កម្មករនិយោជិក។
លោកអាត់ ធន់ឲ្យដឹងថា ឆ្លៀតក្នុងការអបអរសាទរនៅក្នុងពីធីពិភពលោកនេះ លោកនឹងដាក់ញត្តិទៅរដ្ឋាភិបាលដើម្បីឲ្យមានការដោះស្រាយបញ្ហាប្រាក់ឈ្នួល កិច្ចសន្យាការងារកំណត់ខ្លី ក្នុងប្រភេទការងារជាប់លាប់ ការបិទសហគ្រាសដោយមិនមានការទទួលខុសត្រូវ ការរំលោភលើការប្រើប្រាស់សិទ្ធិរបស់ សមាគម និងសហជីព។ ដោយឡែក ទាក់ទងទៅហ្នឹងព្រឹត្តិការណ៍ថ្ងៃ ១ ឧសភានេះដែរ ក្រុមសហជីពដែលមាននិន្នាការគាំទ្ររដ្ឋាភិបាល បានជ្រើសរើសយកវិធីផ្សេង ដើម្បីអបអរសាទរថ្ងៃបុណ្យការងារអន្តរជាតិ ដោយមានកម្មវិធីជួបសំណេះសំណាលជាមួយលោកនាយករដ្ឋមន្ត្រីហ៊ុន សែនដែលមានការចូលរួមពីអ្នកសហជីព និងកម្មករ និយោជកចំនួនជិត ៤ពាន់នាក់ កាលពីព្រឹកថ្ងៃ ទី២៧ ខែមេសា ឆ្នាំ ២០១៣នេះ។
ប្រធានក្រុមប្រឹក្សាសហជីពជាតិកម្ពុជាលោកសោម អូនបានប្រាប់វិទ្យុបារាំងអន្តរជាតិឲ្យដឹង បន្ទាប់ពីជួបជាមួយប្រមុខរដ្ឋាភិបាលថា ក្រៅពីកម្មវិធីថ្ងៃនេះក្រុមអ្នកសហជីព កម្មករ និយោជិករបស់លោកនឹងមានពិធីកម្សាន្តសប្បាយនៅតាមបណ្តារោងចក្រនានា ដូចជាកម្មវិធីផ្សងសំណាង ការរាំកំសាន្តជាដើម។ ជាមួយគ្នានេះ លោកសោម អូនបានចាត់ទុកសកម្មភាពរបស់អ្នកសហជីព កម្មករ និងអង្គការសង្គមស៊ីវិលផ្សេងទៀតដែលត្រៀមដង្ហែរក្បួនថ្ងៃ ១ ឧសភានោះថា ជាការផ្តល់ឱកាសដល់ក្រុមអ្នកនយោបាយប្រឆាំង ខណៈដែលការបោះឆ្នោតសកលបានឈានជិតចូលមកដល់។ ក៏ប៉ុន្តែ ក្រុមអ្នកសហជីព និងអង្គការសង្គមស៊ីវិលដែលមានជំហរជំទាស់នឹងរដ្ឋាភិបាលបដិសេធ និងពន្យល់ថា ការដង្ហែរក្បួន គឺជាសិទ្ធិរបស់ពួកគេក្នុងការចូលរួមលើកស្ទួយសិទ្ធិ និងសេរីភាព របស់ កម្មករ និយោជិក នៅក្នុងឱកាសបុណ្យការងារពិភពលោក។
ទោះជាយ៉ាងនេះក្តី អាជ្ញាធររាជធានីភ្នំពេញក៏ដូចជាក្រសួងមហាផ្ទៃ នៃប្រទេសកម្ពុជានៅមិនទាន់មានការអនុញ្ញាតណាមួយនៅឡើយ ចំពោះការស្នើសុំហែរក្បួនតាមដងផ្លូវរបស់កម្មករ និយោជិក និងអង្គការសង្គមស៊ីវិល បើទោះជាកម្មវិធីនេះនឹងមានការកាត់បន្ថយអ្នកចូលរួមមួយចំនួនក៏ដោយ។ យោងតាមជំរឿនសហគ្រាសឆ្នាំ ២០១១ ប្រទេសកម្ពុជាមានសហគ្រាសធុនតូច និងមធ្យមប្រមាណជាងកន្លះលានសហគ្រាសដែលផ្តល់ការងារសរុបដល់មនុស្សជាង ១លាន ៦សែននាក់ ក្នុងនោះ នារី ១លាន ៣ម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ